Libanees in Namibië rou oor geliefde Beiroet

Ronelle Rademeyer – Was dit nie vir ’n reis na Khartoum sowat 60 km suid van Beiroet vir die viering van die Moslem-fees Eid-oel-Adha nie, was die moeder en twee susters van ’n Libanese sakeman in Namibië dalk ook slagoffers van die vernietigende ontploffing Dinsdagaand in die Libanese hoofstad.Hoewel hy al nagenoeg 30 jaar in Namibië woon en met ‘n Namibiër getroud is, is Libanon steeds sy tuiste en Beiroet sy hartstad.Dié 55-jarige sakeman, wat verkies om nie sy naam te noem nie, sê hy is sowat drie minute nadat die ontploffing plaasvind het deur ’n vriend daaroor ingelig.“My vriend by die Libanese ambassade in Pretoria het my gebel. Ons was as jong mans saam in die Libanese weermag,” het hy gister aan Republikein vertel.Hy sê hulle familiewoning is “baie naby” aan die hawe waar meer as 2 700 ton ammoniumnitraat wat in ’n pakstoor geberg was, aan die brand geraak en ontplof het.“My pa is verlede jaar dood en my ma en twee susters het vir Eid-oel-Adha na Khartoum gegaan om blomme op sy graf te plaas.” Hy sê dit is tradisie om tydens Eid-oel-Adha, wat van Donderdag tot Maandag gevier is, die grafte van ontslape geliefdes te besoek.Minstens 135 mense is dood en meer as 5 000 mense is beseer in dié kragtige ontploffing waarvan die supersoniese skokgolwe skade aan nagenoeg 50% van die geboue in die stad aangerig het. Ruite en deure is uit geboue geruk en balkonne het na benede getuimel. Sowat 250 000 inwoners is dakloos gelaat nadat hulle huise erg beskadig is.Die Libanese sakeman sê groot skade is ook aan hul familiewoning aangerig.Hy sê dit gaan die inwoners van Beiroet jare neem om die stad te herbou en weer op die been te kom.Volgens hom is dit tans baie moeilik vir Libanese in die buiteland om hulle families in Beiroet te kontak. “Ons het die afgelope dae baie gesukkel om WhatsApp-oproepe daarheen te maak.”Hy sê in teenstelling met die sowat ses miljoen mense in Libanon, woon daar nagenoeg 25 miljoen Libanese elders in die wêreld. Hulle kommer oor die veiligheid van geliefdes in Beiroet het internetverkeer na dié land skerp verhoog.Intussen berig Reuters Libanon se pres. Michel Aoun het gesê die ammoniumnitraat, wat in kunsmisstowwe en bomme gebruik word, is ses jaar in die hawe gestoor sonder veiligheidsmaatreëls nadat in 2014 daarop beslag gelê is. Dit is op ’n Russiese vragskip gekonfiskeer.Hy het in ’n nasionale toespraak gesê die regering is “vasbeslote om die voorval te ondersoek en uit te vind wat presies gebeur het, en om die verantwoordelikes en diegene wat nalatig was te ontbloot en aanspreeklik te hou”.Die kabinet het ’n noodtoestand van twee weke in Beiroet afgekondig.Familielede het gister nog by die afgesperde deel by die hawe saamgedrom om inligting te probeer kry oor die tientalle mense wat nog vermis word.Baie van die mense wat dood is, het by die hawe of in die omgewing gewerk. - ronelle@republikein.com.na

Libanees in Namibië rou oor geliefde Beiroet

Kommentaar

Republikein 2025-12-18

Meld asseblief aan om kommentaar te lewer

Libanees in Namibië rou oor geliefde Beiroet

Kommentaar

Republikein 2025-12-18

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.