Kongo volgende in Baba-helde se visier
Die onder 17 Baby Warriors se strewe om die eerste span in Namibië se geskiedenis te word wat vir volgende jaar se 2017 Afrika Nasiesbeker in Madagaskar kwalifiseer, begin wanneer hulle Saterdag om 12:00 in die Onafhanklikheidstadion teen Kongo opdraf.
Die jong Namibiërs se selfvertroue is hoog nadat hulle verlede naweek die o.17 Cosafa-titel in Mauritius gebuit het deur Suid-Afrika se Amajimbos met 3-1 in ’n strafskopstryd te uitoorlê.
Ná hul helde-ontvangs Dinsdagaand het die Baby Warriors gister ’n nuuskonferensie by Sokkerhuis in Katutura bygewoon om met hul trofee te spog.
Timo Tjongarero, afrigter van die pas gekroonde kampioene, sê die seuns het in hulself geglo en op dié manier hul weg deur die kompetisie gevind.
“Ons het goed afgeskop, maar toe gaan staan en verloor ons teen Suid-Afrika met doele wat onnodig afgestaan is. Ná ’n spanpraatjie is dié probleem opgelos en ons was gereed vir die finale wedstryd in die groepfase.
“In die semifinaal teen Malawi het die spelers opnuut gewys dat hulle honger genoeg is om die knoop deur te haak en toe moes Suid-Afrika in die finaal dit ontgeld," het die breier vertel.
“Ons sal Saterdag teen Kongo met spelers opdraf wat wedstrydfiks is en die afgelope tydjie groter wasdom bereik het. Ons sal graag president Hage Geingob met ’n oorwinning ter viering van sy verjaarsdag wil bederf en ons wens hom voorspoedige jare toe,” het Tjongarero gesê.
Kaptein Dawid Morgan, was besonder nederig oor sy span se benadering vir die komende botsing teen Kongo.
“Die ouens het baie hard gewerk en nou wil ons die eerste span word wat vir die 2017 Afcon-kampioenskap in Madagaskar kwalifiseer. Dit sal nie ’n maklike taak wees nie, maar ons is gefokus en sal mekaar aanmoedig om ons beste te lewer. Ons as spelers het nou ’n ongelooflike verstandhouding met mekaar en ons kan nog ver vorder,” reken die kaptein.
Barry Rukoro, sekretaris-generaal van die Namibiese Sokkervereniging, het by die geleentheid gesê daar word wel ook na die seuns se skoolwerk gekyk.
“Ons het met Sekondêre Skool Immanuel Shifidi gereël dat die spelers ná oefeninge klasse ontvang sodat hulle nie by die res van hul skoolmaats agterraak nie.
“Die ouers moet die gemoedsrus hê dat ons opvoeding eerste stel. Dit kan wel hand aan hand met sokker gaan, maar met die eksamens om die draai wil ons die seuns aanmoedig om hul skoolopleiding ernstig op te neem,” het Rukoro gesê.
Die o.17-wedstryd tussen Namibië en Kongo maak deel van die Dr. Hage Geingob-beker uit, as ’n voorwedstryd vir Tigers teen African Stars wat om 16:00 sy loop neem. Die grote tussen Mamelodi Sundowns en Orlando Pirates (RSA) volg daarna.
Kaartjies is teen N$20 by Computicket beskikbaar en gratis busvervoer sal sorg dat niemand die twee dae se Geingob-beker sokkerfees hoef mis te loop nie.
Die jong Namibiërs se selfvertroue is hoog nadat hulle verlede naweek die o.17 Cosafa-titel in Mauritius gebuit het deur Suid-Afrika se Amajimbos met 3-1 in ’n strafskopstryd te uitoorlê.
Ná hul helde-ontvangs Dinsdagaand het die Baby Warriors gister ’n nuuskonferensie by Sokkerhuis in Katutura bygewoon om met hul trofee te spog.
Timo Tjongarero, afrigter van die pas gekroonde kampioene, sê die seuns het in hulself geglo en op dié manier hul weg deur die kompetisie gevind.
“Ons het goed afgeskop, maar toe gaan staan en verloor ons teen Suid-Afrika met doele wat onnodig afgestaan is. Ná ’n spanpraatjie is dié probleem opgelos en ons was gereed vir die finale wedstryd in die groepfase.
“In die semifinaal teen Malawi het die spelers opnuut gewys dat hulle honger genoeg is om die knoop deur te haak en toe moes Suid-Afrika in die finaal dit ontgeld," het die breier vertel.
“Ons sal Saterdag teen Kongo met spelers opdraf wat wedstrydfiks is en die afgelope tydjie groter wasdom bereik het. Ons sal graag president Hage Geingob met ’n oorwinning ter viering van sy verjaarsdag wil bederf en ons wens hom voorspoedige jare toe,” het Tjongarero gesê.
Kaptein Dawid Morgan, was besonder nederig oor sy span se benadering vir die komende botsing teen Kongo.
“Die ouens het baie hard gewerk en nou wil ons die eerste span word wat vir die 2017 Afcon-kampioenskap in Madagaskar kwalifiseer. Dit sal nie ’n maklike taak wees nie, maar ons is gefokus en sal mekaar aanmoedig om ons beste te lewer. Ons as spelers het nou ’n ongelooflike verstandhouding met mekaar en ons kan nog ver vorder,” reken die kaptein.
Barry Rukoro, sekretaris-generaal van die Namibiese Sokkervereniging, het by die geleentheid gesê daar word wel ook na die seuns se skoolwerk gekyk.
“Ons het met Sekondêre Skool Immanuel Shifidi gereël dat die spelers ná oefeninge klasse ontvang sodat hulle nie by die res van hul skoolmaats agterraak nie.
“Die ouers moet die gemoedsrus hê dat ons opvoeding eerste stel. Dit kan wel hand aan hand met sokker gaan, maar met die eksamens om die draai wil ons die seuns aanmoedig om hul skoolopleiding ernstig op te neem,” het Rukoro gesê.
Die o.17-wedstryd tussen Namibië en Kongo maak deel van die Dr. Hage Geingob-beker uit, as ’n voorwedstryd vir Tigers teen African Stars wat om 16:00 sy loop neem. Die grote tussen Mamelodi Sundowns en Orlando Pirates (RSA) volg daarna.
Kaartjies is teen N$20 by Computicket beskikbaar en gratis busvervoer sal sorg dat niemand die twee dae se Geingob-beker sokkerfees hoef mis te loop nie.
Kommentaar
Republikein
Geen kommentaar is op hierdie artikel gelaat nie