Liewe Gerda, onthou jy “Wat Meisies Wil Weet”?

Liewe Gerda, het julle ook hooikoors in Amerika? Ek het lanklaas geskryf, want dit is vakansie en Klaradyn het dan altyd ekstra klasse by die sjarmeskool. Marnus ook, dié ruil mos so die letters en syfers om. Disleksie sê die onderwysers, maar sy pa sê dis net pure luigeit. Elk geval, dis 'n oulike vrou wat die skool het, miskien ken jy haar?Sy kom mos van Tsumeb af en was glo op haar dae Mielie-koningin en Mej. Flamboyant. Die Flamboyant-bome is mos so pragtig daar, Otjiwarongo het ook, onthou jy? Klaradyn is maar moeilik met die ekstra klasse in die skoolvakansie. Nukke en gatgrille sê haar pa. Dié bekommer hom nou al oor die dag wanneer daar rooi hakskene is en die outjies begin kuier. Klomp planne hoe hy die mannetjies gaan kortvat en verduidelik van sy shotgun in die kluis in die kamer, en dít nog voor hulle by die voordeur is. Hoe oud was Charlize toe jy haar van seks en so aan vertel het? Ek het vir Klaradyn my Wat Meisies Wil Weet van dr. Jan van Elfen gegee. Mál oor dr. Jan, hy én Murray Jansen, onthou jy hy het altyd so mooi raad gegee in Huisgenoot? Ek het die versameling van dr. Jan se plate oor die boek ook. Alles word ordentlik en stigtelik verduidelik. Klaradyn trek haar neus op vir tapes en plate, ken net iPods en CD's. 'n Juffrou het in die laerskool vir ons die maandstondeplate gespeel en die ouers was vreeslik ontstoke, sy moes voor die skoolkomitee verskyn en vir ons almal om verskoning vra. Het ek jou al daarvan vertel?Het jy by CNA die vieslike boeke gesien wat hulle nou vir die kinders oor seks en maandstondes en sulke goed wil laat lees? Sies, sê ek. My in 'n floute geval toe ek een oopslaan vir deurblaai en kyk of Klaradyn darem sal verstaan en so aan. Kyk toe in die vark se oog, soos haar pa sal sê. Pornografie, sê ék. Sekere goed is vir 'n mens se binnekamer en om dit nou so te wil staan en adverteer. Gepraat van pornografie, Marnus was vir 'n maand gehok oor prentjies wat hy op sy selfoon gehad het. Ons gesin is deur diep waters, Gerda. Sy pa is immers 'n ouderling en ek staan my plek by elke biduur en basaar vol. Sy pa moes mooi vra dat Marnus nie uit die katkisasieklas gegooi word nie, jy weet, so kort voordat hy ook kan begin nagmaal gebruik.Ek is meer bekommerd oor hoe ons hom deur matriek gaan kry. Marnus sê 'n sanger het nie nodig om matriek te hê nie, hy hoef nie note te kan lees nie, hy moet net by die back tracks kan hou. Sy CD-verkopery sukkel maar. Het jy al geluister na die een wat ek vir jou gestuur het? Marnus sê dis omdat hy te deftig so met sy cumberband op die cover is, die mense kan nie met hom relate nie. Hy gaan nou sy naam verander na “Troebadoer” en wil dan nuwe foto's laat neem.'n Stiefma mag seker nou nie so kla oor 'n ander vrou se broeisel nie, maar ons twee gesels mos maar net. Sy pa sê hy sal maar soos sy oupa op die spoorweë moet gaan werk ná matriek. Dié deuntjie het nou weer verander, want by ons is dit mos TransNamib en ek kan vir jou sê dit gaan maar beroerd daar. Só beroerd sê sy pa, al die spore is een van die dae onder die treine uitgesteel. Ek moet vir Klaradyn by die sjarmeskool gaan haal, jy moet by jou poskantoor uitvind hoekom kom jou briewe nie by my uit nie. GroeteKlaradyn se ma

Liewe Gerda, onthou jy “Wat Meisies Wil Weet”?

Kommentaar

Republikein 2025-06-19

Meld asseblief aan om kommentaar te lewer

Liewe Gerda, onthou jy “Wat Meisies Wil Weet”?

Kommentaar

Republikein 2025-06-19

Meld asseblief aan om kommentaar te lewer

MELD AAN

Advertensie