‘Kernkrag sonder korrupsie’
Francois Williams
Die Suid-Afrikaanse regering het uiteindelik verlede week met 700 bladsye se dokumente gereageer op twee omgewingsgroepe se hofaansoek wat in Oktober verlede jaar ingedien is om die beplande aankoop van kernkraginfrastruktuur te staak.
Liz McDaid, energie- en klimaatveranderingskonsultant vir die Suider-Afrikaanse Geloofsgemeenskappe Omgewingsinstituut (Safcei), sê die regering het die proses om op die hofaansoek te reageer, uitgerek deur aanvanklik nie enige inligting bekend te stel waarop sy besluit gegrond is soos deur die hofreëls vereis nie.
Die hofaansoek deur Safcei en die omgewingsgroep Earthlife Africa is om te vra dat die samewerkingsooreenkoms oor kernkrag wat Suid-Afrika en Rusland in 2014 gesluit het, ongedaan gemaak word en dat die korrekte prosedures gevolg word.
Die korrekte prosedure sou wees dat so ’n ooreenkoms eers deur die parlement goedgekeur moet word. Voordat die parlement egter besluit of Suid-Afrika so ’n ooreenkoms behoort aan te gaan, behoort die parlement die ekonomiese impak en finansiële bekostigbaarheid van sulke ooreenkomste te ondersoek, sê die omgewingsgroepe.
Eers nadat Safcei en Earthlife Africa se regspan waarskuwingsbriewe geskryf het en gedreig het om hof toe te gaan om die regering te dwing om te reageer op die hofaansoek, het die regering uiteindelik gereageer, sê die twee groepe in ’n verklaring.
Die regering se wetlike reaksie sluit 700 bladsye van verklarings en aanhangsels in, en die omgewingsgroepe se regspan werk daardeur.
Navrae aan die departement van energie oor hoe die omgewingsgroepe se regsoptrede hanteer word om te keer dat dit die tenderproses vir kernkrag ontspoor, is tot dusver nog nie beantwoord nie.
Vrae oor watter stappe gedoen gaan word om te waarborg dat die tenderproses vir kernkrag sonder korrupsie sal wees, is ook nog nie beantwoord nie. - Netwerk24
Die Suid-Afrikaanse regering het uiteindelik verlede week met 700 bladsye se dokumente gereageer op twee omgewingsgroepe se hofaansoek wat in Oktober verlede jaar ingedien is om die beplande aankoop van kernkraginfrastruktuur te staak.
Liz McDaid, energie- en klimaatveranderingskonsultant vir die Suider-Afrikaanse Geloofsgemeenskappe Omgewingsinstituut (Safcei), sê die regering het die proses om op die hofaansoek te reageer, uitgerek deur aanvanklik nie enige inligting bekend te stel waarop sy besluit gegrond is soos deur die hofreëls vereis nie.
Die hofaansoek deur Safcei en die omgewingsgroep Earthlife Africa is om te vra dat die samewerkingsooreenkoms oor kernkrag wat Suid-Afrika en Rusland in 2014 gesluit het, ongedaan gemaak word en dat die korrekte prosedures gevolg word.
Die korrekte prosedure sou wees dat so ’n ooreenkoms eers deur die parlement goedgekeur moet word. Voordat die parlement egter besluit of Suid-Afrika so ’n ooreenkoms behoort aan te gaan, behoort die parlement die ekonomiese impak en finansiële bekostigbaarheid van sulke ooreenkomste te ondersoek, sê die omgewingsgroepe.
Eers nadat Safcei en Earthlife Africa se regspan waarskuwingsbriewe geskryf het en gedreig het om hof toe te gaan om die regering te dwing om te reageer op die hofaansoek, het die regering uiteindelik gereageer, sê die twee groepe in ’n verklaring.
Die regering se wetlike reaksie sluit 700 bladsye van verklarings en aanhangsels in, en die omgewingsgroepe se regspan werk daardeur.
Navrae aan die departement van energie oor hoe die omgewingsgroepe se regsoptrede hanteer word om te keer dat dit die tenderproses vir kernkrag ontspoor, is tot dusver nog nie beantwoord nie.
Vrae oor watter stappe gedoen gaan word om te waarborg dat die tenderproses vir kernkrag sonder korrupsie sal wees, is ook nog nie beantwoord nie. - Netwerk24
Kommentaar
Republikein
Geen kommentaar is op hierdie artikel gelaat nie