Low Key op pad na wêreldkroon
Die Namibiër sal oor twee naweke in die hoofgeveg by die Windhoek Buiteklub betrokke wees.
Tielman van Lill
Jeremiah Nakathila (Low Key), Namibië se Afrika-superveergewigkampioen en “globale” titelhouer van die gesaghebbende Wêreldboksorganisasie (WBO), klim op 23 November in Windhoek deur die toue.
Peter Pambeni (23 gevegte, 17 oorwinnings met ses uitklophoue, drie gelykop, drie verloor) van Zimbabwe, kom aas vandeesmaand vir sy vierde oorwinning in Namibië. Die 30-jarige “Sniper” het 'n uitnodiging aanvaar om Nakathila vir sy WBO globale junior liggewigtitel te pak.
Nakathila het dié vonds op 20 April vanjaar bekom toe hy 27-jarige Zoltan Kovacs van Hongarye in die hoofstad met 'n tegniese uitklophou verslaan het.
Nakathila met 19 gevegte op sy getuigskrif spog met 18 oorwinnings, waarvan hy 14 met uitklophoue afgerond het. Sy enigste omstrede verloorgeveg was drie jaar gelede om die vakante WBO interkontinentale kroon in Ekaterinburg, Rusland, teen die hoog gerekende Evgeny Chuprakov.
Low Key pronk tans derde ná Jamel Herring (wêreldkampioen van die VSA), Oscar Valdez (eerste) en Lamont Roach (tweede) op die WBO-wêreldranglys. Sedert Nakathila met punte oor twaalf rondes teen Chuprakov die knie moes buig, het hy sewe agtereenvolgende seges en 'n paar titelgevegte beklink.
Pambeni het 12 jaar gelede as agtienjarige op 11 Augustus 2007 vir Siegfried Kaperu en Junius Amunyela (10 November 2007) binne drie maande op tuisbodem bokslesse met punteoorwinnings kom gee.
Meer onlangs het hy in Windhoek vir Albinius Felesianu (Danny Boy Albino) vir sy WBO-Afrikaliggewiggordel met punte oor tien rondes gestuit. Danny Boy is g'n hierjy in die kryt nie en was 'n driemalige IBF kontinentale asook WBF-interkontinentale kampioen.
Die Zimbabwiër sal in Nakathila egter met 'n ander tipe vegter te doen kry as in sy laaste geveg by die Ramatex-saal. Nakathila is taaier as 'n ratel. Benewens uitstekende voetwerk beskik hy oor die handspoed van 'n mamba en die slaankrag van 'n muilskop in sy vuiste.
SEGE SAL HOM HOëR PLAAS
Dit is geen wonder dat die 29-jarige Low Key veertien van sy teenstanders (73 persent) vroegtydig harpuis laat ruik het nie. Hoewel hy 'n rapsie meer as ses jaar gelede sy buiging as geldvegter gemaak het, is die Namibiër stadig maar seker op sy pad na die eerste posisie op die WBO-wêreldranglys.
Met sy voete stewig op moeder aarde geplant, is Nakathila se visier op die WBO-wêreldkroon ingestel wat hy dalk binnekort die handskoene voor kan aantrek. Jamel Herring plaas Saterdag sy WBO-superveergewigwêreldtitel teen sy mede-Amerikaner Lamont Roach (tweede op WBO-wêreldranglys) op die spel.
Een van die twee boksers gaan verloor, en dan sal Nakathila een posisie opskuif om as die tweede aanspraakmaker op die WBO-wêreldgordel veel meer seggenskap oor sy titelkanse te kry.
Nakathila vertel van sy voorbereiding vir sy geveg teen Pambeni oor 17 dae in die die hoofstad.
“Ek is topfiks en was soos altyd maar besig om in die gimnasium te werk, toe Nestor my die goeie nuus van die geveg teen Pambeni gebring het. Ek was verheug en dit het my selfvertroue 'n hupstoot gegee en ek het net nog harder gewerk.
“Dit gaan nie 'n maklike geveg wees nie, maar ek is soos altyd slaggereed om my teenstander met mening te pak. Ek is reg om Pambeni te klop. Ek het hom teen Danny Boy sien boks en hom goed bestudeer. Ek wil die jaar goed afsluit en my rekord skoon hou.
“Ek nooi geesdrigtiges om nie net vir my nie, maar ook al die ander boksers op 23 November te gaan ondersteun. Hoe meer mense daar is wat ons aanmoedig, hoe beter veg ons en hoe harder slaan ons!” het Nakathila entoesiasties gesê.
SOEK WRAAK
John Ekongo van die borg is positief oor die toekoms van boks in Namibië
“MTC is verbind tot die ontwikkeling en groei van boks in Namibië, om meer boksers vir wêreldtitels te kweek. Behalwe dat boks as beroep kos op die tafel sit, is dit ook 'n fantastiese dissipline wat sorg dat sy atlete as gedissiplineerse landsburgers tot Namibië se groei bydra. Nestor, jy moet sorg dat Low Key wen, want ek hou daarvan dat Pambeni Danny Boy se titel afgevat het nie,” het hy vertel.
