Lee sien nie kans vir VSA, ondanks geen kwarantyn

Ofskoon Amerika die reël geskrap het dat gholfspelers van die buiteland met hul aankoms ’n verpligte 14 dae in kwarantyn moet deurbring, is die voormalige nr. 1-speler Lee Westwood van Engeland nie te gretig om ’n vlug na die VSA te haal nie.
Die Amerikaanse federale regering het Vrydag bekend gemaak dat gholfspelers kan kom en gaan soos hulle wil, aangesien die PGA-reeks verskeie gesondheids- en veiligheidsprotokolle ingestel het waarvolgens spelers gereeld vir die koronavirus getoets sal word.
Dit beteken oorsese spelers kan met ’n geruste hart na die VSA vir die eerste Major van die jaar, die Amerikaanse PGA, wat op 6 Augustus in San Francisco beslis word, asook aanstaande week se WGC-FedEx St. Jude Invitational in Tennessee vlieg.
Maar selfs die vooruitsig om in die Major te speel dien nie as genoeg van ’n trekpleister vir Westwood nie. Sy vrese oor hoe Amerika die Covid-19-pandemie hanteer, weeg swaarder.
Hy het die naweek erken dat hy nie gemaklik is daarmee om die vlug na Amerika toe te haal nie.
“Ek is steeds bekommerd dat Amerika nie die gevare van die virus so ernstig soos die res van die wêreld opneem nie.
“Amerika is steeds vir my een van die gevaarlikste plekke om te besoek as gevolg van die voortdurende styging in aantal mense wat die virus opdoen.”
Die 34-jarige Westwood sê sy siektetoestand maak dit boonop uiters riskant om kanse met die dodelik virus te waag.
“Ek het ’n ligte vorm van asma. As ek positief toets in Amerika, moet ek twee weke daar bly. In hierdie stadium is daar net te veel gevaarligte en te min waarborge.”
Volgens die jongste statistieke van die Johns Hopkins Universiteit het Amerika die meeste Covid-19-gevalle ter wêreld (4,17 miljoen) en ook die hoogste sterftesyfer weens die virus (meer as 146 000). – TeamTalk