Liewe Gerda, ken jy ons eie Bles?

Henriette Lamprecht - Dis Klaradyn se ma hier. Eers wil ek laat weet hoe lekker dit nou hier by ons en op Otjiwarongo reën.

Ons het gaan kyk orals waar die riviere loop. Jy loop mos hier ook dié raak wat Windhoek vir 'n wyle vir die bosse verruil.

Soos Paasnaweek en Desember op Swakopmund tussen Woermann Brock se rakke. Is mos makliker om te vlug en agter 'n rak vol No Name Brand-souse en -soppe in te duik as om geselsies uit ordentlikheid aan te knoop.

Het julle op Otjiwarongo ook in die poele en plasse langs die pad geswem as dit gereën het? Net met 'n panty of kaalboude waar die kar stop? Ma en Pa het hul opvoustoele oopgevou en gesit waar ons geswem het.

Pa het vir hulle koffie uit die thermos gegooi, lekker soet, sterk koffie met Cremora, en Ma het toebroodjies uit die roomysbak gehaal en ons geroep om te kom eet.

Witbrood met fyn biltong. Bêre jy ook roomys- en margarienbakke vir oorskiet- en padkos? Onthou jy die Tupperware-partytjies wat altyd so 'n groot gedoente was? Vandag is dit ook al 'n plaas se prys . . . hou jy en Charlize ook Tupperware-partytjies?

Dis darem 'n ekstra inkomste vir jou so in jou goue jare, 'n mens kan nie altyd jou kind in die oë moet staar vir 'n geldjie nie, al sien ek Huisgenoot sê Charlize sê jy help haar kinders grootmaak.

Ook in Huisgenoot gelees daar is nou ander partytjies ook wat deesdae vreeslik gewild is daar by julle, jy weet, vir “grootmens-speelgoed”. Ek sê sies, dis darem immers maar 'n private ding wat eerder in jou binnekamer onder jou onderklere in die laai hoort, nie sommer so oop en bloot voor ander mense in jou sitkamer nie!

Hoekom ek eintlik skryf, is oor ek raad soek oor my man se seun wat so mooi sing. Pure Bles, onthou jy hoe lekker ons gelangarm het op “Ruiter van die Windjie”, ai tog, daai tril in sy stem!

Elk geval, Marnus, dis nou Klaradyn se stiefboetie, het hier aan ons plaaslike Idols by die kerkbasaar deelgeneem, maar dis nou glad nie so goed en groot soos julle American Idols nie.

En tussen my en jou, weet die judges maar ook nie veel van talent af nie.

Ek meen, hier is Marnus nou voor hulle en hy sing “Ek reik na die Sterre” soos Bles maar net kon droom om dit te doen, en die koster se vrou beduie net so met haar duim langs 'n streep oor haar keel die heeltyd.

Marnus en ons dog toe dis oor sy dalk wil hoes so middel in die liedjie, maar toe Marnus se back-up tape skielik stil is, toe moet ons hoor dis oordat sy wil hê hy moet stilbly. Verbeel jou.

Arme Marnus was gebroke en het eers oorweeg om sy repertoire te verander, iets meer jongerig. Maar sy pa sê dis nonsens, wat weet die vrou immers van talent, haar koek waaroor sy so spog, het nog nooit iets op enige VLV-kongres gewen nie, Marnus moet aanhou sing.

Marnus het nou 'n CD in sy vriend Kobus se garage gemaak met al sy Bles en Country-liedjies. Van dié CD is nóg 'n klomp CD's gemaak en ons het 'n mooi foto van Marnus geneem in sy maroen kamarband en wit valletjieshemp - en dis die CD se omslag.

Marnus se pa het gereël met Woermann Brock se bestuurder dat hy Saterdae voor die winkel mag sing en sy CD's hier kan verkoop.

Dit het maar broekskeur gegaan die eerste paar keer met die booster se lead wat aanmekaar die krag ge-trip het en die vrieskaste laat ontdooi het, maar nou gaan dit elke Saterdag beter.

Marnus het al twee CD's verkoop en dié wat nie koop nie, gee sommer vir hom die car guard se geld.

Ek weet Charlize sing nie eintlik nie, maar as sy of jy kan help met 'n nommer of posbus van iemand soos Simon Cowell vir wie ons Marnus se CD kan aanstuur, sal ek bly wees.

Groete aan Charlize en die kleinkinders.

PS: Die droëwors is op, maar ek stuur bietjie fyn biltong.

Klaradyn se ma