Kerk hou lidmate glo agter slot en grendel

Siekes nie toegelaat om perseel te verlaat

21 August 2018 | Plaaslik
Augetto Graig en Ronelle Rademeyer



Die Namibiese polisie was tot laat gister nog besig om lidmate te ondervra oor vermeende ongerymdhede by die kerk van die Fountain of Living Waters Ministries in Freedomland, Katutura, waar minstens 15 mense aangehou is.

Inligting het gister aan die lig gekom oor past. Jacques Kanye­mesha Sumpi, oorspronklik van die Demokratiese Republiek die Kongo (DRK), se vermeende houvas op lidmate wat ter wille van genesing by die kerk moes bly en nie toegelaat is om huis toe te gaan nie.

Sumpi beskryf homself op sy webjoernaal, thebattleofconquest.wordpress.com, as “'n man van reusagtige integriteit, geloofwaardigheid, met 'n goeie begrip van God se woord, diepe openbaring en volwassenheid in die verborgenhede van die geloof”.

Teen druktyd is geen klagte nog teen hom ingedien nie.

Die polisie het Sondagaand omstreeks tienuur toegeslaan nadat bekommerde familielede van lidmate die polisie ontbied het. Daar is minstens 15 lidmate die nag daar aangehou.

Volgens hoofinsp. Christina van Dunem Dafonsech is die polisie Sondagaand na die toneel ontbied toe familielede nie toegang tot hul kinders kon kry nie. Die kerk was toegesluit en die polisie moes die deur oopbreek om in te gaan. Sumpi is in die proses lig beseer, het sy bevestig.

Hy het gister by die toneel aan joer­naliste gesê hy weet nie hoekom hy geslaan is nie en ook nie hoekom hy geboei is nie.

Me. Rita Hengari, 'n tante van een van die lidmate, het aan Republikein se susterskoerant Namibian Sun gesê haar niggie is reeds vir sowat vier jaar 'n lid van die kerk. Sy het kort ná die geboorte van haar driejarige kind aangesluit.

“Sy het vir ons gesê die pastoor het daarop aangedring dat sy by die kerk bly sodat hulle haar ná haar geboortepyne kan genees. Ons het haar net af en toe gesien. Toe ons haar verlede maand gesien het, het sy gesê haar foon sal af wees, want sy is by die kerk,” het Hengari vertel.

Een van die lidmate, wat anoniem wil bly, het op die toneel aan Republikein vertel die gemeente het soos normaalweg Sondag van 15:00 tot 17:00 diens gehou het. Hy sê hulle het daarna begin bid - soos hulle maak sedert hy vyf jaar gelede aangesluit het - toe iemand 'n familielid kom soek het.

Tienuur die aand het die polisie toegeslaan deur die kerk oop te breek, sê hy. Volgens dié 23-jarige gemeentelid is die pastoor geslaan omdat “hy te lank geneem het om sy skoene aan te trek”. Hy sê hulle is nie ingelig waarom die polisie daar is nie. 'n Lasbrief is ook nie getoon nie.

Dafonsech sê die polisie het rede gehad om die kerk binne te gaan en dit was nie nodig vir 'n lasbrief nie. Sy sê die soektog is binne die polisie se magte uitgevoer. Volgens haar het Sumpi baie kerke in Namibië en is hy al 'n tyd lank op die polisie se radar.

Dafonsech sê die kerk het geen register van sy lidmate nie en “geheimsinnige genesing” word daar aangebied. “Mense wend hulle hierheen vir genesing met behulp van heilige olies. Daar is mense wat deur hierdie praktyke benadeel word,” sê hy. Botteltjies gevul met olie en emmers vol sand is in die kerk gevind.

Volgens haar het die polisie twee vermiste kinders toegesluit in 'n omskepte vraghouer op die perseel gevind. Sy sê die polisie wil weet hoekom die perseel waar die kerk is, toegesluit word en hoekom mense binne die kerk weggekruip het. “Die mense word nie toegelaat om met ons te praat nie,” het Dafonsech bygevoeg. Teen druktyd gister was die polisie nog besig met die ondervraging van lidmate.

