'Kleiner private skole kan sluit'
Dit sal moeilik regverdigbaar wees om 'n bykomende vyf maande se skoolfonds te hef indien die akademiese jaar tot Mei 2021 verleng word.
Henriette Lamprecht
Sou skole se deure tot Augustus toe bly, is die kans groot baie van die kleiner privaatskole sal hul deure aan die einde van die jaar moet sluit.
Mnr. Henry McCarthy, skoolhoofdeverteenwoordiger van die sewe privaatskole in Namibië wat die leerplan en eksamen van die Internasionale Eksamenraad (IEB) volg, sê privaatskole funksioneer as besighede met uitgawes.
Die sewe IEB-skole verteenwoordig 3 154 leerlinge en 417 personeellede.
“Ons kliënte, die ouers, gaan met privaatskole 'n kontrak aan om binne 'n akademiese jaar, wat min of meer ooreenstem met 'n kalenderjaar, 'n sekere diens te lewer waarvan kontakklasse en nie afstandonderrig die hoeksteen is nie.”
'n Verdere beginsel van die kontrak is, sou die kliënt (die ouer) se kind binne hierdie tydperk aan die nodige slaagvereistes voldoen, word sy/haar kind ná afloop van 'n jaareindeksamen na die volgende graad bevorder.
In die lig hiervan sal dit volgens hom moeilik regverdigbaar wees om 'n bykomende vyf maande se skoolfonds te hef indien die akademiese jaar na Mei 2021 verleng word.
McCarthy maan ook sou privaatskole tot Augustus toe bly, sal baie van die kleiner privaatskole hul deure aan die einde van die jaar moet sluit.
“Waarheen gaan daardie kinders en onderwysers in 'n stelsel wat al klaar nie die bestaande kapasiteit leerlinge kan hanteer nie? Daar is net nie genoeg skole nie.”
Hy het beklemtoon die IEB-skole se graad 12's móét aan die einde van die jaar skryf omdat die IEB as onafhanklike eksamenowerheid dit “onder geen omstandighede” sal skuif nie.
Universiteite gaan ook nie hul akademiese jaar aanpas net vir leerlinge uit Namibië nie. “In effek sal dit beteken, sou hulle nie eksamen kan skryf nie, sal ons en alle kinders 'n jaar agterstand hê waarvoor hulle die res van hul lewens gaan betaal,” het hy gesê.
Groot getalle leerders van die sewe IEB-skole in Namibië gaan studeer in die buiteland en veral in Suid-Afrika.
Met verwysing na die ministerie van onderwys, kuns en kultuur het McCarthy gesê sy indruk ná onderhandelinge met die ministerie is hulle beskou privaatskole as vennote in die onderwys en nie as opponente nie.
“My bede is dat die ministerie hierdie dilemma met groot wysheid en insig sal hanteer.”
Die Namibiese Privaatskole-Organisasie (NAPSO) het vroeër by monde van sy uitvoerende direkteur, mnr. Wouter Niehaus, gesê Namibië gaan amper die enigste land in die Suidelike Halfrond wees wat 'n Noordelike Halfrond-kalender volg sou die moontlikheid van vier kwartale, wat eers in Junie 2021 ten einde loop, gevolg word.
“Lande soos Suid-Afrika, Botswana, Zambië, Zimbabwe, Mosambiek, Angola, Australië, Nieu-Seeland en Suid-Amerika volg almal 'n Januarie tot Desember-kalender. Tersiêre inrigtings gaan nie hul kalenders vir 'n paar Namibiese studente aanpas nie,” het hy gesê.
Dit beteken van 2021 se leerlinge sal eers in 2022 universiteit toe kan gaan, nadat hulle “vir vyf maande leeglê ná skool”.
“Graad 0-klasse gaan dus vanaf Januarie tot Augustus 2021 sit met dubbel die aantal leerlinge, aangesien leerlinge wat reeds die wetlike ouderdom bereik het om graad 1 toe te gaan, nie by die huis vir sewe maande kan bly nie en in 'n spesiale klas gehuisves moet word,” het hy verduidelik.
Leerlinge wat graad 0 toe moes gaan, sal volgens hom vir sewe maande moet tuisbly.
“Privaatskoolouers het 'n jaarkontrak met die skool om onderrig vir 'n spesifieke graad aan hul kind te voorsien. Sou die jaar met ses maande verleng word, wie gaan die ekstra tydperk betaal wat nie deel van die kontrak was nie?”
Niehaus voorsien ook dat talle onderwysstudente wat hul studies voltooi het, nie aanstellings vir die sewe maande gaan kry nie aangesien “kontrakte met onderwysers dus verleng word tot Augustus en nuwe aanstellings eers daarna gemaak word.”
