Laat die waarheid seëvier

Otis Finck – Dit is glad nie lekker om aan die ontvangkant van ’n valse beskuldiging teen jou eer en karakter te wees nie. Wanneer dit gebeur, kom sit daar ’n knaende gevoel in die krop van jou maag. Jy herkou elke fynste besonderheid en sluk jou onskuld gedwee. Ek weet waarvan ek praat.Al sê jy ook wat, die verwytende vingers wat na jou kant toe wys, kla jou gewete aan. Die manier waarop mense na jou met “X-ray oë” kyk, sê jy is veroordeel en skuldig bevind.Veroordeel!Jy voel dit aan, maar kan dit net nie plaas nie.Skielik begin my foon lui. Dit skreeu onophoudelik soos die loeiende sirene wat waarsku teen ’n brand wat iewers op die dorp woed. Met elke goed bedoelde “hallo” van my kant af wil familie, vriende en selfs vyande aan die anderkant van die spreekbuis by my weet, “Is jy oukei?” Dit word summier opgevolg met “Hoe kon jy?” “Wat?” vra ek verslae, want ek is heel onkant gevang; weet nie waarvan hulle praat nie.Sommiges is opreg bekommerd en ander is met mening kwaad vir my. Met die verloop van die dag word die verwyte sommer wyd en syd geslinger. “Nee man, ek het nooit só iets van jou verwag nie. Jy is dan die ou wat skryf oor ander mense en nou maak jy self moeilikheid. Jy moes mos van beter geweet het!” “Waarvan praat julle?” stel ek ondersoek in.“Jou naam is op die lys broer. Hulle soek jou. Jy is ‘wanted’. Het jy darem ’n prokureur? Gaan gee jouself liewers oor voor hulle jou kom haal,” word ek aangeraai en aangemoedig. Die wortel van die kwaad is ’n lys met my naam daarop. Toe ek eindelik my oë op die lys lê, sien ek dit is nie sommer ’n hierjy lys nie, hoor. Die Teenkorrupsiekommisie het ’n lys met name vrygestel en die ministerie van landbou, water en grondhervorming versoek om lig te kom werp op ’n paar transaksies rakende die massabehuisingskema op Walvisbaai.Die kommisie het ’n tyd gelede ’n ondersoek van stapel gestuur en is glo nou op soek na ’n paar vermiste miljoene.Ek moet sê, daar is in die hawedorp ’n hele paar van ons wat in dié huise bly.Vir die paparazzi wat die kans waag, verduidelik ek tong in die kies dat ek nie mag praat nie, want die saak is mos sub judice.Dít is soos olie op die vuur. “Dan ís daar mos fout. So die gerugte is waar?”Ja-nee, die tyd sal leer. My gewete is silwerskoon. Jy kan maar kyk en dink wat jy wil. Daar val mos niks van my af nie. Laat die gereg maar vir eers sy gang gaan. Die waarheid sal seëvier.

Laat die waarheid seëvier

Kommentaar

Republikein 2026-05-15

Meld asseblief aan om kommentaar te lewer

Laat die waarheid seëvier

Kommentaar

Republikein 2026-05-15

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.