Kongo word 15de lid van Opul
Dis onder meer 'n geleentheid om die Afrikaland se oliebedryf te liberaliseer en sy diplomatieke bande met die Midde-Ooste te verbeter, glo die Kongo se minister van kommunikasie.
Francois Williams
Afrika se invloed in die oorspronklik Midde-Oosterse oliekartel, die Organisasie van Petroleumuitvoerlande (Opul), het pas nog sterker geword. Dis danksy die Republiek die Kongo se toelating tot die kartel.
Die Kongo – met Brazzaville as hoofstad en nie te verwar met die Demokratiese Republiek die Kongo nie, sy oostelike, groter buurland met Kinshasa as hoofstad – verwag lidmaatskap van Opul sal sy planne versterk om olieproduksie te verhoog. Dis ook 'n geleentheid om die Afrikaland se oliebedryf te liberaliseer en sy diplomatieke bande met die Midde-Ooste te verbeter, glo Thierry Moungalla, minister van kommunikasie in die Kongo.
Die aankondiging dat die Kongo lid van Opul word, is die naweek gedoen. Die Kongo hou op drie na die meeste ruoliereserwes in Afrika suid van die Sahara en hy hoop om sy olieproduksie met minstens 20% tot 350 000 vate per dag te verhoog.
Jean-Marc Thystère-Tchicaya, olieminister van die Kongo, verwag olieproduksie kan vanjaar selfs met 65% groei danksy twee nuwe projekte wat in bedryf kom.
Die Kongolese regering verdien die meeste van sy inkomste uit die oliebedryf, wat tot dusver deur die Franse oliereus Total en die Italiaanse oliemaatskappy Eni oorheers is. Moungalla glo die twee Europese oliefirmas beheer al te lank die oliesektor in die Kongo en hy verwag die Opul-lidmaatskap sal die Kongo in staat stel om nuwe beleggers na selfs marginale olievelde te lok en om die sektor te liberaliseer.
Laer oliepryse sedert 2014 het die Kongolese ekonomie verlede jaar met 4,6% laat krimp. Die land verwag effense groei van 0,7% vanjaar.
Die Kongo se toelating tot Opul het 'n strategiese politieke skuif deur pres. Denis Sassou Nguesso geverg. Waar die Kongo voorheen noue bande met die Opul-lid Katar gehad het, het hy nou sy lojaliteit na Saoedi-Arabië en die Verenigde Arabiese Emirate verskuif. Dié twee lande se stemme was deurslaggewend om sy toelating tot Opul moontlik te maak.
Intussen het Brent-ruoliepryse Maandag met 1,48% tot US$74,43 per vat gedaal in reaksie op Opul se ooreenkoms die naweek om produksie met sowat 1 miljoen vate per dag te verhoog.
Amerikaanse oliepryse het hulle nie aan die groter voorraad wat in aantog is gesteur nie en die maatstafprys West Texas Intermediate was 0,48% hoër op US$68,91. Die gaping tussen die twee pryse het tot US$6 per vat teenoor US$9 'n maand gelede gekrimp.
Lidlande van Opul
• Opul het 15 lidlande waarvan sewe van Afrika, ses van die Midde-Ooste en 2 van Latyns-Amerika is.
• Die kartel is in 1960 deur die vyf stigterslede Iran, Irak, Koeweit, Saoedi-Arabië en Venezuela begin.
• Katar het die jaar daarna lidmaatskap gekry, gevolg deur Indonesië en Libië in 1962, die Verenigde Arabiese Emirate in 1967, Algerië in 1969, Nigerië in 1971, Ecuador in 1973, Gaboen in 1975 en Angola in 2007.
• Ekwatoriaal-Guinee was verlede jaar die sesde Afrikalid.
• Indonesië het sy lidmaatskap in 2016 opgesê.
Opul se mag en beheer oor oliepryse is veral gevoel in 1973 met die Arabiese olie-embargo en met die uitbreek van die Iranse revolusie in 1979. Sy greep op die oliemark het egter in 'n mate verslap namate groot olieprodusente buite Opul na vore getree het soos Rusland, Noorweë en veral Amerika en Kanada.
