Laagste vlak in jare vir Zambezi, Kavango

Elvira Hattingh - Die Zambezi- en Kavangorivier het hul laagste vlakke in sowat vier jaar bereik, terwyl damme in Namibië ook bykans 10% leër is as dié tyd verlede jaar. Bogenoemde riviere vloei tans selfs vlakker as tydens die droogte van 2016-’17, volgens die jongste vloedbulletin wat gister deur die ministerie van landbou, water en bosbou se hidrologiedienste uitgereik is.Langtermyngemiddeldes, oftewel dié van die afgelope vier jaar, dui aan watervlakke van dié riviere bereik gewoonlik tussen 1 April en 1 Mei ‘n hoogtepunt, met die Zambezirivier wat op 1 Mei tydens die 2017-’18-reënseisoen die 7 m-kerf verbygesteek het.Die afgelope vier jaar was dié rivier se vlakke tussen 1 April en die einde van Mei nooit laer as 5 m nie. Vanjaar het die Zambezirivier nog nêrens dieper as 2 m gevloei nie, met 1 April wat minder as ‘n week weg is.Dieselfde geld die Kavangorivier, wat gewoonlik van 1 April af sy hoogste vlakke bereik, maar tans nog onder die 5 m-merk is. In 2015-’16 het dié rivier sy hoogste vlak in die afgelope vier jaar bereik toe dit die 8 m-merk verbygesteek het.Volgens die bulletin het die Zambezirivier gister 1,96 m diep by Katima Mulilo gevloei – heelwat laer as verlede jaar se 6 m. Dit het sedert middel-Maart gestyg, toe dit op 1,84 m gestaan het. Die Kavangorivier loop tans 4,69 m diep by Rundu, terwyl sy vlakke sedert 15 Maart voortdurend daal. Dit is ook laer as verlede jaar dieselfde tyd, toe dit 5,45 m diep gevloei het.Die Kwandorivier by Kongola is ook vlakker as verlede jaar se 3,55 m en staan tans op 2,42 m. Die Oranjerivier het op 22 Maart onderskeidelik 0,22 m en 0,19 m diep by Blouputs en Sendelingsdrift geloop – effe laer as verlede jaar se 0,31 m en 0,21 m. Damme al leërDamme in Namibië het in totaal net 31,5% of 219,443 Mm³ (miljoen kubieke meter) water oor, vergeleke met dieselfde tyd verlede jaar toe dit nog op 41% gestaan het. Die Gobabis-omgewing is steeds die gebied waar damme die leegste is. Tans is dié damme gemiddeld 2,2% vol, met die Otjiverodam wat net sowat 3,8% water oor het. Die Tilda Viljoendam hou tans 4,2% water en die Daan Viljoendam 2,1%. Gesamentlik is net sowat 0,432 Mm³ (miljoen kubieke meter) water in Gobabis se drie damme oor, vergeleke met dieselfde tyd verlede jaar se 1,524 Mm³. Damme in die sentrale dele van die land het gesamentlik 23,1% water oor, met die Von Bachdam wat tans 45,7% vol is. Die Swakoppoortdam is slegs 16,9% vol, terwyl die Omatakodam bykans leeg is op 0,2%. Dié drie damme wat vir onder meer Windhoek van water voorsien, het net sowat 32,530 Mm³ water oor, terwyl dit verlede jaar dieselfde tyd nog 52,743 Mm³ water oor gehad het. Die Friedenau- en Goreangabdam is onderskeidelik 28,3% en 100,2% vol.In die Suide staan die gemiddeld tans op 40,7% en hou die Nautedam tans die meeste water – dit is 96,7% vol en hou 80,857 Mm³ water. Die Hardapdam, Namibië se grootste naas die bykans voltooide Neckartaldam, is tans 25,7% vol en bevat nog 75,624 Mm³ water. Rehoboth se Oanobdam is 52,4% vol, met die Dreihukdam wat sowat 0,9% water hou. Die Bondelsdam is heeltemal leeg.

Laagste vlak in jare vir Zambezi, Kavango

Kommentaar

Republikein 2025-06-17

Meld asseblief aan om kommentaar te lewer

Laagste vlak in jare vir Zambezi, Kavango

Kommentaar

Republikein 2025-06-17

Meld asseblief aan om kommentaar te lewer

MELD AAN

Advertensie