Leerlinge, gevangenes toets positief vir Covid-19

Vyftien leerlinge, 14 van die gekombineerde skool Okaukuejo en een van die sekondêre skool Iipumbu het positief vir Covid-19 getoets. Dertien gevalle op Rehoboth is kontakte van bevestigde gevalle. Tien gevangenes in die aanhoudingselle op Rundu en kontakte van bevestigde gevalle het ook positief getoets.

Vandag is 77 nuwe gevalle aangemeld waarvan 24 in Windhoek, 16 in Oshakati, 13 in Rehoboth, tien in Rundu, drie in Swakopmund, twee in Walvisbaai, een elk in onderskeidelik Usakos en Omaruru, ses in Lüderitz en een in Gobabis was. Uit die 77 gevalle is 42 mans en 35 vroue. Die ouderdomme wissel van ses maande tot 66 jaar oud.

Nog 224 mense het herstel wat die totaal op 12 467 te staan bring. Dit sluit 219 in Khomas, drie in Omahake en een elk in onderskeidelik Ohangwena en //Kharas in.

Die aktiewe gevalle staan tans op 842 waarvan ses in 'n baie ernstige of kritieke toestand is. Dit sluit een baie ernstige en vier kritieke gevalle in Khomas en een baie ernstige geval in Oshana in.

Tot op hede is 140 422 weefselmonsters getoets, die Covid-19-verwante sterftesyfer staan op 138, tans word 2 462 kontakte gemonitor en 308 mense is in kwarantyn.