Longontsteking en bakteriese siektes by skape

Vandeesmaand sit ons die gesprek voort oor die voorkomende behandeling van skape deur middel van inenting. In hierdie en die volgende uitgawe wil ek fokus op die algemeenste siektes by skape waarteen boere moet inent.LongonstekingDit word veroorsaak deur virusse en bakterieë wat gewoonlik in die asemhalingsbane van diere voorkom en met ongunstige omgewingstoestande na die longe versprei en weens Mannheimia haemolytica, ontsteking veroorsaak. In baie gevalle is die diere sub-klinies aangetas en word net verlaagde voerinname en trae groei gesien, met letsels van vashegting van die longe aan die borskas tydens slagting. So ’n dier wat vir ’n tyd net beperkte longfunksie gehad het, is ook meer vatbaar vir herhalende siektevoorkoms. Met die siekte kan ook per-akute vrektes by veral lammers en jong diere gesien word sonder dat enige siektesimptome sigbaar was. Gewoonlik is daar reeds erge verliese gelei voordat die reaksie op enting drie weke later verkry word. Van die faktore wat die voorkoms van longonsteking verhoog, is:• Voedingstekorte soos vitamien A, selenium (Se) en koper (Cu);• Swak bieskwaliteit en inname;• Stres tydens hantering en die vervoer van diere;• Swak ventilasie tydens die aanwesigheid van stof en amoniak;• Oorbevolking en samedromming;• Temperatuurskommelings; asook• Swak of geen inentingsprotokol.Klostridiale siektesDie klostridia-groep van bakterieë is ’n baie groot groep van organismes wat verskillende siektetoestande veroorsaak afhangende van die toksiene (gifstowwe) wat dit produseer. Dit word verdeel in die sponssiektegroep wat die spiere aantas, die dermgroep en die groep wat die senuweestelsel aantas. 1. Sponssiektegroep:Die sindroom bekend as sponssiekte is ’n gangreneuse infeksie van die spiere wat veroorsaak word deur verskeie Clostridium-spesies, maar hoofsaaklik deur die Clostridium chauvoei-bakterie wat die vel indring waar skeer-, kastrasie- en stertamputasie-wonde is. Die skape ontwikkel koors, mankheid, gasopeenhoping in die spiere en vrek dan.Dikkop ontstaan as gevolg van Clostridium novyi wat die vel binnedring, veral ná wonde soos wanneer ramme baklei en wat lei tot geweldige swellings van die koparea.Baarmoeder-sponssiekte word gesien met ’n moeilike lamproses of met die geboorte van meerlinge waar besmetting van Clostridium septicum plaasvind en word uitgeken deur ’n blou verkleuring en swelling van die vulva en boudnaat. Die diere vrek gewoonlik baie vinnig.Braxy is ’n toestand van besmetting van Clostridium septicum van die melkpens nadat die skaap baie koue water of gevriesde voer gevreet het. Die spiere van die melkpens word so beskadig dat bakterie die weefsel binnedring.2. Dermgroep:Die siekte bekend as rooiderm word geassosieer met weidings wat hoog is in proteïen soos lusern en klawer en veral in die afwesigheid van droë ruvoer. Die veroorsakende organisme is Clostridium perfringens A en lei tot vinnige vrektes met die dunderm wat gevul is met bloed. Die organisme kan ook vinnige wondinfeksies veroorsaak.Bloedpens kom gelokaliseerd voor en word veroorsaak deur Clostridium perfringens B by lammers binne eerste week ná geboorte met buikpyn, bloederige diarree en vinnige vrektes.Bloednier is seker een van mees bekende klostridiale siektes bekend onder skaapboere. Die diere vrek binne ’n paar dae na ’n voedingsverandering of dosering. Die skape vrek baie vining en ’n vinnige ontbinding van die karkas is kenmerkend.3. Senuweegroep:Klem-in-die-kaak word veroorsaak deur Clostridium tetani wat gewoonlik diep of suurstofarme wonde besmet soos gesien met die steekwond van ’n spyker in die klou of met wonde soos stertamputasie en kastrasies deur middel van rekkies. Die bakterie produseer ’n baie sterk gifstof (toksien) wat die senuweestelsel aantas en die diere vrek as gevolg van ’n verlamming van die asemhalingstelsel.Lamsiekte word deur die toksien van die bakterie Clostridium botulinum veroorsaak. Die siekte kan ontstaan as diere aan ou bene of skilpaddoppe vreet, of deur voer wat besmet was met dooie voëls of rotte. Simptome van verlamming van die tong, kakebeen, slukderm en bene word binne 2-3 dae ná inname van die toksien gesien. Met verloop van tyd begin die diere styf word met beperkte beweging en gevolglike vrekte weens verlamming van die asemhalingspiere.

Longontsteking en bakteriese siektes by skape

Kommentaar

Republikein 2025-05-21

Meld asseblief aan om kommentaar te lewer

Longontsteking en bakteriese siektes by skape

Kommentaar

Republikein 2025-05-21

Meld asseblief aan om kommentaar te lewer

MELD AAN

Advertensie