Kleinhandel bly onder druk, maan kenners
Die langtermyntendens van kleinhandelverkope neig steeds swakker. Ten spyte van die sprong in verkope in November, gaan groei in 2017 bly afneem.
Nellie Brand-Jonker
Die vooruitsigte vir verbruikersbesteding vir 2017 lyk ongunstig, meen Kevin Lings, hoofekonoom van Stanlib.
Die groei van 3,5% op 'n maandgrondslag in November in reële kleinhandelverkope was beter as die mark se verwagting van 0,8%.
Hy meen soos ander kenners dit kan waarskynlik aan Swart Vrydag toegeskryf word.
Die jaarsyfers van 3,8%-groei in verkope in reële terme is ook bo die markverwagting, veral nadat die jaarsyfers in Oktober gekrimp het. Die mark het verwag verkope gaan met 0,4% op 'n jaargrondslag daal.
Geen verligting in sig
Lings sê betreklik lae inflasie (4,6%) het verbruikers in 2015 gehelp, maar dit het in 2016 stelselmatig verander. Die inflasiekoers het in 2016 gestyg en die Reserwebank het vroeg in die jaar rentekoerse verhoog.
Verbruikers het gevolglik minder geld gehad om in winkels te bestee.
Terselfdertyd het verbruikersvertroue ver onder die langtermyngemiddelde geval.
Hy verwag 'n skerp belastingverhoging gaan in Februarie in die minister van finansies se begroting aangekondig word.
“Al hierdie faktore gaan heel waarskynlik die groei in kleinhandelverkope laat verlangsaam in die eerste helfte van 2017.”
John Loos, strateeg vir huishoudings en eiendom van FNB, sê ook die November-syfer is onverwags omdat niks in die ekonomie verander het om die skielike verandering te verduidelik nie.
Hy sê net Desember se verkope sal lig kan werp op die rede vir die verandering en of dit met Swart Vrydag se verkope verband hou.
Hy verwag verkope gaan vir die hele 2016 2,2% hoër wees en in 2017 nog minder, teen 0,6%, groei.
Die onderliggende kleinhandelkategorieë vir algemene handelaars, meubels en klere sukkel.
“Dié drie kategorieë is normaalweg goeie aanwysers van waar in die sake- en verbruikersiklus ons is, en dit toon nog nie wesenlike bemoedigende tekens nie.”
Reeds ingeprys
Kleinhandelaars het die afgelope week nie baie goeie verkoopsyfers vir die afgelope kwartaal uitgereik nie.
Maar al het die handelsoorsigte in baie gevalle teleurgestel, het kleinhandelaars se aandeelpryse redelik goed gestyg sedert begin Januarie: Truworths met 4%; Woolworths met amper 3%; The Foschini Group (TFG) met 3%; Massmart met 3% en Holdsport met 3%.
Die aandeelpryse van Shoprite (4,4%); Pick n Pay (amper 6%) en Clicks (amper 3%) het ook gestyg.
Die uitsondering is Mr Price en Lewis wat met onderskeidelik 4% en 12% gedaal het.
Etienne Eloff, 'n portefeuljebestuurder van FNB Sekuriteite, sê hoewel die handelsoorsigte swak was, was die slegte nuus grootliks reeds in die aandeelpryse ingeprys.
Adrian Cloete, portefeuljebestuurder van PSG Wealth, sê sedert die middel van Augustus het Woolworths, Massmart, Truworths en Mr Price se aandeelpryse begin daal namate verbruikers onder toenemende druk was, die strenger nuwe kredietwetgewing in werking getree het en ontleders verbruikersaandele se verdienstevooruitskattings begin afskaal het.
“Verbruikersaandeelpryse het dus die laaste vyf maande of so die swakker resultate begin inprys,” sê hy.
Volgens kommentaar van die mark was al die maatskappye se handelsoorsigte wat die afgelope week uitgereik is, baie gedemp, maar beter as wat gevrees is.
“Omdat die mark klaar redelik neerslagtige handelsoorsigte verwag het en die aandeelpryse dit klaar weerspieël het, was dit nie onverwags dat die aandeelpryse op die dag van die aankondigings in die meeste gevalle gestyg het nie.”
Nog te vroeg
Cloete maan dit is nog vroeg in die siklus vir verbruikersaandele.
“Dit sal verstandig wees om eers te sien hoe die finansiële resultate vir die ses maande tot Junie 2017 lyk om 'n beter gevoel te kry van die verbruikersaandele se vooruitsigte.”
