Kwaai skare rand veiligheidswag aan

Tanja Bause – 'n Veiligheidswag van VO Security is Saterdag deur 'n groot skare mense uit sy voertuig gepluk en ernstig aangerand. Die insident het in Green Mountain Dam-straat in Goreangab plaasgevind.

Volgens kaptein Willem Nande Kandjepo het hy omstreeks 19:30 'n oproep van die drywer, mnr. Erastus Hipandulwa gekry, wat hulp ontbied het.

“Erastus was besig om wagte wat klaar gewerk het af te laai, toe hy my bel. Hy het gesê die mense het baklei en hy wou stadig by hulle verbyry, toe iemand 'n man in die pad gestamp het en hy met die agterwiel oor hom gery het. Hy het stilgehou en wou kyk of hy kan help, toe 'n skare mense hom bestorm het. Hulle het klippe begin gooi en toe het die oproep doodgegaan.”

Kandjepo het besluit om na die toneel te ry en te kyk wat aangaan.

“Toe ek op die toneel kom, was daar duisende kwaai mense wat die voertuig met klippe en bottels gegooi het. Die polisie was ook reeds daar en die ambulans het vir Erastus hospitaal toe gevat, nadat hy uit die voertuig gepluk is, met klippe gegooi en aangerand is.

“Alle ruite van die voertuig is stukkend gegooi en die deurhandvatsel van die bestuurder se kant is afgebreek. Die skare het gedreig om die voertuig aan die brand te steek.”

Die wagte wat in die voertuig was, het op die vlug geslaan.

“Hulle was miskien tien manne en wou die bestuurder help, maar toe die klippe en bottels begin rondvlieg, het hulle besef hulle staan geen kans nie. Ek kan dit nie verstaan nie; die mense was dronk en het baklei, iemand het die man voor die voertuig ingestoot en nou rand hulle my bestuurder aan en maak my voertuig stukkend.”

Kandjepo kon die voertuig saam met die polisie na die polisiestasie ry. Hipandulwa word glo tans in 'n stabiele toestand behandel, maar die vrees vir breinskade bestaan.

– [email protected]