Kwotastelsel vir Namibiërs by VN, AU

Augetto Graig – Die ministerie van internasionale betrekkinge en samewerking moedig Namibiërs aan om vir werksgeleenthede aansoek te doen by internasionale organisasies waarvan Namibië 'n lid is.Volgens dié ministerie se uitvoerende direkteur, ambassadeur Penda Naanda, het hulle net 28 Namibiërs op rekord wat voltyds by internasionale en streekorganisasies aangestel is waaraan Namibië behoort. Dit sluit in 14 by die Verenigde Nasies (VN), 11 by die Suider-Afrikaanse Ontwikkelingsgemeenskap (SADC) en slegs drie by die Afrika-unie (AU).Naanda sê dit is 'n prioriteit van sy ministerie om Namibiërs aan te moedig om by hierdie soort organisasies te werk om ondervinding op te doen en later weer in die land terug te ploeg. “Tweedens het Namibië, as lid van die internasionale gemeenskap, 'n plig om tot streek- en internasionale organisasies by te dra. Een voordeel daarvan is die tegniese hulp wat dié organisasies dan aan Namibië bied. Hierdie organisasies bied ook dan werksgeleenthede aan Namibiërs in terme van 'n kwotastelsel. Namibiërs moet dus van hierdie kans gebruik maak, anders verloor die land hierdie geleentheid in terme van menslikehulpbronontwikkeling,” sê hy.Begrotings van streek- en internasionale organisasies word gedeeltelik deur lidmaatskap gefinansier. Die bedrag wat elke lidstaat moet betaal, word bereken met betrekking tot die land se rykdom en bevolking. Gevolglik word die indiensneming van internasionale staatsamptenare in dié organisasies ook bepaal deur hoeveel 'n lidstaat bydra as 'n persentasie van die totale begroting van daardie organisasie. Dit word gedoen deur middel van 'n stelsel wat as die indiensnemingskwotastelsel bekend staan, voeg hy by. Nog 'n organisasie waar die ministerie meer Namibiërs wil sien werk, is die Statebondsekretariaat.“Gegewe dat Namibië tans nie naastenby sy kwotas by die AU en die VN volledig benut nie, sal ons Namibiërs aanmoedig om aansoek te doen vir poste wat by hierdie organisasies binne hul kundigheidsgebiede geadverteer word. Namibiërs het gebruik gemaak van die werksgeleenthede by SADC en dus is Namibië se kwota by SADC byna ten volle benut,” sê Naanda. – augetto@republikein.com.na

Kwotastelsel vir Namibiërs by VN, AU

Kommentaar

Republikein 2025-11-05

Meld asseblief aan om kommentaar te lewer

Kwotastelsel vir Namibiërs by VN, AU

Kommentaar

Republikein 2025-11-05

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.