KSA kondig nuwe waarnemende hoof aan

Tinus van Staden – Kugandrie Govender is as Krieket Suid-Afrika (KSA) se nuwe waarnemende uitvoerende hoof aangestel.
Govender, die steierende beheerliggaam se kommersiële hoof, neem die leisels oor by Jacques Faul, wat vandeesweek bedank het as die waarnemende uitvoerende hoof, omdat hy gevoel het hy is nie meer toegelaat om beheer te neem oor die beheerliggaam se bedryfsake nie.
Faul is in Desember tydelik in die pos aangestel nadat Thabang Moroe as uitvoerende hoof geskors is vir beweerde wanbestuur, hangende ’n onafhanklike forensiese ondersoek. Moroe, wat deur KSA ingelig is dat daar gronde vir sy afdanking is, se saak sloer steeds.
Faul se bedanking het gevolg op die president van die raad, Chris Nenzani, wat óók Maandag uit sy amp bedank het – net drie weke voordat sy verlengde termyn van sewe jaar op die algemene jaarvergadering van 5 September sou verstryk.
Govender was vroeër vanjaar in die nuus nadat Clive Eksteen, KSA se gewese hoof van verkope en borgskapsverhoudinge, afgedank is.
Eksteen is gepos nadat hy skuldig bevind is aan ’n klag wat te doen gehad het met ’n borgskapsooreenkoms tussen KSA en ’n multinasionale maatskappy. Die klag was dat Eksteen die ooreenkoms beding het teen ’n kleiner bedrag as wat deur KSA se uitvoerende komitee goedgekeur is, wat daartoe gelei het dat KSA “finansiële skade en skade aan sy reputasie gely het”.
Eksteen se verweer hiervoor was dat Govender, wat sy lynhoof was, die borgkontrak onderteken het en nie hy nie.
Eksteen het ook geen bewyse gesien dat die uitvoerende komitee ’n mandaat gegee het vir ’n finale bedrag vir die borgskap nie. Hy het gesê Govender het ook versuim om in haar getuienis in Eksteen se tugsaak te noem dat sy ’n boodskap, wat hy aan haar gestuur het voor die uitvoerende komitee se vergadering, gelees het waarin Eksteen haar inlig van die ooreenkoms wat die voornemende borg aangebied het.
Eksteen het sy saak intussen na die Kommissie vir Versoening, Bemiddeling en Arbitrasie verwys. Govender wou nie destyds oor Eksteen se bewerings kommentaar lewer nie.
Die waarnemende president, Beresford Williams, het Woensdag in ’n verklaring gesê hulle is verheug om Govender in dié waarnemende posisie aan te stel.
“Sy is ’n veelsydige uitvoerende leier met meer as 23 jaar se ervaring in die korporatiewe sektor,” sê Williams.
“Ons glo Kugandrie is die regte persoon om die organisasie vorentoe te dryf in dié tydperk. Haar ervaring het haar meer as genoeg voorberei om die rol met uitnemendheid te vervul.
“Ons is vol vertroue dat sy die vele strategiese projekte wat KSA onderneem, sal kan aandryf om ons belanghebbendes, vennote en werknemers te inspireer en te verenig sodat daar op die reputasie van krieket en KSA voortgebou sal word.”
Govender sê KSA se mandaat is om te verseker dat krieket ’n inklusiewe sport vir alle Suid-Afrikaners is.
“Dit is belangrik om ons reputasie plaaslik en internasionaal te verbeter,” sê sy.
“Hierdie is ’n kritieke tyd vir ons en dit is belangrik vir sleutelrolspelers om saam te werk om die stand van krieket te verbeter onder diegene wat die spel liefhet, ondersteun en glo in die sport se vermoë om alle Suid-Afrikaners te verenig.
“Ons sal hard daaraan werk om die vlakke van trots onder ons belanghebbendes te verbeter.” – Netwerk24