Kobi Alexander vandag voor New Yorkse hof

Estelle de Bruyn - Die kleurryke Amerikaanse voortvlugtige, mnr. Jacob (Kobi) Alexander wat die afgelope tien jaar in Namibië gewoon het, sal vandag in New York in die hof verskyn.
Dit volg nadat hy vrywillig ingestem het om vir eens en vir altyd ’n einde aan sy jarelange regstryd te maak.
Hy is gister deur sy regsverteenwoordiger, mnr. Louis du Pisani, by die Internasionale Lughawe Hosea Kutako aan agente van die Amerikaanse federale speurdiens (FBI) oorhandig waarna hulle om 15:00 via Johannesburg na New York gevlieg het.
Du Pisani sê sy kliënt se gemoedstoestand was dié van iemand wat verlig is dat hy hierdie uitgerekte proses agter die rug kan kry.
Volgens mnr. Steve Mraz van die Amerikaanse ambassade in Windhoek, het Alexander op 23 Mei vanjaar deur middel van sy regsverteenwoordiger aangedui dat hy bereid is om op twee van die 35 klagte teen hom skuldig te pleit. Hy het ook sy reg tot ’n ondersoek oor uitlewering kragtens die Namibiese Wet op Uitlewering (Wet 11 van 1996) laat vaar en ingestem om aan Amerika uitgelewer te word om daar tereg te staan.
“Amerika laat pleitonderhandelinge toe wat meebring dat ’n beskuldigde volle of gedeeltelike skuld kan erken in ruil van versagting van sy of haar vonnis,” het Mraz gesê.

Reeds sedert 2006
Die distriksprokureur van New York het vir die eerste keer op 11 Oktober 2006 die Namibiese regering versoek om Alexander vir kriminele vervolging deur middel van “deportasie, uitsetting, uitlewering of enige ander wettige manier kragtens Namibiese wetgewing” aan Amerika te besorg, het Mraz bygevoeg.
Alexander is die voormalige voorsitter en hoof uitvoerende beampte van Comverse Technology.
Dit is onbekend wat Alexander nou van besluit laat verander het, nadat hy die afgelope tien jaar in verskeie hofgedinge in Namibië betrokke was om sy uitlewering teen te staan.
Alexander is op 8 September 2006 vir die eerste keer in Namibië in hegtenis geneem nadat hy, kort voor hy in Amerika in ’n staat van beskuldiging geplaas kon word, via Israel na Namibië gevlug het.
Volgens ’n verklaring wat die Amerikaanse ambassade in Windhoek destyds uitgereik het, is hy op versoek van die Amerikaanse regering op grond van ’n voorlopige lasbrief van ’n Namibiese hof aangekeer.
Amerika het sy uitlewering versoek sodat hy in die distrikshof in Brooklyn, New York, tereg kon staan op veelvuldige kriminele klagte wat uit beweerde terugdatering van aandele-opsies en omkoopfondskemas (“slush fund schemes”) tussen 1998 en 2006 spruit.
Hy is ook aangekla van ­sameswering, twee klagte van effektebedrog, agt klagte van valse verklarings aan die effekte- en aandelekommissie, vier klagte van posbedrog, veertien klagte van elektroniese bedrog en drie klagte van geldwassery.
In die klagstaat is ook geëis dat nagenoeg US$138 miljoen van Alexander se bates verbeurd verklaar word.
Volgens die verklaring van die ambassade is Alexander in 2006 aangekeer ná ’n mensejag deur die FBI met die samewerking van die Namibiese regering.
Mark Mershon, die FBI se assistentdirekteur in die New Yorkse kantoor, het destyds gesê: “Alexander se beweerde rol in die terugdatering van aandele-opsies, het Comverse se aandeelhouers en voornemende beleggers geviktimiseer. Die bedrog het die maatskappy se netto wins beïnvloed deur verdienstes verkeerd aan te dui. Hierdie beweerde optrede is onwettig en die feit dat Alexander aangekeer is, wys dat die FBI ­internasionaal sal werk om di­egene wat korporatiewe bedrog pleeg, aan die kaak te stel.”

Skuldig pleit
Alexander se New Yorkse regsgeleerde, Benjamin Brafman, is aangehaal toe hy gesê het Alexander sal op een klag skuldig pleit in die plek van al die ander klagtes.
Die ooreenkoms wat met Alexander bereik is, is die eindproduk van meer as twee jaar se sensitiewe onderhandelinge tussen die Amerikaanse ­departement van justisie, Alexander se regsverteenwoordigers en die Namibiese owerheid.
Volgens die minister van justisie dr. Albert Kawana, is Alexander gister aan verteenwoordigers van die Amerikaanse ambassade oorhandig. Die inspekteur-generaal van die polisie het in opdrag van Kawana die oorhandiging namens Namibië behartig nadat landdros Alexis Diergaard Maandag oor die wettigheid van die uitlewering beslis het.
Kawana sê die Namibiese regering was nie regstreeks met die onderhandelinge gemoeid nie en is eers, nadat ’n ooreenkoms tussen Alexander se regspan en die Amerikaanse departement van justisie bereik is, daarvan ingelig.
Kawana wou geen besonderhede van die pleitooreenkoms verstrek nie en het gesê Namibië beskou dit as ’n vertroulike aangeleentheid.
Comverse, die pioniers van klankboodskappe op selfone (“voicemail”), was tydens die hoogtepunt van die tegnologiese oplewing die liefling van Wall Street, maar ná die Alexander-saga aan die lig gekom het, was dit van die eerste maatskappye wat in federale ondersoeke na aandele-opsiebedrog ondersoek is. Twee top-uitvoerende beamptes het skuldig gepleit.
Comverse Technology het tot 2013 oorleef, toe dit deur ’n voormalige filiaal, Verint Systems, uitgekoop is.
Alexander het oor die jare ­ingestem om US$60 miljoen aan die maatskappy wat hy gestig het, terug te betaal en het sy teeneis vir ’n skeidingspakket van US$72 miljoen laat vaar.
In 2010 het hy meer as US$53 miljoen aan die Amerikaanse effekte- en aandelekommissie as betaal, een van die grootste skikkings ooit in sake wat spruit uit die terugdatering van aandele-opsies.