Kort nuus

Omatjete

Vrou glo met doringtakke geslaan

Me. Magdalena Ganes (34) se kêrel (36) het haar glo Saterdagaand, nadat hulle gedrink het, met die vuiste getakel en met doringtakke oral op haar lyf geslaan. Volgens die Namibiese polisie se misdaadverslag het die voorval omstreeks 19:00 in die Ovihitua-nedersetting in die omgewing van Omatjete plaasgevind waar die paartjie albei huiswerkers is. “Ganes het die volgende oggend aan haar beserings beswyk. Die verdagte is in hegtenis geneem en die ondersoek duur voort,” sê die polisie. Die paartjie het ‘n tweeling wat een jaar oud is.

Oshifo

Man slaan vrou glo met stok dood

Me. Hilda Markus (40) is Saterdag omstreeks 21:00 in die Ombondeyomutsegondjamba-nedersetting in die Ruacana-kiesafdeling in die Omusatistreek oorlede nadat sy glo met 'n droë mopaniestok op die kop geslaan is. Volgens die polisie is sy op die toneel oorlede. “Die verdagte is haar 48-jarige man. Die egpaar het na bewering gestry. Die oorledene se naasbestaandes is van haar dood ingelig.” Die verdagte is in hegtenis geneem en sou gister in die hof verskyn.

Katutura

Sekuriteitswag aangeval, vermoor

'n Sekuriteitswag van Inter Africa Security, mnr. Moses Micodemus, is tussen Saterdag 23:00 en Sondag 06:30 by die Katutura-jeugklompleks vermoor. “Hy het die perseel opgepas toe hy na bewering deur onbekende verdagtes aangeval, geslaan en verwurg is. Die verdagtes het by 'n vraghouer ingebreek en sporttoerusting gesteel," sê die polisie. Twee verdagtes (41 en 22) is Sondag in hegtenis geneem en twee is voortvlugtend. Die ondersoek duur voort.

Rehoboth

Sesjarige glo verkrag

'n Sesjarige meisie is glo Vrydag tussen 17:00 en 18:00 by Blok E in Sonderwater verkrag. "Sy is na bewering deur die 30-jarige verdagte na sy huis gelok waar hy haar verkrag het," sê die polisie. Die man is in hegtenis geneem en die ondersoek duur voort.

Katutura

Vier vas oor ietermagô

Vier mans is Sondag omstreeks 20:00 by die NamPower-kragstasie in die noordelike nywerheidsgebied in Windhoek tydens 'n polisieoperasie in hegtenis geneem toe hulle met 'n lewende ietermagô in hul besit betrap is. Volgens die polisie is die verdagtes onderskeidelik 29, 32, 34 en 42 jaar oud. Die waarde van die ietermagô word op sowat N$50 000 beraam. Die polisieondersoek duur voort. Ietermagôs is die dier wat wêreldwyd die meeste mee gesmokkel word.

Mondesa

Burundiese man vas oor kokaïene

'n Burundiese man (29) is Saterdagaand tydens die Namibiese polisie se dwelmoperasie by ’n huis in Jabulani in die Mondesa-woonbuurt op Swakopmund in hegtenis geneem terwyl hy glo handel gedryf het met 43 g kokaïene en 13 sakkies dagga. Die waarde van die dwelms word op sowat N$22 150 bereken. Die polisieondersoek duur voort.