- Netwerk24 /Bloomberg
Afrika se invloed in die oorspronklik Midde-Oosterse oliekartel, die Organisasie van Petroleumuitvoerlande (Opul), het pas nog sterker geword. Dis danksy die Republiek die Kongo se toelating tot die kartel.
Die Kongo – met Brazzaville as hoofstad en nie te verwar met die Demokratiese Republiek die Kongo nie, sy oostelike, groter buurland met Kinshasa as hoofstad – verwag lidmaatskap van Opul sal sy planne versterk om olieproduksie te verhoog. Dis ook 'n geleentheid om die Afrikaland se oliebedryf te liberaliseer en sy diplomatieke bande met die Midde-Ooste te verbeter, glo Thierry Moungalla, minister van kommunikasie in die Kongo.
Die aankondiging dat die Kongo lid van Opul word, is die naweek gedoen. Die Kongo hou op drie na die meeste ruoliereserwes in Afrika suid van die Sahara en hy hoop om sy olieproduksie met minstens 20% tot 350 000 vate per dag te verhoog.
Jean-Marc Thystère-Tchicaya, olieminister van die Kongo, verwag olieproduksie kan vanjaar selfs met 65% groei danksy twee nuwe projekte wat in bedryf kom.
Die Kongolese regering verdien die meeste van sy inkomste uit die oliebedryf, wat tot dusver deur die Franse oliereus Total en die Italiaanse oliemaatskappy Eni oorheers is. Moungalla glo die twee Europese oliefirmas beheer al te lank die oliesektor in die Kongo en hy verwag die Opul-lidmaatskap sal die Kongo in staat stel om nuwe beleggers na selfs marginale olievelde te lok en om die sektor te liberaliseer.
Laer oliepryse sedert 2014 het die Kongolese ekonomie verlede jaar met 4,6% laat krimp. Die land verwag effense groei van 0,7% vanjaar.
Die Kongo se toelating tot Opul het 'n strategiese politieke skuif deur pres. Denis Sassou Nguesso geverg. Waar die Kongo voorheen noue bande met die Opul-lid Katar gehad het, het hy nou sy lojaliteit na Saoedi-Arabië en die Verenigde Arabiese Emirate verskuif. Dié twee lande se stemme was deurslaggewend om sy toelating tot Opul moontlik te maak.
Intussen het Brent-ruoliepryse Maandag met 1,48% tot US$74,43 per vat gedaal in reaksie op Opul se ooreenkoms die naweek om produksie met sowat 1 miljoen vate per dag te verhoog.
Amerikaanse oliepryse het hulle nie aan die groter voorraad wat in aantog is gesteur nie en die maatstafprys West Texas Intermediate was 0,48% hoër op US$68,91. Die gaping tussen die twee pryse het tot US$6 per vat teenoor US$9 'n maand gelede gekrimp.
Lidlande van Opul
• Opul het 15 lidlande waarvan sewe van Afrika, ses van die Midde-Ooste en 2 van Latyns-Amerika is.
• Die kartel is in 1960 deur die vyf stigterslede Iran, Irak, Koeweit, Saoedi-Arabië en Venezuela begin.
• Katar het die jaar daarna lidmaatskap gekry, gevolg deur Indonesië en Libië in 1962, die Verenigde Arabiese Emirate in 1967, Algerië in 1969, Nigerië in 1971, Ecuador in 1973, Gaboen in 1975 en Angola in 2007.
• Ekwatoriaal-Guinee was verlede jaar die sesde Afrikalid.
• Indonesië het sy lidmaatskap in 2016 opgesê.
Opul se mag en beheer oor oliepryse is veral gevoel in 1973 met die Arabiese olie-embargo en met die uitbreek van die Iranse revolusie in 1979. Sy greep op die oliemark het egter in 'n mate verslap namate groot olieprodusente buite Opul na vore getree het soos Rusland, Noorweë en veral Amerika en Kanada.
- Netwerk24 /Bloomberg
Kommentaar
Republikein
Geen kommentaar is op hierdie artikel gelaat nie