Land se lekkerste fees

Tanja Bause Die jaarlikse Windhoek Draught Outjo Wildsfees vind op 28 en 29 April 2017 weer plaas en diegene wat die lekkerste fees in Namibië wil bywoon, kan nou al die datums in hul kalenders merk. Die fees – die enigste van sy aard in die land – is oudergewoonte weer op die familie gefokus. In 2016 het die Wildsfees in die gemeenskap teruggeploeg deur instansies te vergoed wat gehelp het. ''n Liefdadigheidsontbyt wat gedurende die fees gehou is, was ten bate van die Outjo Kankerfonds. Goue Jare, ''n fonds vir bejaardesorg, het ook ''n donasie ontvang. Die Have-a-Heart Outjo dierekliniek het toerusting ontvang sodat dit addisionele dienste aan die gemeenskap kan lewer soos troeteldiere te steriliseer, versorg en voed. Die wildsfees het drie bene, naamlik omgewingsopvoeding, bewaring en toerisme. “Die platform gee vir ons die geleentheid om die volgende geslag bewaarders te werf, te behou en te inspireer. Dit is die fokus vir die Outjo Wildsfees 2017,” het me. Marinette Anthonissen gesê. Volgens haar sal die skole van Outjo en omliggende gebiede gedurende die naweek genooi word om na praatjies te kom luister oor diere en die natuurlewe en ook hoe om uitsterwing te voorkom. Kinders sal ook meer oor herwinningsmetodes leer om die natuurskoon te beskerm. “Die wildsfees deel ook die regering se visie van ''Harambee'' naamlik ''Food for the Future'' in vennootskap met gewillige borge, waar kinders en gemeenskappe aangemoedig word om groentetuine aan te lê,” het sy gesê. Een van die grootste trekpleisters by die wildsfees is die immergewilde wildsveiling. Die katalogusveiling bied van die beste bastergemsbok-bloedlyne in Namibië. Vir meer inligting hieroor, kan Du Preez Wild gekontak word. Dr. Chris Brown van die Namibiese Kamer van die Omgewing (NCE), mnr. Mike Bredenkamp van die Namibië Wildteelvereniging en ''n spreker van Namibië Professionele Jagvereniging (NAPHA) sal praatjies kom lewer. Daar sal ook talle inligtingstalletjies oor bewaring en omgewingsopvoeding in die veilingtent wees. “Die Shoprite/Checkers Proe-en- kuiertent bied deur die loop van die naweek vir die eerste keer ''n uitdunronde van die Shoprite/Checkers Boerewors-kompetisie aan. Daar sal ook weer ''n liefdadigheid-damesontbyt in die tent aangebied word waar me. Liz Meiring die dames gaan vermaak,” het Anthonissen gesê. Daar is vermaak vir oud en jonk met talle Namibiese en Suid-Afrikaanse kunstenaars wat te sien sal wees.Uitstallers word genooi om nou reeds hul stalletjies te bespreek. Anthonissen kan by kunadmin@iway.na gekontak word in dié verband. Vir meer inligting kan die Facebook-blad of die webblad (www.outjo-wildsfees.com) besoek word.

Land se lekkerste fees

Kommentaar

Republikein 2025-06-17

Meld asseblief aan om kommentaar te lewer

Land se lekkerste fees

Kommentaar

Republikein 2025-06-17

Meld asseblief aan om kommentaar te lewer

MELD AAN

Advertensie