Lodge-moordenaar skuldig bevind

Jacqueline Louw - Regter Christie Liebenberg het gister die man wat daarvan aangekla is dat hy die bestuurder van 'n lodge in die Outjo-omgewing vermoor het, skuldig bevind.Die vermoorde Fiona Ann Holton se jongste suster, me. Jenny Wilson, was gister in die hof om na die uitspraak te luister in die verhoor van die 40-jarige Jesaya Nikanor wat aangekla is van drie klagte in verband met die moord op Holton. Wilson, wat in Suid-Afrika woon, het gesê sy het na Namibië gereis vir die hofsaak om teenwoordig te wees “om geregtigheid te sien geskied”.Nikanor het tereg gestaan op klagte van moord, huisbraak met die doel om artikel 2(1)(a) van die Wet op die Bekamping van Verkragting te oortree asook verkragting, en die verydeling en/of belemmering van die regsproses. Hy het onskuldig op al die klagte gepleit.Holton is op 21 September 2008 dood in haar huis gevind by 'n lodge tussen Outjo en die Etosha Nasionale Park geleë.Volgens die staat se saak teen Nikanor het hy en nog ’n werknemer ’n lugverkoeler op 18 en 19 September 2008 in Holton se huis geïnstalleer. Holton is gedurende die aand van 20 September 2008 of die vroeë oggendure van die volgende dag verkrag en met ’n voorwerp teen haar kop geslaan en verwurg. Sy het op die toneel aan haar beserings gesterf. Sy is laat die middag van 21 September deur kollegas gevind toe hulle ondersoek ingestel omdat sy nie vir diens by die lodge opgedaag het nie.Liebenberg het Nikanor skuldig bevind op die klagte van moord en verkragting. In sy uitspraak het Liebenberg gesê dat daar nie genoegsame getuienis is om bo enige redelike twyfel te bewys dat Nikanor by die huis ingebreek het nie. Daar was ook nie genoegsame getuienis om Nikanor skuldig te bevind op die klag van dwarsboming van die gereg nie. Na die skuldigbevinding is Nikanor se borgtog gekanselleer en hy is onmiddellik na die verhoor in hegtenis geneem vir aanhouding in die Windhoek gevangenis.Nikanor se getuienis tydens die verhoor was deurentyd strydig met dié van ander getuies. Hy het getuig hy het ’n mes van Holton se huishulp geleen om sy potlood skerp te maak en dit weer teruggegee, alhoewel die huishulp dit weerspreek het. Die mes is na die moord in twee stukke buite die huis aangetref.Hy het ook nog voordat die moord op Holton ontdek is, aan twee mense vertel dat ’n wit vrou gedurende die nag van 20 September verkrag en vermoor is.DNA-toetse wat op die oorledene en die beskuldigde gedoen is, was deurslaggewend om Nikanor met die verkragting en die moord te verbind. Daarbenewens het bloedspatsels wat op die beskuldigde se broek gevind is, geblyk dié van die oorledene te wees. DNA-toetse is deur die Nasionale Instituut vir Forensiese Wetenskap van Namibië (NFSI) en forensiese laboratoria van die British Colombia Institute of Technology (BCIT) in Kanada gedoen. Die regter was tevrede dat die wetenskaplike bevindings die beskuldigde met beide die verkragting en die moord verbind het. Nikanor se verweer was dat die DNA-toetse deurmekaar geraak het en hy sodoende geïmpliseer is.Regter Liebenberg sal vandag argumente ter versagting en verswaring van die vonnis aanhoor. Advokaat Filistas Shikerete-Vendura tree namens die staat op en die verdediging is deur mnr. Mese Tjituri behartig.

Lodge-moordenaar skuldig bevind

Kommentaar

Republikein 2026-08-03

Meld asseblief aan om kommentaar te lewer

Lodge-moordenaar skuldig bevind

Kommentaar

Republikein 2026-08-03

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.