Landstrots dra Shikongo na silwer in Tokio

Hesron Kapanga in Tokio – Die blinde naelloper Ananias Shikongo met sy gidshardloper Sem Shimanda het gisteraand in Tokio, Japan, die land se eerste medalje van die 2020 Paralimpiese Spele verower.“Ek het myself belowe ek sal Namibië se mense nie teleurstel nie; ook nie diegene wat my oor die jare ondersteun het nie. “Ek is trots op die taak wat my gidshardlopers verrig het, want ek het goed gevaar in die wedlope sover, wat gewys het dat ons goed saamgewerk het,” het Shikongo (35) gister ná sy prestasie aan die nuusagentskap Nampa gesê.Shikongo en Shimanda het gister in die T11-klas se 400-meterfinaal tweede ná die wêreldkampioen en verdedigende titelhouer van Rio 2016, Gerard Puigdevall Descarrega van Spanje (met sy gids Guillermo Gil Rojo), klaargemaak.Die Namibiër het sy seisoensbeste (51.14 sekondes) gehardloop en is net deur Descarrega se 50.42 geklop.Die bronsmedalje is deur die Fransman Gauthier Akunda (51.74, gids Lucas Mathonat) ingepalm.Shikongo het die vorige dag sy uitdun in 51.22 sekondes gewen om sy plek in die finaal te bespreek.Shikongo het aan Nampa gesê dit was vir hom belangrik om aan die wêreld te wys dat Namibiërs op die globale verhoog kan presteer, maar meer gereelde deelname aan kompetisies van die Internasionale Paralimpiese Komitee se Grand Prix-reeks is nodig om teen die bestes te kan bybly.“My aandag is nou op die 100 meter, wat ook gelaai is met verskeie kampioen-naellopers,” het hy gesê.Sy gids Shimanda sê hy is baie bly om sy tweede medalje van 'n Paralimpiese Spele te kan huis toe bring en boonop 'n beter een as die brons wat dié paar gesamentlik in 2016 in Rio de Janeiro ingepalm het.Die sekretaris-generaal van die Namibiese Paralimpiese Komitee, Michael Hamukwaya, sê harde werk en toewyding is op die dag beloon.“Ons het talentvolle atlete in die land. Die tyd het aangebreek dat ons uitgaan en meer atlete raaksien en werf wat by ons huidige groep se ondervinding kan baat.“Ek hoop ons kan meer korporatiewe steun aan boord kry vir ons atlete om in IPC Grand Prix's mee te ding, sodat ons oor meer medaljes by toekomstige Paralimpiese Speles kan begin praat,” het Hamukwaya gesê.• Namibië se ander manlike siggestremde naelloper Johannes Nambala kon gister nie nog 'n medalje byvoeg nie, toe hy in die finaal van sy 100 meter (T13-klas) met die sesde plek tevrede moes wees (10.93).Die 30-jarige Nambala se groot mededinger die afgelope jare, Ierland se wêreldrekordhouer Jason Smyth (34), se wentyd van 10.53 besorg hom sy vierde opeenvolgende goue medalje in 'n Paralimpiese Spele-naelloop. Net-net tweede was die vasberade Skander Djamil Athmani van Algerië, wat vir die tweede keer op een dag 'n nuwe Afrika-rekord opgestel het (10.54).By die 2016 Paralimpiese Spele het die Namibiese span met vyf medaljes teruggekeer. Twee daarvan was silwers deur Nambala, terwyl Shikongo 'n goud (200 meter) en twee brons (100 en 400) behaal het. Dié twee manne was ook lede van die 4x100 aflosspan wat vierde geëindig het.Namibië word vanjaar deur net drie atlete in atletiek (naellope en verspring) verteenwoordig.• Die Namibiërs se oorblywende skedule dié week (Namibiese tye aangedui): LAHJA ISHITILE (T11-klas, met gids Sydney Kamuaruuma)Donderdag, 200 m (vier uitdunne – 03:02 tot 03:26)Vrydag, 200 m semifinale – 02:39 / 02:47Saterdag, 200 m finaal – 12:29 JOHANNES NAMBALA (T13-klas)Woensdag, 400 m uitdunne (13:19 / 13:27).Donderdag, 400 m finaal 02:54. ANANIAS SHIKONGO (T11-klas, met gids Even Tjiviju)Woensdag, 100 m (vier uitdunne, 02:42 tot 03:06); 100 semifinale (14:12 / 14:21).Donderdag, 100 m finaal 12:10.– Bygewerk van Nampa

Landstrots dra Shikongo na silwer in Tokio

Kommentaar

Republikein 2026-06-23

Meld asseblief aan om kommentaar te lewer

Landstrots dra Shikongo na silwer in Tokio

Kommentaar

Republikein 2026-06-23

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.