Kospryse gaan in 2019 skerper styg

Hanlie Stadler – Hoewel brood, mieliemeel en ander graanprodukte steeds goedkoper is as ’n jaar gelede, moet verbruikers hulle maar daarop voorberei dat dié stapelvoedsels in 2019 weer duurder gaan word.Die oorhoofse inflasiekoers vir Oktober van 5,1% was effens laer as wat die meeste ontleders verwag het, naamlik 5,2%, maar was die hoogste sedert Julie, het Statistieke Suid-Afrika Woensdag bekend gemaak.Die Investec-ekonoom Kamilla Kaplan waarsku dat graanpryse in die landbou tans in dubbelsyfers styg, waaronder ’n styging van 20% in mieliepryse. Sy skryf dit daaraan toe dat “die moontlikheid van ’n matige El Niño ingereken word”.Volgens die landbousakekamer Agbiz kan dié weerverskynsel droër weer van einde Januarie tot Maart meebring. “Dit is ’n kritieke tydperk vir die meeste graan . . . omdat dit met bestuiwing saamval, wat vog vereis.”Kosprysstygings het in Oktober effens verlangsaam, van ’n jaarstyging van 3,9% tot ’n jaarstyging van 3,4%.Die kategorieë brood en graan (-0,6%), vrugte (-4,9%) en lekkers en poedings (-1%) is alles goedkoper as ’n jaar gelede.Koeldrankpryse het die skerpste gestyg en is nou 10,6% hoër as ’n jaar gelede. Groente is 9% duurder.Die prys van melk, kaas en eiers is net 4,2% hoër, deels danksy die feit dat veevoer nog goedkoper is. Veevoerpryse hou egter ook verband met die prys van graan, maan Kaplan.Mamello Matikinca, hoofekonoom van FNB, sê hoewel sy verwag dat kosprysinflasie in bedwang gaan bly vir die res van die jaar en in die eerste helfte van 2019, “wys ons voorspellings op ’n styging in kosprysinflasie in die tweede helfte van 2019”.Dennis Dykes en Johannes Khosa, Nedbank-ekonome, sê oorhoofse inflasie gaan ook in 2019 styg, grootliks weens die wisselvallige rand en die verwagte skerp stygings in kragtariewe volgende jaar. Eskom het by die Nasionale Energiereguleerder (Nersa) aansoek gedoen dat sy tariewe volgende jaar met 15% styg; die beslissing word in Maart verwag. Dit is benewens ’n styging van 4,4% wat reeds goedgekeur is op grond van sy aansuiweringsaansoek.“Ons glo egter nie dat inflasie oor die volgende twee jaar tot bo die Reserwebank se boonste teikenband sal styg nie, op voorwaarde dat daar geen groot plaaslike of internasionale verrassings met groot negatiewe gevolge vir die rand kom nie.”Kerninflasie het onveranderd op 4,2% gebly, teenoor die Reserwebank se September-verwagting dat kerninflasie in die laaste kwartaal van die jaar gemiddeld 4,8% sal beloop.“Die onlangse daling in oliepryse en die verbetering van die rand-dollar-wisselkoers kan meebring dat die Reserwebank sy korttermyn-inflasieverwagting verlaag. Hoewel ons meen die repokoers gaan met 0,25 persentasiepunt verhoog word, kan die gunstige onderliggende inflasie die styging uitstel,” sê Matikinca. – Netwerk24

Kospryse gaan in 2019 skerper styg

Kommentaar

Republikein 2026-10-29

Meld asseblief aan om kommentaar te lewer

Kospryse gaan in 2019 skerper styg

Kommentaar

Republikein 2026-10-29

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.