– [email protected]
Sou skole se deure tot Augustus toe bly, is die kans groot baie van die kleiner privaatskole sal hul deure aan die einde van die jaar moet sluit.
Mnr. Henry McCarthy, skoolhoofdeverteenwoordiger van die sewe privaatskole in Namibië wat die leerplan en eksamen van die Internasionale Eksamenraad (IEB) volg, sê privaatskole funksioneer as besighede met uitgawes.
Die sewe IEB-skole verteenwoordig 3 154 leerlinge en 417 personeellede.
“Ons kliënte, die ouers, gaan met privaatskole 'n kontrak aan om binne 'n akademiese jaar, wat min of meer ooreenstem met 'n kalenderjaar, 'n sekere diens te lewer waarvan kontakklasse en nie afstandonderrig die hoeksteen is nie.”
'n Verdere beginsel van die kontrak is, sou die kliënt (die ouer) se kind binne hierdie tydperk aan die nodige slaagvereistes voldoen, word sy/haar kind ná afloop van 'n jaareindeksamen na die volgende graad bevorder.
In die lig hiervan sal dit volgens hom moeilik regverdigbaar wees om 'n bykomende vyf maande se skoolfonds te hef indien die akademiese jaar na Mei 2021 verleng word.
McCarthy maan ook sou privaatskole tot Augustus toe bly, sal baie van die kleiner privaatskole hul deure aan die einde van die jaar moet sluit.
“Waarheen gaan daardie kinders en onderwysers in 'n stelsel wat al klaar nie die bestaande kapasiteit leerlinge kan hanteer nie? Daar is net nie genoeg skole nie.”
Hy het beklemtoon die IEB-skole se graad 12's móét aan die einde van die jaar skryf omdat die IEB as onafhanklike eksamenowerheid dit “onder geen omstandighede” sal skuif nie.
Universiteite gaan ook nie hul akademiese jaar aanpas net vir leerlinge uit Namibië nie. “In effek sal dit beteken, sou hulle nie eksamen kan skryf nie, sal ons en alle kinders 'n jaar agterstand hê waarvoor hulle die res van hul lewens gaan betaal,” het hy gesê.
Groot getalle leerders van die sewe IEB-skole in Namibië gaan studeer in die buiteland en veral in Suid-Afrika.
Met verwysing na die ministerie van onderwys, kuns en kultuur het McCarthy gesê sy indruk ná onderhandelinge met die ministerie is hulle beskou privaatskole as vennote in die onderwys en nie as opponente nie.
“My bede is dat die ministerie hierdie dilemma met groot wysheid en insig sal hanteer.”
Die Namibiese Privaatskole-Organisasie (NAPSO) het vroeër by monde van sy uitvoerende direkteur, mnr. Wouter Niehaus, gesê Namibië gaan amper die enigste land in die Suidelike Halfrond wees wat 'n Noordelike Halfrond-kalender volg sou die moontlikheid van vier kwartale, wat eers in Junie 2021 ten einde loop, gevolg word.
“Lande soos Suid-Afrika, Botswana, Zambië, Zimbabwe, Mosambiek, Angola, Australië, Nieu-Seeland en Suid-Amerika volg almal 'n Januarie tot Desember-kalender. Tersiêre inrigtings gaan nie hul kalenders vir 'n paar Namibiese studente aanpas nie,” het hy gesê.
Dit beteken van 2021 se leerlinge sal eers in 2022 universiteit toe kan gaan, nadat hulle “vir vyf maande leeglê ná skool”.
“Graad 0-klasse gaan dus vanaf Januarie tot Augustus 2021 sit met dubbel die aantal leerlinge, aangesien leerlinge wat reeds die wetlike ouderdom bereik het om graad 1 toe te gaan, nie by die huis vir sewe maande kan bly nie en in 'n spesiale klas gehuisves moet word,” het hy verduidelik.
Leerlinge wat graad 0 toe moes gaan, sal volgens hom vir sewe maande moet tuisbly.
“Privaatskoolouers het 'n jaarkontrak met die skool om onderrig vir 'n spesifieke graad aan hul kind te voorsien. Sou die jaar met ses maande verleng word, wie gaan die ekstra tydperk betaal wat nie deel van die kontrak was nie?”
Niehaus voorsien ook dat talle onderwysstudente wat hul studies voltooi het, nie aanstellings vir die sewe maande gaan kry nie aangesien “kontrakte met onderwysers dus verleng word tot Augustus en nuwe aanstellings eers daarna gemaak word.”
– [email protected]
Kommentaar
Republikein
Geen kommentaar is op hierdie artikel gelaat nie