Lorriedrywers gaan langs roetes getoets word
Die vervoerbedryf maak ondanks uitdagings seker Namibiërs kan lewensmiddele in die hande kry.
Ronelle Rademeyer - Die Walvisbaai-Korridorgroep (WBCG) sal binnekort ses vaste klinieke langs die belangrike vragroetes hê waar lorriedrywers wat siek voel, vir Covid-19 getoets word.
Die groep het verder ook mobiele klinieke wat langs roetes diens doen.
Só het mnr. Hippy Tjivikua, uitvoerende hoof van dié groep, gisteroggend tydens die Covid-19-inligtingsessie gesê.
Hy het saam met mnre. Jonas Sheelongo, adjunk- uitvoerende direkteur van vervoer in die ministerie van werke en vervoer, en Leslie Mpofu, uitvoerende hoof van die Trans-Kalahari-Korridorgroep, aan die paneelbespreking oor vervoerkwessies deelgeneem.
Tjivukua sê WBCG het klinieke op Oshikango, Katima Mulilo, in Windhoek en op Walvisbaai waar gesondheids- en welstanddienslewering aan vragmotorbestuurders gebied word.
“Nou het ons die Covid-19-komponent bygevoeg, wat beteken hulle koors word hier gemeet en as hulle simptome toon, word hulle getoets,” het hy agterna aan Republikein verduidelik.
Hy sê soortgelyke klinieke op Otjiwarongo en Gobabis sal ook binnekort in gebruik wees. Volgens hom is die doel daarvan om die ministerie van gesondheid en maatskaplike dienste se hand te versterk terwyl die pandemie woed.
Sheelongo het benadruk vervoer speel 'n belangrike rol in hierdie moeilike tyd. Dit is waarom die Namibiese vervoerministerie gesprekke gevoer het met Suid-Afrika as vernaamste invoerland, asook die bestuur van beide hierdie korridorgroepe en die vervoerbedryf in die algemeen.
“Al is daar struikelblokke, moet vragte met noodsaaklike goedere kan deurkom.”
Tjivikua sê die eerste stappe wat by die hawe op Walvisbaai gedoen is, was om seker te maak daar is nie vertragings met die vervoer van vrag nie, en maatreëls wat die oordrag van die virus verhinder, word toegepas.
“Die interpretasie en toepassing van regulasies het aanvanklik probleme gegee, maar dit is al minder die geval,” het hy gesê met verwysing na vertragings by padblokkades.
Mpofu het daarop gewys dat vervoermaatskappye 'n beperkte aantal lorriedrywers het. “Ons sukkel om gekwalifiseerde mense te kry en in baie gevalle gebruik vervoerders buitelanders. Nou is sommige lorriedrywers ook nog in kwarantyn.”
Hy het ook verwys na die groot impak wat dit op lorriedrywers en hul gesinne het – sielkundig, maar ook die impak op huishoudelike sake.
Volgens Mpofu word vervoermaatskappye versoek om streng by die kwarantynprotokol te hou, al kos dit hulle geld. Die vervoerders betaal vir die kwarantynfasiliteite wat hul drywers gebruik.
Hy het die vervoermaatskappye en hul drywers bedank vir die opoffering wat hulle maak sodat Namibiërs noodsaaklike lewensmiddele kan koop.
- [email protected]
Die groep het verder ook mobiele klinieke wat langs roetes diens doen.
Só het mnr. Hippy Tjivikua, uitvoerende hoof van dié groep, gisteroggend tydens die Covid-19-inligtingsessie gesê.
Hy het saam met mnre. Jonas Sheelongo, adjunk- uitvoerende direkteur van vervoer in die ministerie van werke en vervoer, en Leslie Mpofu, uitvoerende hoof van die Trans-Kalahari-Korridorgroep, aan die paneelbespreking oor vervoerkwessies deelgeneem.
Tjivukua sê WBCG het klinieke op Oshikango, Katima Mulilo, in Windhoek en op Walvisbaai waar gesondheids- en welstanddienslewering aan vragmotorbestuurders gebied word.
“Nou het ons die Covid-19-komponent bygevoeg, wat beteken hulle koors word hier gemeet en as hulle simptome toon, word hulle getoets,” het hy agterna aan Republikein verduidelik.
Hy sê soortgelyke klinieke op Otjiwarongo en Gobabis sal ook binnekort in gebruik wees. Volgens hom is die doel daarvan om die ministerie van gesondheid en maatskaplike dienste se hand te versterk terwyl die pandemie woed.
Sheelongo het benadruk vervoer speel 'n belangrike rol in hierdie moeilike tyd. Dit is waarom die Namibiese vervoerministerie gesprekke gevoer het met Suid-Afrika as vernaamste invoerland, asook die bestuur van beide hierdie korridorgroepe en die vervoerbedryf in die algemeen.
“Al is daar struikelblokke, moet vragte met noodsaaklike goedere kan deurkom.”
Tjivikua sê die eerste stappe wat by die hawe op Walvisbaai gedoen is, was om seker te maak daar is nie vertragings met die vervoer van vrag nie, en maatreëls wat die oordrag van die virus verhinder, word toegepas.
“Die interpretasie en toepassing van regulasies het aanvanklik probleme gegee, maar dit is al minder die geval,” het hy gesê met verwysing na vertragings by padblokkades.
Mpofu het daarop gewys dat vervoermaatskappye 'n beperkte aantal lorriedrywers het. “Ons sukkel om gekwalifiseerde mense te kry en in baie gevalle gebruik vervoerders buitelanders. Nou is sommige lorriedrywers ook nog in kwarantyn.”
Hy het ook verwys na die groot impak wat dit op lorriedrywers en hul gesinne het – sielkundig, maar ook die impak op huishoudelike sake.
Volgens Mpofu word vervoermaatskappye versoek om streng by die kwarantynprotokol te hou, al kos dit hulle geld. Die vervoerders betaal vir die kwarantynfasiliteite wat hul drywers gebruik.
Hy het die vervoermaatskappye en hul drywers bedank vir die opoffering wat hulle maak sodat Namibiërs noodsaaklike lewensmiddele kan koop.
- [email protected]
Kommentaar
Republikein
Geen kommentaar is op hierdie artikel gelaat nie