Khaudum is 'n ware wildernis

Francoise Steynberg op Khaudum - Dit is die grootste en beste ontwikkeling ooit in die geskiedenis van die Khaudum Nasionale Park.Só het die minister van die omgewing en toerisme, mnr. Pohamba Shifeta, Donderdag tydens die amptelike opening van die Khaudum Nasionale Park se twee nuwe parkstasies, Khaudum en Sikeretti, gesê. Die twee parkstasies, saam sowat N$80 miljoen werd, is met behulp van die Namibiese regering en die Duitse ambassase deur die KfW Duitse Ontwikkelingsbank gebou om die Namibiese Nasionale Parkeprogram (NamParks) wat in 2006 begin is, te ondersteun. "Julle moet sorg dat die geriewe goed onderhou word en geen wild in die park gestroop word nie," het Shifeta gesê.Hy het die Namibiese polisie, weermag, nasionale sentrale intelligensiediens, nieregeringsorganisasies en gemeenskappe geprys oor die daling in olifant- en renosterstropery."Julle is ons nasionale trots en dit wys julle is werklik toegewyd,” het hy gesê. Hy het gesê stropery moet heeltemal uitgewis word en slegs deel van Namibië se geskiedenis wees."Wildlewe lewer 'n belangrike bydrae tot die ekonomie en toerisme is hoogs afhanklik van wildlewe. Wildlewe dra aansienlik tot die lewensbestaan van die plaaslike gemeenskappe in landelike gebiede by," het die minister gesê.Shifeta het verwys na die twee bewaringsgebiede noord van Khaudum, George Mukoya en Muduva Nyangana, wat by trofeejag baat, en wat ook binnekort by die nuwe lodge in die park sal baat. Die Nyae Nyae-bewaringsgebied in die suide van die park trek ook voordeel uit trofeejag. "Khaudum is baie spesiaal en is ’n ware, weggesteekte wildernis en verlede jaar het ons minder besoekers as die meer as 2 000 olifante in die park gehad," het Shifeta gesê.Die Duitse ambassadeur, mnr. Christian Schlaga, het gesê die twee goed ontwerpte en beplande parkstasies is 'n voorbeeld van goeie parkbestuur wat weer tot die bewaring van biodiversiteit, verhoogde toerisme en werkskepping sal lei."Khaudum se parkstasie het nou 24 personeelhuise met 'n moderne sonkrag- en watersuiweringstelsel wat 'n reuseverbetering op die ou barakke en houthuisies is," het Schlaga gesê.Khaudum spog ook nou met 'n pragtige nuwe ingangshek, toeriste-ontvangslokaal met inligtingsborde, kantore, werkswinkels, 'n piekniekplek en 'n sokkerveld. Die minister het gesê die konstruksie van die Khaudum-stasie het meer as 400 000 stene, byna 24 000 sakke sement en meer as agt miljoen liter water behels.Hy het Nexus bedank, wat die projek volgens skedule en binne die begroting voltooi het, asook die konsultasiespan, wat bestaan het uit WML Consulting Engineers, Nina Maritz Architects, De Leeuw Namibia, GFA Consulting Group en die NamParks III-projekspan.Shifeta het Duitsland bedank vir hul "voortgesette vriendskap en vrygewige ondersteuning" en gesê Duitse hulp aan NamParks is nou in die vierde fase. Die eerste twee fases het in die nasionale parke van Bwabwata, Mudumu en Mamili begin. Die derde fase het op die nasionale parke van Khaudum, Bwabwata, Mudumu en Nkasa Rupara gefokus.“Die vierde fase is nou in volle swang en sal werk in die Noordooste voltooi en dan op die ontwikkeling van die Tsau//Khaub Nasionale Park, voorheen bekend as Sperrgebiet in die //Kharasstreek, fokus. “Die vyfde fase begin binnekort in die Namibiese kusparke in die Kunene-, Erongo- en Hardapstreek,” het die minister gesê.

Khaudum is 'n ware wildernis

Kommentaar

Republikein 2025-11-03

Meld asseblief aan om kommentaar te lewer

Khaudum is 'n ware wildernis

Kommentaar

Republikein 2025-11-03

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.