Lodge-eienaars werp alles in stryd

Tanja Bause - Die eienaars van die Caprivi Mutoya Lodge & Campsite, mnr. Zane en me. Zina Swanepoel, het besluit om alles in die stryd te werp om nie die lodge, wat hulle die laaste vyf jaar opgebou het, te sluit nie.Hulle het ook nog niemand afgedank nie. Dit is grotendeels moontlik gemaak omdat hulle ’n kwarantynfasiliteit is. “Die geleentheid om ’n kwarantynfasiliteit te word, is ’n geskenk van bo ondanks die feit dat daar groot stigma daaraan verbonde is, aangesien ons ‘Covid-mense’ huisves. Dit help vir nou om ons deure oop te hou,” het Zane gesê. Die lodge is sowat 30 kilometer buite Katima Mulilo teen die Zambezirivier geleë.“Die gesondheidskantoor van dié streek het ons aan die begin van Julie genader om Covid-19-mense te huisves. Volgens hulle is ons ’n veilig plek met minimale risiko vir die inwoners van Katima Mulilo omdat ons buite die dorp geleë is. Hulle het gevoel ons het die regte fasiliteite vir mense wat bereid is om meer vir hul kwarantyn-akkommodasie te betaal. Ons het ons eerste kwarantyngaste op 3 Julie ontvang,” het Zane gesê. Tans is daar 12 gaste by die lodge, maar die getal wissel gedurig en is hoofsaaklik Namibiërs wat terug in die land gekom het. “Die onsekerheid van die pandemie en die onvermoë om vooruit te beplan, het beteken dat ons buigsaam moes wees toe die ministerie van gesondheid en maatskaplike dienste ons genader het. Ons het op die nippertjie besluit om hulle met die plasing van kwarantynmense te help,” het hy gesê. Volgens hom het die ministerie ingestem dat die mense nie tot hulle kamers beperk hoef te wees nie en mag hulle op die lodgegronde rondbeweeg. Hulle mag ook gebruik maak van die internetfasiliteite buitekant die hoofkantoor. “Ons maak seker maskers word te alle tye gedra en sosiale afstand word gehandhaaf. Alle maaltye word in die kamers in wegneemhouers bedien. Die houers word eers in plastieksakke gesit voordat dit weggegooi word. Al die gaste moet ook hul eie kamers skoonmaak om te voorkom dat ons werkers die kamers moet binnegaan. Die beddegoed word weekliks in wasmasjiene met warm water gewas.”Volgens Zane is die enigste nadeel dat hulle nou en dan iemand moet wegwys wat by die lodge wil oornag. “Maar op die tydstip het die kwarantyngaste die noodsaaklikheid dat ons vir besoekers oop moet wees, ongedaan gemaak.”“Ons almal hier by en van die lodge stem saam dat met die volume van toetse wat die kwarantyngaste kry voor en na hulle by ons was, is ons die veiligste lodge in die streek. Ons weet wat die status van al ons gaste is. Ons werkers word veilig gehou met die ondersteuning van die gesondheidsministerie en dit sal ook in die toekoms die geval wees. Hierdie inisiatief het ons beslis gehelp om 'n kontantvloei te handhaaf wat beteken het dit was nie nodig om mense af te dank nie. Die enigste probleem is dat ons nie weet hoe lank hierdie pandemie en die gepaardgaande regulasies sal voortduur nie. Beplanning is amper onmoontlik, maar ons doen wat ons kan om ons deure oop te hou en ons mense in diens te hou.” - tanja@republikein.com.na

Lodge-eienaars werp alles in stryd

Kommentaar

Republikein 2025-06-19

Meld asseblief aan om kommentaar te lewer

Lodge-eienaars werp alles in stryd

Kommentaar

Republikein 2025-06-19

Meld asseblief aan om kommentaar te lewer

MELD AAN

Advertensie