Kolisi sal nie Haaie se kaptein wees

Tinus van Staden – Siya Kolisi is amptelik ’n Haai. Dit is geen verrassing nie, want sy skuif van Kaapstad na Durban is reeds verwag sedert die Amerikaanse konsortium MVM Holdings in Januarie ’n beherende belang in die Haaie bekom het. Kolisi het noue bande met verskeie lede van dié konsortium, soos Vincent Mai, wat deur ’n beursskema vir Kolisi se opvoeding aan die Grey High School in Port Elizabeth betaal het, en Michael Yormark, die president van Roc Nation, die sportagentskap wat Kolisi verteenwoordig.Die Stormers het boonop die naweek aangekondig Kolisi is vroeër vrygestel van sy kontrak, wat eers in Oktober sou eindig.Die nuusverklaring waarin die Haaie Woensdag die Bok-kaptein welkom heet, was dus bloot ’n formaliteit.“Ons is trots daarop dat ons ’n eenheid is wat onsself as ’n familie sien, wat mekaar ongelooflik goed ondersteun en ’n speler van Siya se statuur is ’n welkome aanwins tot die span,” sê Eduard Coetzee, die Haaie se uitvoerende hoof.“Hy is ’n speler van gehalte en ongetwyfeld ’n groot ambassadeur vir die spel en iemand wat ons jong spelers sal inspireer.“Ons is vol vertroue dat Siya naatloos by ons spanomgewing sal inskakel en sal gedy in die unieke kultuur wat ons hier in Durban het.”Kolisi sê hy het onmiddellik by die visie van die Haaie ingekoop.“Die energie rondom die franchise, die bestuuropset en die groep is sterk, asook die potensiaal vir sukses,” sê die losvoorspeler.“Ek het nog altyd ’n begeerte gehad om die beste te wees en om saam met die bestes te speel om my potensiaal op en van die veld af te bereik. Hierdie skuif is nog ’n tree in die rigting om soveel as moontlik in my loopbaan te bereik.“Dit is ’n baie opwindende nuwe hoofstuk vir my en my geliefdes, en ek verwelkom dit ten volle. Ek kom hier aan met die toewyding om alles wat ek het vir die span te gee en ek is dankbaar teenoor die Haaie vir hierdie geleentheid. Ons kan nie wag om te kyk wat Durban het om te bied nie.”Coetzee het Woensdag op ’n nuuskonferensie bevestig dat Kolisi nie die Haaie sal aanvoer nie. Lukhanyo Am sal steeds die kaptein wees.Dit sal Kolisi toelaat om uitsluitlik op sy spel te fokus. Ná die Wêreldbeker-toernooi van 2019, kon hy nie regtig weer goed op dreef kom wat sy spelpeil betref nie.Hy het nie ’n groot impak vir die Stormers of Westelike Provinsie gemaak in die Superrugby Unlocked-reeks of in die Curriebeker-reeks nie.Dié skuif kan moontlik nuwe lewe in sy loopbaan blaas.Die vraag is net – waar en hoe gaan die Haaie hom aanwend? In Dylan Richardson en James Venter het hulle twee skitterende jong oopkantflanke.Dit kan dalk ’n goeie plan wees om Kolisi op nr. 7 in te span. Hy is in elk geval nie ’n tradisionele nr. 6 wat net bal toe speel nie, en het vroeër in sy loopbaan gereeld steelkantflank gespeel.Sy natuurlike spel is meer soos dié van ’n steelkantflank. Hy geniet dit om die bal te dra en is woelig in die wye kanale. Met Richardson of Venter in die nr. 6-trui, Kolisi op steelkantflank en Sikhumbuzo Notshe op agtsteman, kan die Haaie moontlik ’n gedugte lostrio hê – mits Kolisi gou sy goeie peil herwin. – Netwerk24FOTO’sEduard Coetzee, die Haaie se uitvoerende hoof, en Siya Kolisi wat pen op papier sit op ’n Haai te word. Foto Twitter (The Sharks)Siya Kolisi is nou amptelik ’n Haai. Foto Howard Cleland

Kolisi sal nie Haaie se kaptein wees

Kommentaar

Republikein 2026-06-11

Meld asseblief aan om kommentaar te lewer

Kolisi sal nie Haaie se kaptein wees

Kommentaar

Republikein 2026-06-11

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.