Klagte ná katgeveg op Outjo

Tanja Bause – ‘n Boervrou van die Outjo-omgewing en ‘n beampte van die ministerie van arbeid, nywerheidsbetrekkinge en werkskepping het verlede week klagte van aanranding en crimen iniuria by die polisie op dié dorp teen mekaar ingedien.

Me. Suzette Groenewald van die plaas Ryneveld beweer onder meer in haar polisieverklaring dat me. Emmerencia Awises, wat die plaas besoek het om navraag te doen oor die ontslag van ‘n plaaswerker, haar op haar rug gebyt het.

‘n J88-vorm oor die sogenaamde beserings is deur ‘n mediese beampte van die staat ingevul en ook aan die polisie voorgelê.

Groenewald het ’n klag van aanranding teen Awises gelê, terwyl Awises op haar beurt klagte van crimen iniuria en die belemmering van 'n beampte in die uitvoering van haar pligte, teen Groenewald by die polisie ingedien het.

Volgens Groenewald het een van haar werkers vir drie dae nie vir werk opgedaag nie.

“Die wet sê as jy drie dae van die werk af wegbly, het jy jouself afgedank, en ek het sy salaris wat ons hom skuld en sy verlofdae uitgewerk. Met sy terugkoms op die plaas wou ek sy geld vir hom gee. Hy het geweier om dit te neem en het die plaas verlaat,” het sy gesê.

Donderdag het ’n staatsvoertuig op die plaas aangekom.

Awises, die plaaswerker en die bestuurder was volgens Groenewald in die voertuig.

“Ek het op die stoep gestaan en Awises het na my toe gekom. Ek het probeer om met haar te praat, maar sy wou nie luister nie. Sy het haar vinger in my gesig gedruk en ek het haar hand weggedruk. Sy het my teen die bors gestamp en ek het oor ’n trappie gestruikel. Ek wou keer dat ek val en het toe my rug op haar gedraai en dit is toe sy my op my rug klap,” het Groenewald gesê.

Volgens haar het Awises haar toe deur die gesig geklap en wou sy haar terugklap, maar een van haar huiswerkers het haar gekeer.

Awises het glo omgedraai en weggeloop en Groenewald het haar teen die gras vasgedruk.

“Ek het haar nie geklap nie, maar teen die gras vasgedruk. Die bestuurder van die bakkie het uitgeklim en ek het gevoel hoe iemand my twee keer in die ribbes slaan. Van my werkers het tussenbeide getree en my gehelp. Awises het my toe ook op my rug gebyt,” het sy gesê.

Volgens Awises het die plaaswerker ’n klag oor sy afdanking by die arbeidskantoor ingedien.

“Hy het gesê hy het by die eienaar van die plaas drie dae verlof gekry om persoonlike probleme uit te sorteer. Hy kon ook nie die dokumente wat Groenewald wou hê hy moet teken, verstaan nie en het dus nie die geld gevat nie en by die ministerie van arbeid om hulp aangeklop,” het Awises by navraag verduidelik.

Volgens haar wou Groenewald nie na die werker of na haar luister nie en het gedurig die gesprek onderbreek.

“Sy het begin om my te beledig en haar vinger in my gesig gedruk en my op my linkerwang geklap. Ek het twee treë terug gegee en haar teruggeklap. Dit was uit selfverdediging. Ek het toe weggestap en sy het my op die gras vasgedruk. Sy het bo-op my geval en ek het haar op haar rug gebyt,” het Awises gesê.