Kletsrymer van Krönlein slaan slag

Elizabeth Joseph op Keetmanshoop – Die 20-jarige Rodward Stephanus, beter bekend as Roda, is op 27 April as vanjaar se wenner van die realiteitsprogram The Search Namibia aangewys.Tydens die laaste episode van die program was daar vyf deelnemers wat kop-aan-kop was om die prys van N$100 000 te wen. Die televisieprogram het ten doel om blootstelling aan nuwe talente te gee.Tydens dié episode het Rodward gesê hy het aan die begin gemengde gevoelens gehad, maar dit is vervang deur opgewondenheid namate die program gevorder het."Ek het met elke liedjie verbeter en ek het elke dag beter geword. Dit was 'n wonderlike gevoel en ervaring," het hy gesê.GROOT DROME “My musiekloopbaan het begin toe ek 11 jaar oud was. My ouer broer het lirieke vir my skryf terwyl hy my aan liedjies, saam met sy medegroeplede van Tabakan, bekend gestel het.Ek het oor die jare begin om my eie lirieke te skryf. Ek het geleer hoe om verskillende verse saam te stel en hoe om na verskillende lirieke oor te skakel, net soos my broer Guame Stephanus, ofte wel Likerish.Toe ek selfversekerd genoeg was, het my ma vir my die plakkaat van The Search gewys en ek het sedertdien nog nie teruggekyk nie,” het Roda bygevoeg.Sy musiekstyl is 'n kombinasie van Afrikaanse straat-hip-hop gemeng met Engelse frases en uitdrukkings.Die kletsrymer wat van Krönlein op Keetmanshoop kom, het groot drome en beplan om ’n sukses van sy loopbaan te maak."Dit gaan nie oor die geld nie, alhoewel ek dit nodig het om my drome na te jaag. Ek wil blootstelling hê, ek wil hê meer deure moet oopgaan en vir die regte ore en oë om my talent raak te sien.”TUISKOMSRoda is deur 'n groot skare trotse vriende, aanhangers en familie op Keetmanshoop verwelkom. Die skare het ’n optog deur die strate gehou om sy sukses te vier.Volgens sy ma, me. Mandy Stephanus, is sy haar seun se grootste ondersteuner en dat hulle opgewonde en oorweldig is.“Dit is 'n eer en 'n seën. Dit was onverwags, maar ek het geweet hy sal die hoogste piek bereik.Ek is net bly hy kan sy drome uitleef. Ek is seker deure sal nou oopgaan sodat die jeug bemagtig kan word. Daar is baie talent daar buite,” het sy gesê.Ons kan nog baie van dié talentvolle kunstenaar verwag. Hy het laat deurskemer daar is sprake van ’n treffer in die toekoms in samewerking met ander musikante. - republikein@republikein.com.na

Kletsrymer van Krönlein slaan slag

Kommentaar

Republikein 2025-09-18

Meld asseblief aan om kommentaar te lewer

Kletsrymer van Krönlein slaan slag

Kommentaar

Republikein 2025-09-18

Meld asseblief aan om kommentaar te lewer

MELD AAN

Advertensie