Die styging in verbruikersaandele in Januarie is swakker as die top-40-indeks se styging van 4,9%.
- Netwerk24
Die vooruitsigte vir verbruikersbesteding vir 2017 lyk ongunstig, meen Kevin Lings, hoofekonoom van Stanlib.
Die groei van 3,5% op 'n maandgrondslag in November in reële kleinhandelverkope was beter as die mark se verwagting van 0,8%.
Hy meen soos ander kenners dit kan waarskynlik aan Swart Vrydag toegeskryf word.
Die jaarsyfers van 3,8%-groei in verkope in reële terme is ook bo die markverwagting, veral nadat die jaarsyfers in Oktober gekrimp het. Die mark het verwag verkope gaan met 0,4% op 'n jaargrondslag daal.
Geen verligting in sig
Lings sê betreklik lae inflasie (4,6%) het verbruikers in 2015 gehelp, maar dit het in 2016 stelselmatig verander. Die inflasiekoers het in 2016 gestyg en die Reserwebank het vroeg in die jaar rentekoerse verhoog.
Verbruikers het gevolglik minder geld gehad om in winkels te bestee.
Terselfdertyd het verbruikersvertroue ver onder die langtermyngemiddelde geval.
Hy verwag 'n skerp belastingverhoging gaan in Februarie in die minister van finansies se begroting aangekondig word.
“Al hierdie faktore gaan heel waarskynlik die groei in kleinhandelverkope laat verlangsaam in die eerste helfte van 2017.”
John Loos, strateeg vir huishoudings en eiendom van FNB, sê ook die November-syfer is onverwags omdat niks in die ekonomie verander het om die skielike verandering te verduidelik nie.
Hy sê net Desember se verkope sal lig kan werp op die rede vir die verandering en of dit met Swart Vrydag se verkope verband hou.
Hy verwag verkope gaan vir die hele 2016 2,2% hoër wees en in 2017 nog minder, teen 0,6%, groei.
Die onderliggende kleinhandelkategorieë vir algemene handelaars, meubels en klere sukkel.
“Dié drie kategorieë is normaalweg goeie aanwysers van waar in die sake- en verbruikersiklus ons is, en dit toon nog nie wesenlike bemoedigende tekens nie.”
Reeds ingeprys
Kleinhandelaars het die afgelope week nie baie goeie verkoopsyfers vir die afgelope kwartaal uitgereik nie.
Maar al het die handelsoorsigte in baie gevalle teleurgestel, het kleinhandelaars se aandeelpryse redelik goed gestyg sedert begin Januarie: Truworths met 4%; Woolworths met amper 3%; The Foschini Group (TFG) met 3%; Massmart met 3% en Holdsport met 3%.
Die aandeelpryse van Shoprite (4,4%); Pick n Pay (amper 6%) en Clicks (amper 3%) het ook gestyg.
Die uitsondering is Mr Price en Lewis wat met onderskeidelik 4% en 12% gedaal het.
Etienne Eloff, 'n portefeuljebestuurder van FNB Sekuriteite, sê hoewel die handelsoorsigte swak was, was die slegte nuus grootliks reeds in die aandeelpryse ingeprys.
Adrian Cloete, portefeuljebestuurder van PSG Wealth, sê sedert die middel van Augustus het Woolworths, Massmart, Truworths en Mr Price se aandeelpryse begin daal namate verbruikers onder toenemende druk was, die strenger nuwe kredietwetgewing in werking getree het en ontleders verbruikersaandele se verdienstevooruitskattings begin afskaal het.
“Verbruikersaandeelpryse het dus die laaste vyf maande of so die swakker resultate begin inprys,” sê hy.
Volgens kommentaar van die mark was al die maatskappye se handelsoorsigte wat die afgelope week uitgereik is, baie gedemp, maar beter as wat gevrees is.
“Omdat die mark klaar redelik neerslagtige handelsoorsigte verwag het en die aandeelpryse dit klaar weerspieël het, was dit nie onverwags dat die aandeelpryse op die dag van die aankondigings in die meeste gevalle gestyg het nie.”
Nog te vroeg
Cloete maan dit is nog vroeg in die siklus vir verbruikersaandele.
“Dit sal verstandig wees om eers te sien hoe die finansiële resultate vir die ses maande tot Junie 2017 lyk om 'n beter gevoel te kry van die verbruikersaandele se vooruitsigte.”
Die styging in verbruikersaandele in Januarie is swakker as die top-40-indeks se styging van 4,9%.
- Netwerk24
Kommentaar
Republikein
Geen kommentaar is op hierdie artikel gelaat nie