Kwarantynpyne
’n Groep Namibiërs wat byna drie weke gelede in die land aangekom het, word ondanks die nuwe regulasies steeds in kwarantyn gehou.
Henriette Lamprecht
’n Groep Namibiërs wat weke gelede uit die buiteland met ’n repatriasievlug teruggekeer het, is steeds in kwarantyn by ’n lodge in die Otjozondjupastreek. Dit ten spyte van die feit dat die groep van 37 vir byna drie weke geen simptome van Covid-19 toon nie.
Intussen, sê een groeplid, is boonop moontlike positiewe gevalle en kontakte van positiewe gevalle in Okahandja en Otjiwarongo “tussen hulle” opgeneem. Weermaglede van Walvisbaai wat ’n week ná die groep se aankoms ook by die lodge gehuisves is, is volgens die man ná ’n week ontslaan.
Uitslae op toetse om te bevestig die groep is negatief vir die siekte, is dae nadat hulle getoets is, nog nie ontvang nie.
Volgens die groeplid is hul paspoorte met hul aankoms op 18 Julie op die Hosea Kutako Internasionale Lughawe gekonfiskeer en weier verteenwoordigers van die ministerie van gesondheid en maatskaplike dienste, sowel as lede van die polisie dat hulle die perseel mag verlaat.
Die minister van gesondheid, dr. Kalumbi Shangula het Vrydag aangekondig die duur van kwarantyn word voortaan van 14 tot sewe dae verminder. Kontakte van positiewe gevalle word almal op dag 7 getoets en word ontslaan sou hul negatief toets.
Shangula het reeds Maandag by navraag gesê die nuwe protokol is onmiddellik van toepassing. Volgens Shangula word dit tans “verpak en na die streke vir implementasie gestuur.”
Volgens die groeplid moes hulle ná ’n reis van byna 40 uur tot in Windhoek “vir byna twee ure in die ysige koue” op die aanloopbaan deurbring in afwagting op hul vertrek na kwarantyngeriewe. Almal op die vliegtuig moes hul paspoorte inhandig en hul temperatuur is gemeet.
Volgens hom was daar geen inligtingsessie wat die proses verduidelik het of aangedui het waarheen hulle wanneer na kwarantyngeriewe sou vertrek nie.
“Ons is net gesê om ’n bus te kies en dit het ook nog ’n uur gevat. Iemand in die groep het gesê daar is busse vir Waterberg, Hardap en die Safari Hotel in Windhoek. Ons het die een gekies wat die naaste aan ons huis is,” het hy gesê.
Volgens hom was die personeel by die lodge waar hulle tuisgaan, vriendelik en het daagliks hul temperatuur gemeet en uitgevra of enigiemand Covid-19-verwante simptome het.
“Ons kan nie oor die geriewe, die kos of die personeel kla nie. Die grootste probleem is die totale gebrek aan kommunikasie.”
Volgens hom het hy en sy vrou reeds in die buiteland, kort voor hul vertrek na Namibië, hulself vir Covid-19 laat toets wat getoon het hulle is negatief vir die siekte.
“Dit het my daar N$6 500 gekos, maar volgens ons ministerie beteken dié negatiewe toets van ’n land met die laagste risikosyfer in die wêreld niks nie.”
Die eerste plaaslike toets wat by die lodge gedoen is, het volgens hom gewys hulle is negatief vir die siekte. Die tweede toetse is Donderdagmiddag uitgevoer en volgens hom eers “laat Vrydagmiddag” by die Nasionale Instituut vir Patologie (NIP) afgelewer. Dié uitslag word nog afgewag.
“Ons paspoorte is gevat asof ons misdadigers is. Toe ons sê ons gaan ons tasse vat en loop, is vir ons gesê die polisie sal dan versterkings inbring om ons te keer. Ons is ’n sterk groep en staan by mekaar, maar die emosionele toestand onder die klomp is besig om te versleg.”
– [email protected]
’n Groep Namibiërs wat weke gelede uit die buiteland met ’n repatriasievlug teruggekeer het, is steeds in kwarantyn by ’n lodge in die Otjozondjupastreek. Dit ten spyte van die feit dat die groep van 37 vir byna drie weke geen simptome van Covid-19 toon nie.
Intussen, sê een groeplid, is boonop moontlike positiewe gevalle en kontakte van positiewe gevalle in Okahandja en Otjiwarongo “tussen hulle” opgeneem. Weermaglede van Walvisbaai wat ’n week ná die groep se aankoms ook by die lodge gehuisves is, is volgens die man ná ’n week ontslaan.
Uitslae op toetse om te bevestig die groep is negatief vir die siekte, is dae nadat hulle getoets is, nog nie ontvang nie.
Volgens die groeplid is hul paspoorte met hul aankoms op 18 Julie op die Hosea Kutako Internasionale Lughawe gekonfiskeer en weier verteenwoordigers van die ministerie van gesondheid en maatskaplike dienste, sowel as lede van die polisie dat hulle die perseel mag verlaat.
Die minister van gesondheid, dr. Kalumbi Shangula het Vrydag aangekondig die duur van kwarantyn word voortaan van 14 tot sewe dae verminder. Kontakte van positiewe gevalle word almal op dag 7 getoets en word ontslaan sou hul negatief toets.
Shangula het reeds Maandag by navraag gesê die nuwe protokol is onmiddellik van toepassing. Volgens Shangula word dit tans “verpak en na die streke vir implementasie gestuur.”
Volgens die groeplid moes hulle ná ’n reis van byna 40 uur tot in Windhoek “vir byna twee ure in die ysige koue” op die aanloopbaan deurbring in afwagting op hul vertrek na kwarantyngeriewe. Almal op die vliegtuig moes hul paspoorte inhandig en hul temperatuur is gemeet.
Volgens hom was daar geen inligtingsessie wat die proses verduidelik het of aangedui het waarheen hulle wanneer na kwarantyngeriewe sou vertrek nie.
“Ons is net gesê om ’n bus te kies en dit het ook nog ’n uur gevat. Iemand in die groep het gesê daar is busse vir Waterberg, Hardap en die Safari Hotel in Windhoek. Ons het die een gekies wat die naaste aan ons huis is,” het hy gesê.
Volgens hom was die personeel by die lodge waar hulle tuisgaan, vriendelik en het daagliks hul temperatuur gemeet en uitgevra of enigiemand Covid-19-verwante simptome het.
“Ons kan nie oor die geriewe, die kos of die personeel kla nie. Die grootste probleem is die totale gebrek aan kommunikasie.”
Volgens hom het hy en sy vrou reeds in die buiteland, kort voor hul vertrek na Namibië, hulself vir Covid-19 laat toets wat getoon het hulle is negatief vir die siekte.
“Dit het my daar N$6 500 gekos, maar volgens ons ministerie beteken dié negatiewe toets van ’n land met die laagste risikosyfer in die wêreld niks nie.”
Die eerste plaaslike toets wat by die lodge gedoen is, het volgens hom gewys hulle is negatief vir die siekte. Die tweede toetse is Donderdagmiddag uitgevoer en volgens hom eers “laat Vrydagmiddag” by die Nasionale Instituut vir Patologie (NIP) afgelewer. Dié uitslag word nog afgewag.
“Ons paspoorte is gevat asof ons misdadigers is. Toe ons sê ons gaan ons tasse vat en loop, is vir ons gesê die polisie sal dan versterkings inbring om ons te keer. Ons is ’n sterk groep en staan by mekaar, maar die emosionele toestand onder die klomp is besig om te versleg.”
– [email protected]
Kommentaar
Republikein
Geen kommentaar is op hierdie artikel gelaat nie