Legende van 1980’s opgeveil

Marnus Hattingh - Noem hom maar die Bakkies Botha van die tydrenpaaie. Ja, Audi se Sport Quattro was ’n legende – op en weg van die grondpaaie. By die Concorso d’Eleganza, aan die oewer van Italië se pragtige Como-meer net noord van Milaan, gaan ’n ryding vandeesweek onder die hamer kom waarmee etlike Suid-Afrikaners en Namibiërs hulle kan vereenselwig.
Dié wit stompstertvuurwa met die tipiese 1980’s-voorkoms is ’n Audi Sport Quattro, die meganiese nefie van die oorspronklike Audi Quattro waarmee Audi oorsee – en Sarel van der Merwe – so baie tydrensukses behaal het. Daardie Quattro van 1981 was die eerste produksie-tydrenmotor wat vierwielaandrywing so suksesvol kon bemeester. Sarel – en die ander renjaers oorsee – het letterlik weggery vir hul mededingers.
Die Quattro-vastrapstelsel het die lang tweedeur-Audi gehelp om vinniger om die grondpaddraaie te seil en sodoende meer spoed in elke draai te neem. Namate die regulasies van die destydse Wêreldtydrenreeks aangepas is, het Audi veranderings aan sy pryswennende motor aangebring.
Teen 1985, toe die nou berugte Groep B-motors in die Wêreldtydrenreeks meegeding het, was die voorste motors kompakte rygoed met permanente vierwielvastrap en ongelooflike krag.
Kortom, dit was soos F1-renmotors wat op grondpaaie losgelaat is – in ’n era toe toeskouerbeheer by renne ’n nagedagte was.
Die kombinasie van oordonderende krag, ligte bakwerk en puik vastrap het gemaak dat die motors vuurpyle op wiele geraak het. En ’n handvol vir die renjaers agter die stuur. Gekombineer met die afwesigheid van toeskouerbeheer waar entoesiaste tot teen die renroete kon staan, was dit nie te lank nie of ’n paar dramatiese noodlottige ongelukke het voorgekom.
Teen 1987 is die finale streep onder Groep B-motors getrek en is strenger en beperkender reëls vir die voertuie ingestel. ’n Gawe meevaller van hierdie troebel hoofstuk in die motorrengeskiedenis is dat die FIA destyds bepaal het dat ’n vervaardiger minstens 200 produksieweergawes van sy renmotor moet bou voordat hy so ’n produk vir die tydrenne kan inskryf.
Audi het aan hierdie vereiste voldoen met onder meer sy kort fris Sport Quattro. Maar net 164 eenhede is aan die publiek verkoop. Die res is vir promosies en toetse ingespan. Dit is een van hierdie 164 Sport Quattro’s wat vandeesweek by die Concorso d’Eleganza opgeveil sal word.
Sy renmotorherkoms en die lae produksiegetal maak hom ’n gesogte rariteit. Die afslaer verwag ’n stewige R4,5 miljoen tot R5 miljoen vir die wit vuurwa.
Die Sport Quattro het ’n 2.1 liter-turbo onder die neus gehad, met vyf silinders in gelid gepak. Ja, dit is dieselfde basiese enjin as dié wat jy in jou gewone Audi 100 destyds hier kon kry, net met ’n bietjie woema toegedien.
In sy rengedaante het die Sport Quattro eksotiese materiale soos Kevlar vir die bakwerk en aluminium vir die enjinblok gehad, om hom so lig moontlik te kry.
En dan daardie vierwielvastrap wat Stig Blomquist in 1985 in staat gestel het om dwars-dwars sy pad na vyf seges in die kampioenskapsreeks en die titel oop te jaag. Dus, as jy ’n foon en ’n los miljoen of vyf het, maak ’n merkie by die 27ste op die kalender. Daar is ’n skaars Audi wat jou roep. - Netwerk24