Kersmark met ’n verskil

Yolanda Nel – Die jaarlikse Village Christmas Market is om die draai met Wanderers wat in ’n sprokiesagtige dorpie getransformeer gaan word wat almal sal laat besef Kersfees is om die draai.

Volgens organiseerder Kobie Wasserfall, word daar vanjaar veral op plaaslike entrepreneurs gefokus.

“Dit is belangrik om ’n platform vir klein besighede te skep, veral vir diegene wat tydens Covid hul werk verloor het of ’n ander plan moes maak om kop bo water te hou.”

Sy vertel besonderse uitstallers gaan hul produkte en dienste vertoon en dat dit wonderlik sal wees om te sien hoe vindingryk Namibiërs is.

Vir Kobie is die Kersseisoen ’n geleentheid vir familie en vriende om tyd saam te spandeer en hul harte oop te maak.

“Ons almal het die afgelope jaar en ’n half ongelooflike pyn en verlies ervaar, maar nou kan ons weer bietjie asem skep. Ons kan vir God die eer gee vir die wat nog met ons is. Ons moet opnuut besef wat ons in Hom het en dankbaar wees vir elke dag.”

Die Kersmark is beslis ’n geleentheid vir oud en jonk en families word genooi om dit saam te kom geniet.

“Daar is tot ’n geleentheid vir ’n familie-fotosessie saam met Kersvader en ons moedig ons ouer mense aan om ook aan die pret deel te neem,” sê Kobie.

Die mark vind vanaf 1 tot 6 November by Wanderers plaas.

“Die Kersmark is ’n week lank om te verseker almal sal die tyd kry om ’n draai te kom maak. En as jy nie ’n oorhaastige koper is nie, kom een dag om te loer en kom later terug om dan heerlik te koop,” lag sy.

Tydens die mark sal daar ook kans wees om skenkings in die vorm van ou klere, speelgoed en niebederfbare produkte af te laai. Dit sal ná die mark aan behoeftige organisasies uitgedeel word.

“Ons moet ons harte oopmaak vir dié wat nie het nie en hierdie is ’n wonderlike manier om terug te gee,” sê Kobie.

So merk nou al jou kalender en kom hou saam fees.