Klubs kry met Bolanders te make

Andrew Poolman - Die naweek se eerste Windhoek Sewes, geborg deur FNB Namibia en gereël deur FNB Western Suburbs, beloof om vir die deelnemende rugbyklubs 'n groot uitdaging te bied voordat hulle met die prysgeld kan wegstap.Die aksie by die Hage Geingob-stadion is die tweede opeenvolgende naweek van sewesrugby in die hoofstad, ná FNB Wanderers se toernooi wat Sondagaand geëindig het. 'n Kombinasie uit die Noord-Kaap (Duka) het daar as kampioene weggestap.Vandag en môre staar die plaaslike klubs opnuut 'n uitdaging vanuit die buurland in die gesig. Die Audim Dream Team uit die Boland lyk op papier na 'n sterk en ervare kombinasie wat nie ligtelik van hul troontjie afgestoot sal kan word nie.Volgens aanduidings bring die Bolanders drie of vier spelers wat huidig of tevore dié provinsiale unie se Kavaliers verteenwoordig het. Dit is afgesien van 'n voormalige Blitsbokke-sewesspeler.Die sakegroep Audim Minerals and Metals het reeds 'n geskiedenis met die Khomasdalse rugbyklub Western Suburbs, nadat hulle in September laas jaar die groen en wit span se reis na 'n sewestoernooi in die Wes-Kaap moontlik gemaak het.“Hierdie blootstelling het reeds gehelp om Suburbs se spelers op te skerp – soos blyk uit ons vertonings in die afgelope naweke se Trustco United-tienmantoernooi (wenners) en die Wanderers-sewes (naaswenners). “Ons bied die naweek se toernooi ook aan as 'n platform om die vlak van Namibiese sewes in die geheel te help ophef,” sê Suburbs se voorsitter, mnr. Keith Allies.Die Audim Dream Team het boonop die ooreenkoms aangegaan om vir die naweek twee van Suburbs se staatmakers, Nazume Swartz en Tjingairi Katjivi (bynaam TK), in hul spelersgroep in te sluit. Dié twee kom glo ook in oorweging wanneer die Dream Team later vanjaar toernooie in Portugal en Frankryk gaan bywoon.“Wanderers en United het beide vir die naweek onttrek op grond van beserings en vir die bestuur van hul spelers se fiksheidsvlak vir die komende ligaseisoen. Ons is jammer hieroor, maar ons respekteer hul besluit en sal nie daaroor hare kloof nie,” sê Allies.Die kompetisie is in drie kategorieë verdeel, naamlik die premierliga, reserweliga en vroue-afdeling.In die premierliga sal FNB Western Suburbs, FNB Rehoboth, FNB Reho Falcon en FNB Unam hul stemme dik maak teen die besoekende Audim Dream Team.Die reserweliga het sewe spanne – St. Lou (Rehoboth), Eastern Bulls (Gobabis), Okahandja en die tweede spanne van Suburbs, Rehoboth, Falcon en Unam.Die vier vrouespanne is die Huskeys (Okahandja), Blue Roses (Walvisbaai), FNB Rehoboth en FNB Unam Girls.Die groepwedstryde begin vandag om 18:30 en duur tot 21:10. Die program hervat môre vanaf 08:00 in die opbou tot die semifinale vanaf 18:00 en die eindstryde omstreeks 20:00.Danksy FNB beloop die prysgeld vir die wenners en naaswenners van die premierliga N$10 000 en N$5 000; vir die reserweliga N$5 000 en N$2 000 en vir die vroue N$2 000 en N$1 000.

Klubs kry met Bolanders te make

Kommentaar

Republikein 2025-05-16

Meld asseblief aan om kommentaar te lewer

Klubs kry met Bolanders te make

Kommentaar

Republikein 2025-05-16

Meld asseblief aan om kommentaar te lewer

MELD AAN

Advertensie