Kind uit sinkende voertuig gered

Otis Finck – ‘n Kind is Saterdag uit ’n sinkende voertuig gered nadat die voertuig by Walvisbaai se waterkant in die see beland het.

Volgens ooggetuies het twee mans in die see gespring en die passasiersvenster regs agter gebreek om die kind uit die sinkende voertuig te red. Die kind het geen beserings opgedoen nie.

Die kind is glo sonder toesig in die Mercedes-Benz-stasiewa gelos. Die voertuig was ’n paar meter van die see af geparkeer.

Die kind het die sleutel van die voertuig gedraai wat in die aansitter in gesteek was.

Dit het veroorsaak dat die voertuig vorentoe gespring het en in die see beland het.

Die voertuig, wat onder water was, is later die aand uitgehaal.

Mnr. Adri Goosen, hoof van Swakopmund se brandweer, het gesê hy is verbaas oor berigte op sosiale media dat ’n skiboot Vrydag in die Mole omgeslaan het.

“Ek weet niks oor dié voorval nie. Miskien was dit ’n grap. Ons is nie daarvan ingelig nie. Ek het dit op sosiale media gesien en opgevolg. Noodpersoneel en mense van die Strand Hotel kon die voorval nie bevestig nie,” het hy gesê.