Twee vas oor olifanttande

Volgens die weeklikse wildmisdaadverslag vanaf 29 Junie tot 6 Julie is twee nuwe wildmisdaadsake aanhangig gemaak en vier verdagtes in hegtenis geneem.

Mnre. Alfred Renatius Haipos Langendorf en Gotrieb Ndikwetepo Shishitwomunhu is op 30 Junie glo met twee olifanttande in hul besit in Windhoek in hegtenis geneem. Die polisie het ook beslag op 'n voertuig gelê.

Op Khorixas is me. Esna !Haradoes in hegtenis geneem nadat 'n ietermagô- en sebravel glo in haar besit gevind is.

Mnr. Frederick Anthony Mapanka is Sondag in verband met 'n ou renosterstroperysaak in hegtenis geneem.

Twee Namibiese mans het verlede Dinsdag op Kamanjab 'n boete van N$2 000 elk betaal omdat twee kameelperdkarkasse sonder die nodige permitte vervoer het.

Hubertus Alfried Kreiner en Daniel Stephanus Malan is volgens die Namibiese polisie se wildmisdaadverslag op 23 Mei in hegtenis geneem.


Volgens Kreiner is die kameelperde nie onwettig gejag nie, maar die agterkant van die permit was nie volledig ingevul nie.

"Malan het die kameelperde wettig met die nodige jagpermitte op my plaas gejag, maar die agterkante van die permit om die vleis te vervoer, was nie volledig ingevul nie," het Kreiner vandag aan Republikein verduidelik.