Die burgemeester van Windhoek, mnr. Muesee Kazapua en die goewerneur van die Khomasstreek, me. Laura McLeod-Katjirua, was ook vroeg gisteroggend op die toneel om ondersoek in te stel. Volgens Kazapua kon hy met sy aankoms sien dat die kerkleier mense agter hekke en 'n toegespande heining hou.

Hy sê lidmate het gebeure binne die kerk geheim gehou en hul familielede is ook nie toegelaat om met hulle te kommunikeer nie. Kazapua sê lidmate van die kerk is ook aangemoedig om hul werk te bedank. “Hierdie mense glo meer in die pastoor as in God, omdat hulle glo dat die pastoor wonderwerke kan doen,” sê die burgemeester.

“Die kerk word internasionaal gefinansier; die situasie is belaglik. As 'n gemeenskapsleier kan ek nie stilbly nie. Ek dink ons sal drastiese stappe in die toekoms moet doen,” sê hy.

Dafonsech het bevestig dat die hoof van die forensiese afdeling van die Namibiese polisie, dr. Paul Ludik, ook by die ondersoek betrek is.

“Van die sieklike lidmate sal hospitaal toe geneem word; of hulle nou wil of nie,” het sy laat gister gesê. Volgens haar het Sumpi aan die lidmate gesê as hulle die perseel verlaat, sal hulle sterf.

Intussen het mnr. Ludwig Beukes, algemene sekretaris van die Raad van Kerke in Namibië (CCN), gister by navraag gesê dié kerk, asook die gebeure daar is vir hom nuus. Beukes sê hy het nog nooit van hulle gehoor nie.

Sumpi is benewens hoof van dié kerk, ook president van AgapaTV, 'n kanaal wat gebruik word om sy preke uit te saai.

Soortgelyk

 

Stad wil skole se water en krag sny

14 ure gelede | Onderwys

Hoofredaksie 'n Beampte van die Windhoekse munisipaliteit het gisteroggend by een van Windhoek se spogstaatskole opgedaag met die opdrag om die water- en kragtoevoer summier...

Telecom: Klankopname oor skorsings lek uit

14 ure gelede | Plaaslik

Ronelle Rademeyer - Die waarnemende voorsitter van Telecom Namibia, me. Irene Simeon-Kurtz, het volgens ’n klankopname vóór die skorsing van twee van die drie senior...

EFN kap weekblad oor foto van lyk

14 ure gelede | Plaaslik

Die Redakteursforum van Namibië (EFN) het sy ontsteltenis uitgespreek oor die weekblad Informanté wat ’n gru-foto van wyle mnr. Ivan Pitt op Facebook geplaas het.Op...

Weer vir 7 November 2018

14 ure gelede | Weer

BINNELAND: Gedeeltelik bewolk en baie warm tot bloedig warm in die verre noordelike streke met enkele donderbuie in die Zambezistreek. Elders sal dit sonnig...

126 vas in ‘mooiste maand’ vir miljoene se dwelms

14 ure gelede | Misdaad

Francoise Steynberg - Wat volgens die digter C. Louis Leipoldt die mooiste, mooiste maand moes wees, was vir die Namibiese polisie se dwelmeenheid ’n monstermaand.Dié...

Kersjolyt vir Megameno

14 ure gelede | Gebeure

Die organisasie Hugs 4 Christ (H4C) het hul Kersfees-skoenboks en -partytjieprojek, Gifts 4 Kidz, van stapel gestuur. Hulle beoog om op 10 Desember vir die...

Nóg ’n kind in verkragting-nagmerrie

14 ure gelede | Misdaad

Francoise Steynberg - Terwyl die amptelike opposisie se vroueliga hul kommer oor ligte strawwe vir verkragters uitgespreek het, het die polisie bekend gemaak die afgelope...

Onderrig van gestremdes kort visie

14 ure gelede | Ministeries

Volgende week sal ’n amptenaar van die ministerie van onderwys, kuns en kultuur die geleentheid hê om ’n opvoedkundige toer na Duitsland te onderneem.Dít danksy...

Rundu: Jeugliga vra voorafbetaalde watermeters

14 ure gelede | Politiek

Die Swapo-jeugliga (SPYL) in die Kavango-Oosstreek stel voor voorafbetaalde watermeters word op Rundu aangebring, wat volgens hulle die Rundu-dorpsraad in staat sal stel om geld...