Kom loer in by Moer Toe

Tanja Bause – Wanneer ’n mens met die grondpad by Koës inry, sien jy skielik ’n bord: Moer Toe Coffee Shop.

Volg die kronkelende stofpad deur die dorpie en hou stil voor ’n perskekleurige huis met ’n groen dak.

Nou is jy by die Moer Toe-koffiekroeg wat aan me. Frieda Barnard behoort.

“Moer Toe is uit niks gebou,” sê sy.

Barnard is op Keetmanshoop gebore en het op Koës ’n besigheid begin.

“Die dorp is baie klein en daar was twee van dieselfde winkel. Maar met die ekonomie het dit net nie gewerk nie. Ek moes toe aan ’n plan dink om ’n inkomste te verdien. Dit is toe wat ek besluit om die koffiekroeg te begin.”

Barnard het in 2011 alles gegryp wat op haar werf was, en na die perskekleurige huis getrek om haar koffiewinkel te begin.

Volgens haar word die koffiekroeg al meer bekend en doen van die groter toerbusse nou by haar aan vir ’n middagete of ’n lekker koppie boeretroos wat op die stoep onder die groot skadubome bedien word.

In die winkel verkoop sy ook handgemaakte items wat vroue in die omgewing en selfs van Windhoek maak. “Ek verkoop ook die handgemaakte vatlappe en dekens van me. Marianna Bohrmann wat baie gewild is.”

Barnard word ondersteun deur haar seun Jaco wat in die kombuis en met kliënte uithelp. “Dit is nou seisoentyd en baie besig. Besigheid is goed.”

Voor die huis staan ’n ou Chevrolet met sebrastrepe.

“Ons het die ou kar by iemand in die informele nedersetting gekoop en hierheen gesleep en hom geverf. Dit gee karakter,” sê Jaco.

“Moer Toe is ’n bewys dat jy met niks iets kan maak. Jy moet net jou hart daarop sit en hard werk,” is Barnard se raad.