Koebaai, Avihe

Namibië groet vermoorde meisietjie

10 September 2018 | Plaaslik
Denver Kisting – Die presidentsvrou, me. Monica Geingos, sê mans wat nie oor hul gevoelens praat nie en dit inhou, is soos ’n vulkaan.

Dié vulkaan sal in ’n stadium ontplof en grootskaalse vernietiging saai, waarsku sy.

Geingos was een van honderde roubeklaers wat Saterdag Avihe Cheryl Ujaha (9) se begrafnis in Windhoek bygewoon het.

Sy sê die tragedie rondom Avihe se dood het haar diep getref.

Volgens haar sal Avihe se moordenaar(s) geregtigheid kry al word niemand vasgetrek nie. “En ons sal genade ontvang of ons dit verdien of nie.”

Die land is sowat twee weke gelede tot in sy fondamente geskud deur die nuus dat ’n erg verminkte lykie in ’n rivierloop in die hoofstad ontdek is.

Pastoor Seth Kaimu het die lykie as dié van sy kleindogter uitgeken.

Avihe het twee dae vantevore – op Sondag 26 Augustus – van haar huis in Katutura verdwyn.

Geingos het gesê die wrede aard van Avihe se dood en die feit dat van haar liggaamsdele steeds soek is, het aanleiding gegee tot “fluisterings van ’n rituele moord. Maar ons is nie hier om te bespiegel nie.”

Sy sê Avihe het nie verniet gesterf nie. “In ’n wêreld vol haat het Avihe ons geleer om lief te hê.”

Hiernaas, het sy in ’n stampvol kerk gesê, help die meisietjie se dood Namibiërs om opnuut te leer vergewe te midde van baie bitterheid. “Dít is die genade van die Here. In sy wese is genade vergifnis.”

Sy sê die “onnoembare toestand” van Avihe se geskende lykie “is ’n weerspieëling van ons samelewing. Dit is ons wat gebroke is. Dit is ons wat ons families opgekap het.”

Namibiërs se ingesteldheid is verstrooid en morele waardes ontbreek, sê sy. “Avihe se moordenaar is só verblind deur die bose dat hy nie kon sien deur hoeveel genade sy omring is nie. Hoe sou hy kon weet dat sy dade dié land tot eenheid sou skok?”

In dieselfde asem, het Geingos gesê, sou Avihe se moordenaar(s) nie geweet het dié daad sou gevangenes in trane hê nie.

'OUPA WYS LEIERSKAP'

Geingos het gesê pastoor Kaimu het die land gewys hoe lyk leierskap.

Dít het hy gedoen deur “ons te herinner aan die Here se genade en die belangrikheid daarvan om ander te vergewe soos ons vergewe is,” het sy gesê.

Geingos sê sy was verheug om volwasse mans in die openbaar te sien huil. “Ons het vir té lank ons seuns en mans geleer om nie te huil of oor hul gevoelens te praat nie." Dít is ’n tydbom, sê sy. “Eendag sal daardie vulkaan oorkook en grootskaalse vernietiging veroorsaak.”

Sy sê sy was veral beïndruk met hoe mnr. Isak Ujaha, Avihe se pa, kontak behou het met sy kind hoewel hy in Engeland woon.

Daar is mans wat in Windhoek woon en nie eens met hulle kinders – wat ook hier bly – in verbinding is nie, het sy gesê. “Vaderloosheid sal hierdie land doodmaak.”

Pastoor Kaimu het die afgelope naweek by die graffie in die Gammams-begraafplaas gesê Avihe se ma, me. Sylvia Kaimu, het haar Saterdae na haar grootouers toe gebring sodat sy Sondae met hulle kerk toe kon gaan.

Sy het tussen haar oupa en ouma, me. Nonnie Kaimu, gesit en nooit tydens ’n kerkdiens buite met ander kinders gaan speel nie, het hy onthou.

Volgens hom is hy dankbaar vir die geleentheid wat haar dood oor sy pad laat kom het om die boodskap van vergifnis aan ’n reuseskare oor te dra.

