Lanzerac lig sluier oor sy eienaar

Nellie Brand-Jonker - Ná vier maande het die wynlandgoed Lanzerac uiteindelik die sluier gelig oor wie nou eintlik sy eienaar is. Die landgoed het nou bevestig sy eienaar is Pavillion Capital Investments Beperk. Dié maatskappy word deur Malcolm King (74) besit. King is ’n Britse burger en sy woonadres word op dokumente van die maatskappy as 9 La Rocque, Mont de La Rocque, St. Brelade, Jersey, aangedui.Lanzerac wou tot onlangs nog geen vrae beantwoord oor wie sy eienaar is nie.Netwerk24 het begin Februarie berig daar hang vrae oor wie die eienaar van die bekende Lanzerac op Stellenbosch is.Talle mense op Stellenbosch het die indruk gehad dit behoort aan die maatskappy Steinhoff en sommige het selfs gedink dit behoort aan Markus Jooste, voormalige uitvoerende hoof van die maatskappy.Lanzerac Estate Investments se geregistreerde adres word aangedui as die 2de vloer, Avon Place, Quantumstraat 15, Technopark, Stellenbosch, wat dieselfde adres is as Jooste se beleggingsvoertuig Mayfair Speculators.Jooste se skoonseun Stefan Potgieter was vanaf 2013 tot onlangs ’n direkteur van Lanzerac.Die bekende wynrubriekskrywer Neil Pendock het vier jaar gelede in ’n rubriek na Jooste as die eienaar van Lanzerac verwys. Nog ’n bekende rubriekskrywer in die wynbedryf het gesê: “Almal weet dis ’n Steinhoff-show . . . Dis ’n Steinhoff-Jooste-affêre . . .”Jooste se swaer was ook tot ’n paar jaar gelede by die bestuur van Lanzerac betrokke.Steinhoff het egter in Februarie ontken hy besit Lanzerac.Die verwarring kon dalk ontstaan het omdat Steinhoff Properties wel vir Lanzerac van Julie 2012 tot Maart 2013 bestuur het.Lanzerac het tot in 2012 aan Christo Wiese behoort, wat tot Desember die grootste aandeelhouer in Steinhoff was. Hy het in 2012 aan Die Burger gesê hy het die wynlandgoed aan ’n “buitelandse koper verkoop”.Wiese het egter einde Januarie vanjaar in die parlement op ’n gesamentlike sitting van drie staande komitees oor die gebeure by Steinhoff spesifiek na Lanzerac verwys toe hy verduidelik het hoe hy ’n aandeelhouer van Steinhoff geword het.“In 2011 het ek ’n eiendom in Stellenbosch, Lanzerac, verkoop en ’n aandeleblok wat ek toe in PSG gehou het, aan die Steinhoff-groep verkoop en só ’n aandeelhouer (in Steinhoff) geword . . .” het Wiese gesê.Hy het toe by navraag verduidelik dat hy nie bedoel het hy het die plaas aan Steinhoff verkoop nie. Hy het wel gesê hy het die plaas en sy PSG-aandele vir Steinhoff-aandele verruil.Volgens hom het hy die landgoed, wat hy twee dekades lank besit het, in 2012 aan die maatskappy Morpheus verkoop. Morpheus het sy aandele in Steinhoff gebruik om vir die landgoed te betaal. Lanzerac Estate Investments se naam was voorheen Morpheus.Malcolm King staan bekend as ’n sakekennis van Jooste.Malcolm en Paula King (46) is, nadat Potgieter bedank het, die enigste direkteure van Lanzerac Estate Investments.Pavillion Capital Investments het onlangs opgeduik in hofdokumente oor ’n reëlingskema van Jooste se beleggingsvoertuie Mayfair Speculators en Mayfair Holdings. Daarin word getoon Pavillion is ’n skuldeiser van Mayfair Holdings van R420 miljoen.King is ook ’n direkteur van Formal Holdings, wat ook ’n skuldeiser van R867,5 miljoen teen Mayfair Speculators is.Netwerk24 kon sedert Januarie nog nie vir King vir kommentaar opspoor nie. – Netwerk24

Lanzerac lig sluier oor sy eienaar

Kommentaar

Republikein 2025-05-20

Meld asseblief aan om kommentaar te lewer

Lanzerac lig sluier oor sy eienaar

Kommentaar

Republikein 2025-05-20

Meld asseblief aan om kommentaar te lewer

MELD AAN

Advertensie