Landbouminister stel oewerboere oor watervrese gerus

Ronelle Rademeyer - Die minister van landbou, water en bosbou, mnr. Alpheus !Naruseb, het vandag besoek gebring aan Desert Fruit Namibia by Komsberg op die oewer van die Oranjerivier waar die dadelkultivar, Khalas, nou vir die eerste keer geoes word.

Hy het na oewerboere se waterfrustrasie van die afgelope drie jaar verwys en gesê die Namibiese regering het deur sy ministerie ‘n versoek aan die Suid-Afrikaanse regering gerig om genoeg water uit die opgaardamme in die Oranjerivier vry te laat sodat besproeing in die benede-Oranje nie onderbreek word nie.

Intussen het mnr. Seth Holmes, besturende direkteur van Desert Fruit Namibia, gesê Khalas-dadels is baie gewild in die Midde-Ooste en kan vars sowel as gedroog geëet word.

Dit word sedert die begin van Februarie na markte in die Midde- sowel as die Verre-Ooste uitgevoer. Die verwagting is dat die uitvoerseisoen nog ‘n verdere ses weke sal voortduur.

Foto: Verskaf