Kleinmond: Rooimiere ingeroep
Politici, gemeenskapsleiers en munisipale amptenare van die Suid-Afrikaanse Overstrand-munisipaliteit het Donderdagoggend in Kleinmond, naby Hermanus in die Wes-Kaap, vergader om ’n oplossing te vind vir die voortslepende betogings wat sedert Sondag woed.
Rudolph Smith, uitvoerende burgemeester van die Overstrand-munisipaliteit, sê ’n vergadering word gehou met dr. Ivan Meyer, Wes-Kaapse LUR vir finansies, Dan Plato, Wes-Kaapse LUR vir gemeenskapsveiligheid, en die twee wykraadslede van Kleinmond en Bettysbaai, Grant Cohen en Fanie Krige. Die belangrikste punt op die agenda is die kwessie oor ’n tender wat vroeër aan ’n inwoner van Hermanus gegee is om strate en openbare toilette skoon te maak, sê Smith. Die tender is glo een van die oorsake vir die oproerigheid.
Die dorp het Woensdag tot stilstand gekom nadat ontevrede inwoners van die informele nedersetting Overhills paaie na die dorp met motorbande en vullis versper het. Brande teen die berg bokant Kleinmond is ook gestig, die polisie is met klippe en petrolbomme bestook en ’n voertuig is aan die brand gesteek. Winkels op die dorp moes hul deure sluit.
Donderdagoggend was die situasie rustig, hoewel die Rooimiere (hervestiging- en uitsettingsdienste) op die dorp gesien is.
“Dit is baie rustig vanoggend,” sê Smith.
“Ek het Woensdag ’n massavergadering met 100de inwoners gehad. Ons het verduidelik ons kan nie net die tender omdraai nie.”
Oor die teenwoordigheid van die Rooimiere op die dorp, sê hy: “Die enigste rede waarom hulle daar is, is indien mense onwettige strukture opsit, sodat dit weer afgebreek kan word.”
Hy sê die gemeenskap het begrip vir die belangrikheid van gister se vergadering.
“Hulle weet ons moet kans gegun word om te vergader.”
Hy sê hy voel goed oor die vergadering.
“Ek is kalm en rustig. Dit is die mense wat vir jou gestem het tot in hierdie pos. Jy moet na almal luister. Al is die versoek hoe onredelik, moet jy steeds aandag daaraan gee.”
Brig. Donovan Heilbron, groepspolisiehoof in die Overberg en Overstrand-gebied het gister gesê dat Kleinmond tjoepstil is.
Hy het gesê die gemeenskap, amptenare van die munisipaliteit sowel as amptenare van die Menseregtekommissie is nog in ‘n vergadering besig.
Hy het bevestig dat die Rooimiere op die dorp is, maar volgens Heilbron het die munisipaliteit gesê dit is om te help met dienslewering, soos om die paaie ensovoorts skoon te kry. Heilbron het gesê volgens sy kennis is daar geen onwettige strukture wat afgebreek moet word nie.
Die polisie hou egter deurentyd ‘n oog in Kleinmond en sorg dat hulle sigbaar is. - Netwerk24
Rudolph Smith, uitvoerende burgemeester van die Overstrand-munisipaliteit, sê ’n vergadering word gehou met dr. Ivan Meyer, Wes-Kaapse LUR vir finansies, Dan Plato, Wes-Kaapse LUR vir gemeenskapsveiligheid, en die twee wykraadslede van Kleinmond en Bettysbaai, Grant Cohen en Fanie Krige. Die belangrikste punt op die agenda is die kwessie oor ’n tender wat vroeër aan ’n inwoner van Hermanus gegee is om strate en openbare toilette skoon te maak, sê Smith. Die tender is glo een van die oorsake vir die oproerigheid.
Die dorp het Woensdag tot stilstand gekom nadat ontevrede inwoners van die informele nedersetting Overhills paaie na die dorp met motorbande en vullis versper het. Brande teen die berg bokant Kleinmond is ook gestig, die polisie is met klippe en petrolbomme bestook en ’n voertuig is aan die brand gesteek. Winkels op die dorp moes hul deure sluit.
Donderdagoggend was die situasie rustig, hoewel die Rooimiere (hervestiging- en uitsettingsdienste) op die dorp gesien is.
“Dit is baie rustig vanoggend,” sê Smith.
“Ek het Woensdag ’n massavergadering met 100de inwoners gehad. Ons het verduidelik ons kan nie net die tender omdraai nie.”
Oor die teenwoordigheid van die Rooimiere op die dorp, sê hy: “Die enigste rede waarom hulle daar is, is indien mense onwettige strukture opsit, sodat dit weer afgebreek kan word.”
Hy sê die gemeenskap het begrip vir die belangrikheid van gister se vergadering.
“Hulle weet ons moet kans gegun word om te vergader.”
Hy sê hy voel goed oor die vergadering.
“Ek is kalm en rustig. Dit is die mense wat vir jou gestem het tot in hierdie pos. Jy moet na almal luister. Al is die versoek hoe onredelik, moet jy steeds aandag daaraan gee.”
Brig. Donovan Heilbron, groepspolisiehoof in die Overberg en Overstrand-gebied het gister gesê dat Kleinmond tjoepstil is.
Hy het gesê die gemeenskap, amptenare van die munisipaliteit sowel as amptenare van die Menseregtekommissie is nog in ‘n vergadering besig.
Hy het bevestig dat die Rooimiere op die dorp is, maar volgens Heilbron het die munisipaliteit gesê dit is om te help met dienslewering, soos om die paaie ensovoorts skoon te kry. Heilbron het gesê volgens sy kennis is daar geen onwettige strukture wat afgebreek moet word nie.
Die polisie hou egter deurentyd ‘n oog in Kleinmond en sorg dat hulle sigbaar is. - Netwerk24
Kommentaar
Republikein
Geen kommentaar is op hierdie artikel gelaat nie