Koerantgroep ook by sterfbed

'n Kollega wat diep spore in die hengelgemeenskap en ons gemeenskap van lesers en sakevennote aan die kus getrap het, is gister deur Covid-19 van ons weggeraap.

Nicoleen Coetzee (47) het vir tien jaar vir Republikein, Erongo en Namibia Media Holdings as bemarkingsagent gewerk.

Haar kollegas in Swakopmund en Walvisbaai onthou haar ­groot­hartigheid en haar aansteeklike lag. “Nicoleen was altyd gereed om die ekstra myl saam met kollegas en kliënte te stap,” skryf Leandrea Louw namens ons kuskantoor.

Sy het onder meer nou saam met wyle nuusveteraan Des Erasmus en sy vrou Anneli aan ons jaarlikse ­vakansiebyvoegsels gewerk.

Nicoleen was besonder lief vir Hentiesbaai en hengel. Sy het self langs die viswaters gestaan elke geleentheid wat sy kon kry.

“Sy het so maklik gelag,” vertel Grumpy Gramowsky namens die hengelgemeenskap. “Sy was altyd reg om te help en ons kon altyd op haar staat maak wanneer dit nodig was. Ons gaan haar verskriklik langs die see mis.”

Nicoleen laat haar man Kobus en hul seun Herman na.

Ter nagedagtenis sal daar vandag geen uitsending van “Erongo Talk” plaasvind nie. Die oomblik van stilte word aan Nicoleen opgedra.