Klaskamers, grond vir PS Otavi

Agt klaskamers wat deur B2Gold gebou is en grond vir toekomstige skoolfasiliteite wat deur die Ohlthaver & List-groep geskenk is, is vroeër hierdie maand aan die Primêre Skool Otavi oorhandig
Die klaskamers en ablusiegeriewe ter waarde van N$1,23 miljoen is deur B2Gold se sosiale maatskaplike verantwoordelikheidsprogram opgerig.
Die skool, wat 829 leerlinge en 26 personeellede huisves, se graad 4 tot 7 leerlinge het tot onlangs by die Sekondêre Skool Khorab se koshuis skoolgegaan. Die nuwe klaskamers maak dit vir vier gr. 4-klasse moontlik om na die primêre skool se terrein te trek. Die ander nuwe klaskamers word tydelik deur twee pre-primêre klasse gebruik maar dien ook as ’n tydelike biblioteek asook kantore.
Die O&L-groep het ’n erf van 36 080m² ter waarde van N$1,5 miljoen aan die skool oorhandig wat gebruik sal word vir verdere ontwikkelings, soos ’n koshuis wat vir meer as 200 leerlinge gebruik sal word wat verblyf benodig.