KPMG: ‘Ons het nie Gupta-geld gewas’

Niel Joubert - Die ouditfirma KPMG, wat betrek is by beweringe van ongerymdhede by Gupta-maatskappye, sê hy “weerlê ten sterkste die beweringe dat KPMG betrokke was by enige beweerde aktiwiteite van geldwassery of dat hy dit gekondoneer het”.Volgens Trevor Hoole, uitvoerende hoof van KPMG Suider-Afrika, het die maatskappy in April 2016 bedank as ouditeure en raadgewers van die Oakbay-groep.Volgens Bloomberg het KPMG sy verhouding van 15 jaar met die Guptas twee jaar gelede beëindig nadat die ondersoek na hul bedrywighede deur die openbare beskermer begin is.Die sentrum vir ondersoekende joernalistiek amaBhungane en die nuuswebwerf Daily Maverick se ondersoekeenheid Scorpio het berig die Guptas het die Vrystaatse regering se suiwelprojek in Vrede vir miljoene rande gemelk om vir die luukse troue van ’n familielid van vier dae lank by Sun City te betaal.Die #GuptaLeaks-e-posse wys die suiwelprojek het in 2013 oor ’n tydperk van ses weke R84 miljoen na ’n Gupta-maatskappy se bankrekening in Dubai oorbetaal. Volgens berigte is minstens ’n driekwart van dié geld kort daarna aan twee Gupta-maatskappye in Suid-Afrika oorbetaal waarvan ’n deel gebruik is om vir die uitspattige troue te betaal wat minstens R30 miljoen gekos het.Luidens die berigte en die #GuptaLeaks-e-posse was KPMG ten tyde van Moses Kgosana se ampstermyn as uitvoerende hoof van die ouditfirma bewus van die betalings, berig Bloomberg.Buitelandse entiteiteKPMG was ook na bewering daarvan bewus dat die Guptas die koste van die troue as sakeverwante uitgawes vir belasting teruggeëis het.“In geen stadium was ons die ouditeure van enige van die buitelandse entiteite wat in die media genoem is nie, insluitende Accurate Investments of entiteite verwant aan die Vrystaat suiwelprojek nie, insluitende Estina,” lui ’n verklaring van Hoole.“Ons kan daarom nie kommentaar lewer oor die Vrystaatse suiwelprojek, hierdie entiteite, of die vloei van verwante geld nie.”Die onafhanklike reguleringsraad vir ouditeure (Irba) het intussen aangedui hy gaan die beweringe ondersoek.Die ondersoek volg ná die 2014-oudit van Linkway Trading, die maatskappy wat na bewering betrokke was by die Gupta-troue, sê Irba.Bernard Agulhas, uitvoerende hoof van Irba, sê as “ouditwaghond” het hy die mag om sodanige ondersoeke te doen sonder dat ’n amptelike klag ontvang is.“Dit is belangrik dat ons die beweringe wat in die openbare domein is en wat in die openbare belang is, ernstig opneem,” sê Agulhas.Die #GuptaLeaks-e-posse wys ook dat Kgosana, wat KPMG in 2015 verlaat het, een van die Guptas se gaste by die troue was toe hy uitvoerende hoof en senior vennoot van KPMG Suider-Afrika was.Hoole en KPMG verskaf in ’n verklaring antwoorde oor die kwessies wat in die media gepubliseer is:Gupta-troueBywoning van die troue deur sommige van KPMG se vennote was goedgekeur deur die risikobestuurspan en uitvoerende komitee, sê Hoole.Verblyf- en reiskoste is deur KPMG gedra. Volgens Hoole is hulle tevrede dat die firma se onafhanklikheid nie in enige stadium geskend is nie.Linkway TradingHoole sê Linkway Trading was ’n projekbestuursmaatskappy in die Oakbay-stal wat onder meer opgetree het as projekbestuurder van die troue van die niggie van die Gupta-direkteure van Oakbay.Die koste wat Linkway Trading vir die troue aangegaan het, is deur Accurate Investments terugbetaal.Hoole sê dit is standaardpraktyk vir projekbestuursmaatskappye soos Linkway om geld te ontvang en terug te betaal vir ’n spesifieke geleentheid. Die wins of verlies wat op so ’n projek verdien of gely word, sal deel uitmaak van die maatskappy se belasbare inkomste.KPMG se oudit van Linkway is in ooreenstemming met internasionale ouditstandaarde uitgevoer en op geen stadium, “gebaseer op die feite tot ons beskikking”, het hy dit oorweeg dat enige transaksie gerapporteer hoef te word volgens Suid-Afrikaanse of buitelandse wetgewing nie.“Ons staan by die ouditmening wat uitgereik is.”Verwante partyTen tyde van die oudit, gebaseer op die feite wat aan KPMG bekend was en voorstellings deur die bestuur, was Accurate Investments ’n entiteit verwant aan die vader van die bruid, ’n buitelandse burger, wat nie aan die Oakbay-groep se maatskappye verwant was nie, sê Hoole.Accurate Investments is nie as ’n verwante party van Linkway Trading geïdentifiseer ingevolge internasionale finansiële verslagdoeningstandaarde nie, sê Hoole.Ondersoek deur IrbaHoole sê hulle is op Vrydag 30 Junie in kennis gestel dat Irba KPMG gaan ondersoek.“Dit is ongewoon vir ons om in die media kommentaar te lewer op sulke aangeleenthede, maar aangesien Irba gekies het om dit te publiseer, voel ons dit is net gepas om ons aanvanklike siening openbaar te maak.”Hoole sê dit is nog onduidelik wat die grondslag van die ondersoek is en dit wil voorkom asof dit van stapel gestuur is gebaseer slegs op berigte in die media.“Dit is pertinent, aangesien ons geen kennis dra van die sake wat na bewering en volgens die mediaberigte, lyk asof dit ontstaan het in die Vrystaatse suiwelprojek nie,” sê Hoole.Hy sê KPMG sal sy volle samewerking aan Irba gee in hul ondersoek.KPMG het opgetree in ooreenstemming met professionele en etiese standaarde, sê Hoole.“In ooreenstemming met ons waardes het ons met integriteit opgetree in ons sake met die Oakbay-groep.” – Netwerk24

KPMG: ‘Ons het nie Gupta-geld gewas’

Kommentaar

Republikein 2025-11-05

Meld asseblief aan om kommentaar te lewer

KPMG: ‘Ons het nie Gupta-geld gewas’

Kommentaar

Republikein 2025-11-05

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.