Die junior liggewigafdeling (59 kg, 130 pond) word deur sommige beheerligame superveergewig genoem.- [email protected]
Jeremiah Nakathila (Low Key), Namibië se Afrika-superveergewigkampioen en “globale” titelhouer van die gesaghebbende Wêreldboksorganisasie (WBO), klim op 23 November in Windhoek deur die toue.
Peter Pambeni (23 gevegte, 17 oorwinnings met ses uitklophoue, drie gelykop, drie verloor) van Zimbabwe, kom aas vandeesmaand vir sy vierde oorwinning in Namibië. Die 30-jarige “Sniper” het 'n uitnodiging aanvaar om Nakathila vir sy WBO globale junior liggewigtitel te pak.
Nakathila het dié vonds op 20 April vanjaar bekom toe hy 27-jarige Zoltan Kovacs van Hongarye in die hoofstad met 'n tegniese uitklophou verslaan het.
Nakathila met 19 gevegte op sy getuigskrif spog met 18 oorwinnings, waarvan hy 14 met uitklophoue afgerond het. Sy enigste omstrede verloorgeveg was drie jaar gelede om die vakante WBO interkontinentale kroon in Ekaterinburg, Rusland, teen die hoog gerekende Evgeny Chuprakov.
Low Key pronk tans derde ná Jamel Herring (wêreldkampioen van die VSA), Oscar Valdez (eerste) en Lamont Roach (tweede) op die WBO-wêreldranglys. Sedert Nakathila met punte oor twaalf rondes teen Chuprakov die knie moes buig, het hy sewe agtereenvolgende seges en 'n paar titelgevegte beklink.
Pambeni het 12 jaar gelede as agtienjarige op 11 Augustus 2007 vir Siegfried Kaperu en Junius Amunyela (10 November 2007) binne drie maande op tuisbodem bokslesse met punteoorwinnings kom gee.
Meer onlangs het hy in Windhoek vir Albinius Felesianu (Danny Boy Albino) vir sy WBO-Afrikaliggewiggordel met punte oor tien rondes gestuit. Danny Boy is g'n hierjy in die kryt nie en was 'n driemalige IBF kontinentale asook WBF-interkontinentale kampioen.
Die Zimbabwiër sal in Nakathila egter met 'n ander tipe vegter te doen kry as in sy laaste geveg by die Ramatex-saal. Nakathila is taaier as 'n ratel. Benewens uitstekende voetwerk beskik hy oor die handspoed van 'n mamba en die slaankrag van 'n muilskop in sy vuiste.
SEGE SAL HOM HOëR PLAAS
Dit is geen wonder dat die 29-jarige Low Key veertien van sy teenstanders (73 persent) vroegtydig harpuis laat ruik het nie. Hoewel hy 'n rapsie meer as ses jaar gelede sy buiging as geldvegter gemaak het, is die Namibiër stadig maar seker op sy pad na die eerste posisie op die WBO-wêreldranglys.
Met sy voete stewig op moeder aarde geplant, is Nakathila se visier op die WBO-wêreldkroon ingestel wat hy dalk binnekort die handskoene voor kan aantrek. Jamel Herring plaas Saterdag sy WBO-superveergewigwêreldtitel teen sy mede-Amerikaner Lamont Roach (tweede op WBO-wêreldranglys) op die spel.
Een van die twee boksers gaan verloor, en dan sal Nakathila een posisie opskuif om as die tweede aanspraakmaker op die WBO-wêreldgordel veel meer seggenskap oor sy titelkanse te kry.
Nakathila vertel van sy voorbereiding vir sy geveg teen Pambeni oor 17 dae in die die hoofstad.
“Ek is topfiks en was soos altyd maar besig om in die gimnasium te werk, toe Nestor my die goeie nuus van die geveg teen Pambeni gebring het. Ek was verheug en dit het my selfvertroue 'n hupstoot gegee en ek het net nog harder gewerk.
“Dit gaan nie 'n maklike geveg wees nie, maar ek is soos altyd slaggereed om my teenstander met mening te pak. Ek is reg om Pambeni te klop. Ek het hom teen Danny Boy sien boks en hom goed bestudeer. Ek wil die jaar goed afsluit en my rekord skoon hou.
“Ek nooi geesdrigtiges om nie net vir my nie, maar ook al die ander boksers op 23 November te gaan ondersteun. Hoe meer mense daar is wat ons aanmoedig, hoe beter veg ons en hoe harder slaan ons!” het Nakathila entoesiasties gesê.
SOEK WRAAK
John Ekongo van die borg is positief oor die toekoms van boks in Namibië
“MTC is verbind tot die ontwikkeling en groei van boks in Namibië, om meer boksers vir wêreldtitels te kweek. Behalwe dat boks as beroep kos op die tafel sit, is dit ook 'n fantastiese dissipline wat sorg dat sy atlete as gedissiplineerse landsburgers tot Namibië se groei bydra. Nestor, jy moet sorg dat Low Key wen, want ek hou daarvan dat Pambeni Danny Boy se titel afgevat het nie,” het hy vertel.
Die junior liggewigafdeling (59 kg, 130 pond) word deur sommige beheerligame superveergewig genoem.- [email protected]
Kommentaar
Republikein
Geen kommentaar is op hierdie artikel gelaat nie