Kom eet, verken en slaap op Outjo

Augetto Graig - Topaz is die naam van die nuutste restaurant op Outjo en word deur me. Ansta Gabathuler bedryf.Sy is reeds bekend vir haar sukses met die Farmhouse-restaurant, veral danksy haar entoesiasme oor die dorp en die lekker kos wat uit haar bakkery kom. By Topaz is sewe inwoners van Outjo werksaam en 15 by Farmhouse.Topaz is in die dorp se nuwe inligting- en toerismesentrum geleë, maar soos die geval met die Farmhouse, sou Ansta graag méér toeriste wou lok wat daar verbyry.Ansta sê baie buitelandse besoekers loop die kans mis om saam met inwoners te kuier, asook te ervaar hoe hulle leef en te sien waar hulle bly. Sy beplan om Topaz die vertrekpunt te maak van kort toere deur die lokasie en die dorp, en het twee lede van die San- en Himba-gemeenskap op die dorp genader om daarmee te help.Daar is ook edelstene by die perseel te koop, wat in die Brandberg- en Omaruru-mgewing ontgin is, en wat pragtige geskenke is om huis toe te neem, sê sy. Die nuwe vermaaklikheidsarea is ook ideaal vir konserte of ander opvoerings. Terug by Farmhouse vertel Ansta oor haar lewe as ’n plaasmeisie en hoe sy op die dorp grootgeword het. Volgens haar was die Katolieke plaasskool baie streng en het hulle daar geleer “om stil te staan en te bid as die klokke lui”. Sy onthou hoe sy as kind saam met ’n groep vriende deur die dorpie se stil strate gestap het om lekkers of sjokolade by die ou Portugese winkel te gaan koop. Na ’n paar jaar op Hoërskool Outjo, het sy op 16 begin werk; eers as huiswerker en later as skoonmaker by vakansieoorde. Sy is as kok opgelei, terwyl haar droom om ’n eie besigheid te besit al hoe groter geword het. Farmhouse was die eerste restaurant op Outjo en Ansta het die leisels op 1 September 2010 oorgeneem. Danksy haar ervaring in die kombuis, het sy vinnig aansien begin geniet vir bekostigbaarheid, gehalte en ‘n verskeidenheid lekkernye.Een kwelling is om betroubare verskaffers plaaslik te kry, sê sy. “Ek ondersteun plaaslike mense graag as dit kan, omdat dit altyd die beste is, veral as mens kan bestel en binne ’n dag kan hulle kom aflewer. Ek bied ’n groot a la carte-spyskaart en as ’n verskaffer my besigheid laat verloor, moet ek afskaal. “Andersins maak ek alles self en ek het die ervaring. Ons kan spesiale disse maak en ons bak ook,” sê sy.Maar nou wil sy eers werk daarvan maak om toeriste by die Farmhouse te laat oornag in die kamers wat sy ingerig het. “Ek kry nie kliënte nie,” sê sy, “en dit terwyl ek sien hoe die busse vol toeriste hier verbyry.” Ansta sê besoekers kan gerus ’n dag of twee op Outjo oornag, en by haar en haar span vriendelike werkers meer oor die dorp en die spesiale mense daar leer.

Kom eet, verken en slaap op Outjo

Kommentaar

Republikein 2026-03-11

Meld asseblief aan om kommentaar te lewer

Kom eet, verken en slaap op Outjo

Kommentaar

Republikein 2026-03-11

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.