Kies lewe

JOHAN DEYSEL SKRYF:

As Namibiërs heg ons groot waarde aan lewe.

Dink maar net hoe het ons feesgevier toe die Here ons land geseën het met die heerlike reëns na die geweldige droogte wat soveel skade aangerig het. Ons land het weer begin lewe en ons het moed geskep en die nuwe lewe in die natuur gevier.

Onthou julle hoe ons in Namibië alles in ons vermoë gedoen het om almal se lewens te beskerm teen die verwoestende effek van Covid-19? Lewe is vir ons uiters belangrik.

God is die bron van alle lewe. Ons lees in die Bybel: “In Hom was lewe en die lewe was die lig van die mense.” (Joh. 1:4)

Jesus het gesê: “Ek is die lig van die wêreld; wie My volg, sal sekerlik nie in die duisternis wandel nie, maar sal die lig van die lewe hê.” (Joh. 8:12)

Wil ons as 'n nasie graag in verhouding met die Bron van alle lewe (ons hemelse Vader) leef en wil ons as land God se teenwoordigheid en Sy seën ervaar? Verseker wil ons!

Daarom is dit belangrik dat ons in eenheid sal saamstaan teen die dwase wetgewing vir aborsie. Hoe kan ons toelaat dat aborsie ongebore babas vermoor - die lewe wat God gee as die volgende geslag jongmense wat ons land na nuwe hoogtes kan lei?

Kom ons wat lewe so hoog ag, kies met wysheid teen aborsie. Ons besluit gaan 'n deurslaggewende impak hê op ons eie geslag, maar ook op die talle geslagte propvol potensiaal wat op pad is.- AMOS Landboubediening