Koopbesluit: In dié saak dra die vrou die broek

Ané Theron - 'n Man en vrou stap by 'n handelaar in (nee, daar is geen pittige trefreël nie, maar byt vas).Die vrou neem die besluit as dit by motorkoop kom, meneer die verkoopsman. Behandel ons dus billik, sê die moderne vrou.Sy is die een wat die brood verdien. Sy is 'n werkende vrou met twee kinders. Sy neem haar broer saam om na 'n spesifieke motor te gaan kyk.Sy het reeds al haar navorsing aanlyn gedoen. Sy het modelle met mekaar vergelyk. Sy het gelees oor veiligheidskenmerke, oor hoe ekonomies die motor gaan wees op die lange duur.Die motor moenie lui wees nie, want sy hou van bestuur, en sy is gereeld op die pad. 'n Mens moet darem kan voet neersit en iemand vinnig kan verbysteek, indien nodig.Gewapen met al die regte vrae, word sy deur die verkoopspersoon genader.Min weet die verkoopspersoon dat die vrou redelik seker is dat sy wél hierdie motor wil hê. Maar die konsultant hou aan met die broer praat – wat eintlik meer geïnteresseerd is in die nuutste Europese modeneigings as in motors.Die vrou vra uit oor die diensplan, dan maak die verkoopspersoon die paneelkissie oop. Sy vra na wielgrootte, dan wys hy haar die aantal USB-sokke.Maar terwyl hy haar ignoreer, kan hy nie uitgepraat raak oor die fantastiese onderstel en sewegang-dubbelkoppelaar-ratkas nie.Boetie knik net sy kop en maak die regte geluide.Sus het haar teen dié tyd begin vererg en bedank die konsultant met stywe lippies.Geïrriteerd verlaat sy die vertoonkamer, en die verkoopsman is sy goeie kommissie kwyt – sy sal elders gaan kyk.Sy is die een met die beursie, en tog is sy behandel soos die onkundige poppie wat net saamgekom het omdat haar salon-afspraak gekanselleer is.Dit is reeds bewys dat vroue in 85% van motoraankope vir die besluitneming verantwoordelik is.Ons soek kwaliteit, waarde vir geld en betroubaarheid. Nadat ons motor in 2010 afgeskryf is, wou my man met alle geweld 'n Polo Vivo koop, maar ek wou niks weet nie. Ons is dan juis gered deur ons 1999 Mercedes-Benz C-klas se lugsakke, en die Polo Vivo het op daardie tydstip te min gehad.“Ons” het uiteindelik besluit op 'n Chevrolet Cruze 1.6 LS sedan. Nie juis 'n brandrissie nie, maar ekonomies en veilig, met ses lugsakke (waarvan twee gordynlugsakke is) vir die kroos agterin.Hoogs getraumatiseerd ná die ongeluk wou ek niks weet van herverkoopswaarde of verrigting nie – veiligheid was my hoofbelang.Mamma het klaar gepraat!Die meeste vervaardigers besef gelukkig deesdae hoe belangrik die vrou is wanneer dit kom by die motorkiesproses. Soveel so dat daar selfs motors spesifiek vir vroue ontwerp is.In 2012 het Daihatsu (wat intussen die land verlaat het) die Terios Diva bekend gestel.Een van sy kenmerke was anti-skaafmatte om jou duur hoëhakskoene te beskerm. Nie dat 'n mens veronderstel is om met hakke te bestuur nie! (In hakke is jou voete nie so sensitief vir die pedale nie. Onthou, 'n ongeluk vind in 'n kits plaas.)Die Diva se standaard-toerusting het onder meer 'n trukamera ingesluit. Maar hoekom juis vir vroue? Wil mans nie ook sien wat agter die motor aangaan nie? (Nietemin het ek niks sleg te sê oor die Terios nie. Die aaklige krulletjie-en-draaitjie magneetversierings op die bakwerk kan 'n mens darem afhaal, en kraakbestande vensters wat grypdiewe sal fnuik is altyd 'n wenner.)So, wat wil ons skoner geslag hê wanneer ons 'n motor koop? Ons wil gerespekteer word – al is dit net omdat ons vir onsself kan besluit. Ons wil ingelig word sonder minagting wanneer ons onseker is van iets.En die motor? Dit moet prakties wees. Ons soek gehalte, waarde vir geld en betroubaarheid.Ek sou sê dis min of meer dieselfde as wat almal wil hê. – Netwerk24

Koopbesluit: In dié saak dra die vrou die broek

Kommentaar

Republikein 2026-02-02

Meld asseblief aan om kommentaar te lewer

Koopbesluit: In dié saak dra die vrou die broek

Kommentaar

Republikein 2026-02-02

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.