Kliënte moet self die fynskrif lees

Klagte:Gun my asseblief spasie om kapsie te maak oor die onderhoudpolis wat Autohaus Windhoek aan jou verkoop wanneer jy nuwe voertuig by hulle koop.Die verkoopsman beveel aan dat jy "Maintenance Plan" ook moet koop, want dan is daar geen onderhoud op die voertuig vir vyf (5) jaar nie, wat al jou dienste, ens. insluit. Al wat jy moet betaal is jou petrol en bande.Het afspraak vir my Volkswagen Polo gemaak vir die 30ste September en met die maak van die afspraak en die inboek van die voertuig bevestig Autohaus Windhoek dat dit die laaste diens is op die polis. Later die middag word ek geskakel en ingelig dat die diens nie gaan betaal word nie, want hulle betaal net vir vier (4) dienste. Op die einde van die dag moet ek die diens self betaal om my Polo terug te kry.Hoekom word daar dan polis aan jou verkoop wat jou voertuig vir 5 jaar dek as dit net vir 4 jaar is?Reaksie:Dankie vir die e-pos en geleentheid om duidelikheid te gee rakende die navraag.As diensverskaffer sal Autohaus altyd probeer om waarde toe te voeg tot ons kliënte. Dit sluit onder andere in om opsies en addisionele ekstras aan kliënte te bied.Alhoewel Autohaus die produkte van geakkrediteerde diensverskaffers aanbied, bly die administrasie en waarborge van nie-Volkswagen produkte die verantwoordelikheid van die diensverskaffer. In hierdie geval was dit ‘n Motorite-onderhoudsplan aangesien die 2011 Polo nie standaard met diens- of onderhoudsplan uitgekom het nie. Die huidige VW Polo sluit wel ''n Volkswagen-diensplan van 45 000 km of drie (3) jaar (wat ook al eerste kom) by die verkoopsprys in.Die Motorite-plan is onderskryf in lyn met die vervaardiger se diensvoorwaardes (bl. 15). Ter insae wil ek net noem dat verskeie vervaardigers gebruik maak van Motorite se dienste in Suid-Afrika en Namibië en hulle is onderhewig aan streng oudit- en regulatoriese maatreëls.Alhoewel die polis verduidelik word aan die kliënt by aflewering bly dit nog die kliënt se verantwoordelikheid om hom te vereenselwig met die volle inhoud in sy handleiding en waarborg. Ek wil ook beklemtoon dat dit die kliënt se keuse bly om die produk op te neem aangesien hy daarvoor betaal by aflewering. Die aktivering van die polis/versekeringsvoorwaardes word slegs aanvaar by ondertekening van die polis deur die kliënt. In hierdie geval was dit die 4de Oktober 2011. Om deursigtigheid te verseker, word die kliënt voorsien van ''n volledige polisskedule by aflewering.Hierdie onderhoudsplan het 60 000 km of vyf (5) jaar (wat ook al eerste kom) gedek. Volkswagen Suid-Afrika se diensvoorwaardes vir ''n VW Polo is elke 15 000 km. Die Motorite-plan, wat in lyn is met die vervaardiger se diensvoorwaardes, onderskryf vier gratis dienste wat dan die 60 000 km tydperk dek.In lyn met die diensskedule word aanbeveel dat ''n jaarlikse diens gedoen word indien die kliënt minder as 15 000 km per jaar aflê, wat hier die geval was. Die diens ter sprake was die vyfde diens. Dus het Motorite hulle verpligtinge nagekom deur vir die vier dienste te betaal soos uiteengesit in die polis. Die kostes van ''n diensplan word bepaal op grond van toekomstige uitgawes, gegewe die vervaardiger se diensskedules en inflasie. In hierdie geval het die kliënt die volle waarde van sy plan in dienskostes oor die termyn ontvang en val die kostes van die vyfde diens dus buite die plan. Dit word ook so uitgewys op bl. 15 van die Motorite-diensskedule. Om die kliënt te probeer help met die hoër as verwagte koste van die vyfde diens, het Autohaus afslag van N$800 (24%) gegee.Alles is duidelik aan die kliënt gekommunikeer en hierdie is die ware weergawe van die feite.Wees verseker van ons beste intensies ten alle tye.

Kliënte moet self die fynskrif lees

Kommentaar

Republikein 2026-06-12

Meld asseblief aan om kommentaar te lewer

Kliënte moet self die fynskrif lees

Kommentaar

Republikein 2026-06-12

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.