Hy sê hy wil hê die moordenaar moet na hom toe gebring word sodra die polisie hom aankeer. “Ek wil vir hom die liefde van God wys. Die Bybel sê ons het almal gesondig en wegbeweeg van Hom af. Die genade van God is daar om ons vry te stel.”

Hy het uitgevaar teenoor diegene wat eis dat die doodstraf weer ingestel moet word. “Ons is verkeerd as ons dink die doodstraf moet teruggebring word. Kom ons vergewe asseblief, liewe mense.”

Adj.komm. Abner Agas, die koördineerder van misdaadondersoeke in die Khomasstreek, het die afgelope naweek gesê niemand is nog weens die grumoord aangekeer nie.

Die nasionale polisiehoof, lt.genl. Sebastian Ndeitunga, het laat verlede week die sakegemeenskap bedank vir hul hulp in die ondersoek.

Ohlthaver & List het by monde van sy voorsitter, mnr. Sven Thieme, het ’n skenking van N$100 000 aangekondig.

Dié geld sal gedeeltelik aangewend word om die huidige polisiebeloning van N$30 000 aan te vul en ook bydra tot ’n pas gestigte fonds om met soortgelyke ondersoeke in die toekoms te help.

Die polisie is onder skoot omdat hulle glo nie dadelik nadat Avihe se verdwyning rugbaar geword het na haar begin soek het nie.

OPTOG

Vrydagoggend het ’n groep mense in Windhoek teen toenemende geweld teen vroue en kinders betoog.

Hulle het 'n optog gehou van die gesinswoning in Katutura af tot by die jeugsentrum in dié buurt, waar hulle 'n klagskrif oorhandig het aan die eerste minister, dr. Saara Kuugongelwa-Amadhila.

Soortgelyk

 

Hepatitis E woed landswyd voort

11 ure gelede | Ministeries

Henriette Lamprecht – Kort duskant ‘n jaar ná ‘n uitbreking van hepatitis E amptelik in Desember 2017 in Windhoek verklaar is, is byna 4...

Nuwe plan teen misdaad onthul

11 ure gelede | Misdaad

Denver KistingRooftogte, veral gewapende rooftogte, het in die afgelope ses jaar met 44% die hoogte in geskiet.Dié syfer is vervat in misdaadstatistieke van die afgelope...

Hittegolf rý Namibië

11 ure gelede | Weer

Ondangwa is vandag die heel warmste plek met ‘n verwagte maksimum temperatuur van 41°C. Boonop word geen verligting van snikhete temperature hierdie naweek verwag nie....

SOE’s: Direksies moet vir mislukkings pa staan

11 ure gelede | Ministeries

Ronelle Rademeyer - Voor staatsondernemings (SOE’s) nie prestasiegedrewe volgens goeie korporatiewe beginsels bestuur word nie, sal die ekonomie nie beter vaar nie.Daarom sal die vergoeding...

Weer, Vrydag 16 November 2018

11 ure gelede | Weer

BINNELAND: Sonnig en bloedig warm in die Suide. Elders sal dit gedeeltelik bewolk en bloedig wees. Enkele donerbuie word in Otjozondjupa, Khomas en Omaheke verwag.KUS:...

Kalender 16 November

11 ure gelede | Kuns en vermaak

Nou aan die gang» Die Nasionale Kunsgalery van Namibië (NAGN) bied met trots die 2018 Unam Visuele Kunste-uitstalling aan, wat tans in die hoofgalery van...

Die misterie van poësie

11 ure gelede | Kuns en vermaak

Lloyd Zandberg Terwyl die meerderheid van die mensdom soggens teen die wekker stoei, kinders vir skool aantrek, die hewige verkeer aandurf en uiteindelik laat vir...

Ons is nie teen gays, sê Sioka

11 ure gelede | Ministeries

Denver Kisting – Die minister van geslagsgelykheid en kinderwelsyn, me. Doreen Sioka, sê die regering het niks teen gay mense nie.Sý veral diskrimineer nie teen...

Mense oor miltsiekte gewaarsku ná 2 uitbrekings

11 ure gelede | Gesondheid

Ronelle Rademeyer - ’n Bewegingsverbod vir diere is by Sesfontein en die Bwabwata Nasionale Park ingestel nadat uitbrekings van miltsiekte op 1 November in dié...