Koekeloerder wil veiligheid op kusroete verbeter

Adam Hartman op Swakopmund Die eerste fase van ’n N$128 miljoen-verkeersbestuurstelsel langs die B2-hoofweg in Erongo is verlede Maandag by Arandis ingewy.Die hoop is dat dié nuwe stelsel sal help om Namibië se status as die land met die hoogste padongeluksyfer in Afrika, te verbeter.Die Arandis Emergency Response and Traffic Management Centre (AERTMC) is namens die adjunk- eerste minister, me. Netumbi Nandi-Ndaitwa deur die minister in die presidensie, me. Christine //Hoebes, ingewy. “Weens die honderde lewens wat ons jaarliks – ten spyte van ons klein bevolking – aanhou verloor, is Namibië se padveiligheidsprestasie ’n bekommernis vir beide die regering en die padgebruikers.” Sy het bygevoeg die jongste syfers toon dat Namibië gemiddeld 700 mense per jaar aan padongelukke verloor. “Dis 'n dodetal wat die land en die ekonomie nie kan bekostig nie.”Die aanvanklike fase van die stelsel behels die plasing van vyf pale, elk met tweerigtingkameras, langs 50 km pad oos en wes van Arandis. Hierdie gedeelte is geïdentifiseer as een van die land se ongeluk-episentrums.Mnr. Bazil Calogero, die bedryfsbestuurder van AERTMC, het gesê die kameras en hul meegaande sensors word gebruik om spoed en bestuurders se algemene gedrag te monitor. “Die kameras kan ook die voertuig se registrasienommer identifiseer en dit by die eienaar van die voertuig plaas. Dit help met identifikasie en wetstoepassing.”Verskeie ongelukke is reeds deur die kameras vasgevang, en kan gevolglik noodhulp- en wetstoepassingseenhede se reaksietye versnel.Daar is ook elektroniese padtekens wat motoriste oor hul spoed inlig en waarsku om op te let na hul gedrag. Hierdie tekens maak motoriste ook onder meer bewus van pad- en weerstoestande en waarsku van ongelukke op die pad vorentoe.“Ek het aan soortgelyke projekte in Suid-Afrika gewerk en sodra hierdie stelsels in plek is, het ons ‘n onmiddellike afname in ongelukke opgemerk. Dit help regtig, so ons is optimisties oor die uitkoms van hierdie stelsel,” het Calogero gesê.Die kameras en borde is gekoppel aan ‘n beheersentrum by die Arandis-afdraai. Hierdie sentrum is op ‘n 24/7-basis met verskeie nooddiens- en wetstoepassingsagentskappe verbind. Die huidige sentrum sal deur ‘n permanente struktuur vervang word – wat ook ‘n brandweerstasie en ander nooddiensvoertuie sal insluit. AERTMC is die inisiatief van ‘n konsortium wat bestaan uit die Nasionale Padveiligheidsraad (NRSC), die Arandis-dorpsraad en die Erongo-streekraad. Die idee is baie jare gelede gebore as deel van die dorp se poging om die streek se noodreaksiespilpunt te word. Die stelsel vorm deel van Namibië se tweede Dekade van Aksie vir Padveiligheid-strategie vir die tydperk 2021 tot 2030, wat in Maart deur die kabinet goedgekeur is. Hierdie strategie het spesifieke verantwoordelikhede aan verskeie rolspelers en instellings toegewys.Mnr. Neville Andre, die goewerneur van die Erongostreek, het gesê die bekendstelling van die sentrum kom op die regte tyd met die Desembervakansie wat op dreef is en die verkeer na en van die kus wat toeneem. “Padgebruikers moet verantwoordelik optree. Die wat dit nie doen nie, moet weet hulle sal gevang word. Jy kan nie weghardloop nie – ons kan jou sien. Hou by die reëls of jy sal in die tronk beland,” het hy gewaarsku. - republikein@republikein.com.na

Koekeloerder wil veiligheid op kusroete verbeter

Kommentaar

Republikein 2025-11-04

Meld asseblief aan om kommentaar te lewer

Koekeloerder wil veiligheid op kusroete verbeter

Kommentaar

Republikein 2025-11-04

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.