Kreef weer daar as see se koningskos

Des Erasmus



Aanvanklik was dit stil nadat die kreefseisoen verlede Woensdag begin het, maar die afgelope Sondagoggend met laagwater was daar talle duikers by die rotsbanke van die strande tussen Swakopmund en Walvisbaai. Vir elkeen was daar 'n ietsie vir die koningsmaal.

Sondagoggend was die weer ook aansienlik beter as die voorafgaande dae. Op Swakopmund was daar druppels in die nag, maar die oggend het die misbank oor die see gaan lê en het sonskynweer ook dagbesoekers na die strande gelok.

Drie duikers van Walvisbaai het by die Vierkantklip aan Republikein gesê die water was nog 'n bietjie koud vir kreef, maar die paar in hul sak was gesond en het aan die vereistes van die viswet voldoen. Die manne meen dit gaan selfs beter gaan wanneer die water 'n bietjie warmer en 'n bietjie meer troebel raak. Selfs 'n bietjie swael in die water kan help.

Die seisoen duur nog tot die einde van April. Elke duiker met 'n permit mag sewe krewe per dag uithaal. Nog 'n vereiste is dat die karapaks (rugdop) van die krewe langer as 65 mm moet wees. Die krewe moet ook in 'n heel toestand vervoer word. Kreef mag nie snags tussen sononder en sonop uitgehaal word nie.